بيىلعى وقۋ جىلىندا 1-سىنىپقا باراتىن وقۋشىلار 6 جاستان باستاپ قابىلدانادى. ياعني, 1 قىركۇيەكتە بالانىڭ جاسى التىدا بولۋى كەرەك. سونداي-اق ءار اتا-انا ءوز قالاۋىمەن جىل سوڭىنا دەيىن 6 جاسقا تولاتىن بالاسىن بەرە الادى. سونىمەن بىرگە 1-سىنىپقا 7 جاسقا تولعان جەتكىنشەكتەر دە قابىلدانادى. بۇل جاڭالىق ءبىراز اتا-انانى ءارى-ءسارى ويعا قالدىرىپ وتىر. كەيبىر ادامدار مۇنى قولداسا, ەكىنشىلەرى «بالامىز مەكتەپكە بارۋعا دايىن ەمەس. وقۋ باعدارلاماسىن الىپ كەتە الا ما؟» دەگەن قورقىنىشىن ايتادى. وسى ماسەلەگە جانە اتا-انالار تاراپىنان قويىلعان سۇراقتارعا قالالىق ءبىلىم باسقارماسىنىڭ باسشىسى ءانۋار جانعوزين تۇسىنىكتەمە بەردى.
بىرىنشىدەن, بالانى مەكتەپكە قابىلداۋعا قۇجاتتاردى تەك بالانىڭ اتا-اناسى نەمەسە زاڭدى تۇلعالارى تاپسىرادى. سوندىقتان مەكتەپتەر ءوتىنىشتى باسقا وكىلدەردەن (اتا-اجەسى, اپاسى, اعاسى جانە ت.ب.) قابىلداۋدان باس تارتۋعا قۇقىسى بار.
ەكىنشىدەن, قازىرگى تاڭدا 1-سىنىپقا قۇجات قابىلداۋ ستاندارتقا سايكەس بارلىق جالپى ءبىلىم بەرەتىن مەكتەپتەردە جۇزەگە اسۋدا. قابىلداۋ كوميسسياسى جۇمىس كۇندەرى تاڭعى ساعات 9.00-دەن 18.30-عا دەيىن جۇمىس ىستەيدى. 10 ماۋسىمنان باستاپ قۇجاتتاردى ەلەكتروندى جۇيە ارقىلى تاپسىرۋ مۇمكىندىگى بار.
ۇشىنشىدەن, شاعىن اۋداندار بويىنشا تىركەۋ جاسالىنبايدى. قۇجات تاپسىرۋ ءۇشىن مەكەنجاي انىقتاماسى قاجەت ەمەس. سونىمەن بىرگە ەلەكتروندى جۇيە ءسىزدىڭ مەكەنجايىڭىزعا ەڭ جاقىن مەكتەپتى اۆتوماتتى تۇردە انىقتايتىنىن xابارلايدى. اتا-انانىڭ قالاۋىنشا قۇجاتتى سول مەكتەپكە نەمەسە باسقا ءبىلىم ورداسىنا تاپسىرۋ مۇمكىندىگى بەرىلەدى.
قابىلداۋدىڭ ۇلگى قاعيدالارىنا سايكەس, ەڭ ءبىرىنشى كەزەكتە ءبىلىم بەرۋ ۇيىمدارىنا قىزمەت كورسەتۋ اۋماعىندا تۇراتىن بارلىق بالالاردىڭ قولجەتىمدىلىگى قامتاماسىز ەتىلەدى, سودان كەيىن, بوس ورىن بولعان جاعدايدا, اتا-انالاردىڭ قالاۋى بويىنشا وتىنىشتەر قابىلدانادى. بۇل شارا كەيبىر استانالىق مەكتەپتەردىڭ تىعىزدىلىق جاعدايىن قاداعالاۋ ماقساتىندا جاسالدى.
تورتىنشىدەن, مەملەكەتتىك قىزمەتتى كورسەتۋ ءۇشىن قاجەتتى قۇجاتتاردىڭ تىزبەسى قاجەت. ولار:
1) اتا-انانىڭ نەمەسە زاڭدى وكىلدەرىنىڭ تاراپىنان جازىلعان ءوتىنىش;
2) بالانىڭ تۋ تۋرالى كۋالىگىنىڭ كوشىرمەسى;
3) دەنساۋلىق جاعدايى تۋرالى انىقتاما (№063/ۋ نىسان);
4) دەنساۋلىق جاعدايى تۋرالى انىقتاما (026/ۋ-3 نىسان);
5) بالانىڭ 2 دانادا 3ح4 سانتيمەتر ولشەمىندەگى فوتوسۋرەت;
سونداي-اق ەرەكشە ءبىلىم الۋعا قاجەتتىلىگى بار بالالاردى ءبىلىم بەرۋ ۇيىمدارىنا وقۋعا قابىلداۋ ءۇشىن زاڭدى وكىلدەرىنىڭ كەلىسىمى بولعان جاعدايدا پەداگوگيكالىق-مەديتسينالىق-پسيحولوگيالىق كوميسسيانىڭ قورىتىندىسى قوسىمشا بەرىلەدى.
