بۇگىن – مەملەكەتتىك رامىزدەر كۇنى. ەگەمەن ەل ەكەنىمىزدى بىلدىرەتىن بىردەن-ءبىر نىشاندار – مەملەكەتتىك تۋىمىز, ەلتاڭبامىز بەن انۇرانىمىزبەن تاۋەلسىزدىگىمىزدىڭ تۇعىرى نىق. ازاتتىعىمىزدى العانشا قىزىل تۋعا تەلمىرىپ, وراق پەن بالعانى قۇدىرەت ساناپ, ون بەس وداقتاس رەسپۋبليكانى انگە قوسىپ كەلگەن ءبىز وسىدان جيىرما جەتى جىل بۇرىن ءوز رامىزدەرىمىزگە يە بولدىق. قازىر كوك تۋىمىز بيىكتە جەلبىرەپ, ەلتاڭبامىز ەلىمىزدى ەڭسەلەندىرىپ, ءانۇرانىمىز اسقاقتاپ تۇر.
رامىزدەرىمىزدىڭ ءبارى دە ۇلتتىق تانىممەن, سالت-داستۇرلەرىمىزبەن قابىسادى. اسپان تۇستەس مەملەكەتتىك تۋىمىزدا قىران بەينەسى, جيەگىندە ۇلتتىق ورنەك, ورتاسىندا التىن كۇن مەن ونىڭ شۇعىلاسى بەينەلەنگەن. تۋدىڭ ءتۇسىنىڭ ءوزى ءتۇبىمىز تۇركى ەكەنىن بىلدىرەدى. كوك ءتۇس تۇركى مادەنيەتىندەگى تەرەڭ سيمۆولدىق مانگە يە. ال قىران ەجەلدەن يت جۇگىرتىپ, قۇس سالعان ساياتشىلىق كاسىبىمىزدەن حابار بەرەدى.
ەلتاڭبامىزدا ۇلتىمىزعا ءتان بەلگىلەر, ءتىپتى, كوپ. مۇنداعى شاڭىراق, شاڭىراقتى اينالا كۇن ساۋلەسىندەي تاراپ شانشىلعان ۋىقتار, قاناتتى پىراقتار ءبارى دە جاراسىم تاپقان. ەلتاڭبانىڭ اۆتورى جانداربەك مالىبەكوۆتىڭ بىردە «جەتى ساقينا – جەتى اتانى, تەكتىلىكتى بىلدىرەتىن ۇعىم. مەن ءوزىم ەلتاڭباداعى بەينەلەرگە قىرىققا جۋىق اتاۋ بەردىم. سول اتاۋلار ازاماتتاردىڭ ەلگە, اتامەكەنگە, حالىققا دەگەن قۇرمەتىن ارتتىرادى» دەگەنىن ەستىگەن ەدىك. دەمەك, ەلتاڭبا جوباسى تازا ۇلتتىق ۇعىمعا سۇيەنىپ جاسالدى.
ەلورداداعى ۇلتتىق مۋزەيدەگى ءار اپتانىڭ العاشقى جۇمىس كۇنى انۇرانىمىزبەن باستالاتىن بولدى. مۋزەي قىزمەتكەرلەرى كەشە تۇڭعىش رەت جۇمىستارىن ءانۇراندى شىرقاۋمەن باستادى. مۇنىڭ ماقساتى – مەكەمەدە ۇلتتىق رۋح, پاتريوتتىق, وتانشىلدىقتى ناسيحاتتاۋ. وتە دۇرىس, 1986 جىلدىڭ جەلتوقسان ايىندا جاستاردىڭ رۋحىن وياتقان, 2006 جىلى انۇرانعا اينالعان «مەنىڭ قازاقستانىم» ءانى ءالى تالاي ۇرپاقتى تاربيەلەيدى.
بۇگىن ەلىمىزدە مەملەكەتتىك رامىزدەر كۇنى كەڭ كولەمدە اتالىپ وتىلەدى. ەلوردادا دا 40-تان استام ءارتۇرلى شارا رامىزدەرىمىزدى ۇلىقتاۋعا ارنالادى. رامىزدەرىمىزبەن رۋحتانايىق! كوك تۋىمىز, ەلتاڭبامىز بەن ءانۇرانىمىز ارقاشاندا بيىكتە بولسىن!
