التى جىلدىڭ ىشىندە استانادان 1 ميلليون توننادان استام قوقىس شىعارىلدى
التى جىلدىڭ ىشىندە استانادان 1 ميلليون توننادان استام قوقىس شىعارىلدى. جىل وتكەن سايىن ەلوردادا قوقىس جيناۋ جۇيەسى جەتىلدىرىلىپ كەلەدى, پلاستيككە ارنالعان كونتەينەرلەردى ورناتۋ جۇمىستارى جۇرگىزىلىپ جاتىر, الداعى ۋاقىتتا قاعازعا ارنالعان جاشىكتەر دە قويىلماق.
قازىرگى كەزدە «استانا-تازارتۋ» كاسىپورنىندا 500-دەن اسا ادام ەڭبەك ەتەدى, كۇن سايىن 47 تەحنيكا باعىت بويىنشا شىعادى. جۇمىس تاۋلىك بويعى رەجيمدە جۇرەدى. ءبىرىنشى توپ تاڭعى ساعات 5-تە, ەكىنشىسى كۇندىزگى ساعات 2-دە شىعادى.
«استانا-تازارتۋ» جشس باس ديرەكتورى يۆان لاۆرينەنكونىڭ ايتۋىنشا, ەلوردانى اباتتاندىرۋ ەرەجەلەرىنە سايكەس, قوقىس شىعارۋ كۇنىنە ءبىر رەت جۇرگىزىلەدى, بىراق قالانىڭ قارقىندى دامىپ, ءوسىپ كەلە جاتقانىن ەسكەرە وتىرىپ, كوپتەگەن نۇكتەلەرگە كۇنىنە 2-3 رەتتەن بارۋعا تۋرا كەلەدى, بۇل كونتەينەرلەردىڭ تولىپ كەتۋىنە جول بەرمەۋ ءۇشىن جاسالادى.
«قالا 24 ۋچاسكەگە بولىنگەن, ءاربىر اۋداندا اعا شەبەر, ءاربىر ۋچاسكەدە ينسپەكتورلار بار, ولار كۇندە بارلىق نۇكتەلەردى تەكسەرىپ, كونتەينەر الاڭدارىندا بولىپ جاتقاننىڭ ءبارىن باقىلاپ وتىرادى. ماشينالار GPS باقىلاۋ جۇيەسىمەن جابدىقتالعان, بارلىعى كۇندەلىكتى نەگىزدە باقىلانىپ, مونيتورينگ جۇرگىزىلەدى. بۇدان باسقا, قازىر ءبىز قالانىڭ ەلەكتروندى كارتاسىن ازىرلەپ جاتىرمىز, ءبىزدىڭ بارلىق زاڭدى جانە جەكە نۇتكەلەرىمىز وسى كارتاعا تىركەلەدى, ناتيجەسىندە ءبىز قالادا بولىپ جاتقاننىڭ ءبارىن ونلاين رەجيمدە باقىلاپ وتىرامىز. بارلىق كونتەينەر الاڭدارىنىڭ فوتوسۋرەتتەرى وسى كارتاعا ەنگىزىلەدى, پايدالانۋشىلار وزدەرى قاراپ وتىرادى, كارتا ءبىزدىڭ سايتتا ورنالاستىرىلادى. بۇل كوپ ەڭبەكتى قاجەت ەتەتىن جۇمىس, بۇل جۇيە كەلەسى جىلى ىسكە قوسىلادى دەپ ويلايمىن», – دەدى يۆان لاۆرينەنكو.
بۇگىندە قوقىستى ءبولىپ جيناۋ بويىنشا جوبا ناسيحاتتالۋدا. ءار اپتا سايىن قالادا 30-50 كونتەينەر, جىل سوڭىنا دەيىن 686 قوقىس جاشىگى ورناتىلادى. ارنايى ەكولوگيالىق قوقىس تاسىمالداعىش ماشينالارى كۇن سايىن ءبىر تونناداي پلاستيك شىعارىپ ءجۇر.
«ءبىز ازىرگە پلاستيك پەن قاعازعا توقتالدىق. تۇرعىنداردان پلاستيك سالاتىن كونتەينەرلەرگە اليۋميني بانكالارىن سالۋدى دا سۇرايتىن شىعارمىز. ويتكەنى سونداي دا سۇرانىس بار, ادامدار سۇراپ جاتىر. شىنىعا ارنالعان جەكە جاشىكتەر ورناتۋدىڭ قاجەتتىلىگى جوق, ويتكەنى قازاقستاندا شىنى وڭدەۋ ءوندىرىسى جوق, سول سەبەپتى ونى جاي جيناۋ ورىنسىز. قاعازعا ارنالعان بولەك كونتەينەرلەر ورناتىلادى, قازىر ولار جاسالۋدا. جاڭا جىلدان باستاپ ورناتپاقپىز», – دەدى يۆان لاۆرينەنكو.
الدا وتەتىن ەكسپو-2017 كورمەسى قارساڭىندا قالادا قايتا ارتۋ ستانتسيالارىن ىسكە قوسۋ جوسپارلانعان. بۇل قوقىس جيناۋ ۋاقىتىن قىسقارتۋعا مۇمكىندىك بەرەدى. استانانىڭ اينالاسىنا قۋاتتى ماشينالار ورناتىلادى, ءار اۋداندا ەكى ستانتسيادان بولادى, ول جەرگە قوقىس تاسىمالداعىش ماشينالار جەتىپ, جۇكتەرىن تاستاپ, ارى قاراي باعىتتارى بويىنشا شىعاتىن بولادى.
astana.gov.kz
