قازاق ۇعىمىنداعى تۇلعالىق قاسيەت ادامنىڭ حالىق يگىلىگى ءۇشىن قىزمەت ەتۋىنەن كورىنەدى. شالكيىز جىراۋدىڭ سوزىمەن ايتساق, «كەرەكتى كۇنى الدىڭدا, عازيزلەنگەن سۇلتان جانىم ايامان» دەگەن سەرتتەگى تۇلعالار قازاق دالاسىندا بولعان, ءالى دە بار.
تۇلعالىق قاسيەتكە يە ادامداردىڭ اراعا عاسىر سالىپ, نە بولماسا ودان دا ۇزاق مەرزىمدە دۇنيەگە كەلەتىندىگى تابيعي قۇبىلىس. سوندىقتان, تۇلعالىق قاسيەت ادامزات ءۇشىن قادىرلى. ەلدىك مۇرات ءۇشىن كۇرەس – كۇرەستەردىڭ ۇلىسى. ۇلى قازاق دالاسى تالاي عاسىر تولعاتىپ, تەكتىلىگى تەرەڭ, اقىل-ويى كەمەل, رۋحى بيىك, اڭسارى اسقاق تارلانداردى سىيلادى. حالىقتى باقىتتى ەتۋدىڭ جولىن ىزدەپ, جالاڭ قولىمەن وت ۇستاعان سول جامپوزداردىڭ ۇلى ۇستانىمى ەلدىك مۇراتى, قازاق ساناسىندا ءالى جاساپ كەلەدى. باتىر بابا, ابىز اتالاردىڭ كوكەيىن تەسكەن ازاتتىق ارمانى ءبۇگىن عانا ورىندالدى.
قازاقتىڭ تاعدىرى ءوز كۇلىنەن ءوزى قايتا جاراتىلاتىن فەنيكس-قۇستىڭ بولمىسى سياقتى. اتا تاريحتان بەلگىلى, قازاق كورمەگەن قاسىرەت جوق. ەڭ باستىسى, اتا-بابا اماناتىنا قيانات جاسالعان جوق. نۇرسۇلتان نازارباەۆتىڭ بابالار رۋحىنان تامىر تارتقان ازاتتىق يدەياسى جۇزەگە استى. ازات ەلدىڭ استاناسى ارقا تورىنە قونىس تەپتى, مەملەكەت ءوزىنىڭ باعدارىن ايقىندادى. قازاق ەلىنىڭ تاۋەلسىزدىگىن نىعايتۋدا نۇرسۇلتان ءابىشۇلىنىڭ تۇلعالىق قاسيەتى جان-جاقتى كورىندى.
تۇلعانى تاريحتىڭ قالىپتاستىراتىنى بەلگىلى. ال, قازاقستان مەملەكەتى ءۇشىن ءاربىر ءسات – تاريحتىڭ التىن پاراعى. ەل باسقارىپ وتىرعان تۇلعانىڭ تەكتىلىگى مەن رۋحى حالىقتى جارقىن بولاشاققا قاراي جەتەلەيدى. ساياسات پەن عىلىم تۇلعانى قالىپتاستىرۋى مۇمكىن, بىراق جاساي المايدى. ناعىز حالىقتىق تۇلعا قاراپايىم حالىقتىڭ اراسىنان شىعىپ, ەلدىك مۇرات جولىنداعى قاجىرلى ەڭبەگىمەن عانا تاريحتا قالادى.
حاميت ەسامان
