«التىن تۇلپار» ايماقتا ءوتتى
جىل سايىن ەلوردا تورىندە وتەتىن «التىن تۇلپار» ءتۋرنيرى بيىل العاش رەت ايماقتا وتكىزىلدى. بۇل جولى ۇلتتىق سپورتتىڭ باسەكەسى اتىراۋدىڭ ءتوسىن ءبىر دۇبىرلەتتى.
قازاقستان رەسپۋبليكاسى ۇلتتىق سپورت قاۋىمداستىعى مەن اتىراۋ وبلىسى اكىمدىگى جانە ۇلتتىق سپورت قاۋىمداستىعىنىڭ اتىراۋ وبلىستىق فيليالىنىڭ ۇيىمداستىرۋىمەن بەسىنشى مارتە ۇيىمداستىرىلعان 51 شاقىرىمدىق الامان جارىستا ون ەكى ءوڭىردىڭ قىرىققا جۋىق جۇيرىگى باق سىنادى. Nur Otan پارتياسى مەن قر مادەنيەت جانە سپورت مينيسترلىگىنىڭ قولداۋىمەن وتكەن بايگەنىڭ باس جۇلدەسى 10 ملن تەڭگە بولدى. ال 9 اتقا جۇلدە بەرگەن سايىستىڭ جالپى جۇلدە قورى 22 ملن تەڭگەنى قۇرادى.
2017 جىلعى «التىن تۇلپاردا» تارازدىڭ تۇلپارى «سامالدان» ارقان بويى ارتتا كەلىپ, ەكىنشى ورىندى يەلەنگەن جەتىسۋدىڭ جۇيرىگى «قويانقاسقانى» ارادا ەكى جىل وتكەندە يەلەرى قىزىلوردا وبلىسى اتىنان «التىن تۇلپارعا» تاعى دا باپتاپ قوستى. «قويانقاسقا» سايگۇلىك بۇل جولى ناعىز بابىندا ەكەن. ات يەسى بەردىبەك ماحانوۆتىڭ ايتۋىنشا, بۇل جارىسقا جۇيرىكتى ءبىر اي بويى اتىراۋدا ارنايى باپتاعان ەكەن. ات باپكەرىنىڭ ەڭبەگى اقتالىپ, «قويانقاسقا» جارىس جولىنا شىققان قىرىققا جۋىق سايگۇلىكتەن الدى بولىپ, 10 ميلليون تەڭگەلىك باس بايگەنى ولجالاپ قايتتى. ەكىنشى ورىندى جامبىل وبلىسىنان كەلگەن جاسۇلان ابدىبەكوۆتىڭ «شىمشىق» اتتى جەتى جاستاعى بۋدان تورى بيەسى يەلەنىپ, 5 ميلليون تەڭگەلىك جۇلدەگە كەنەلدى. مارە سىزىعىن ءۇشىنشى بولىپ تاعى ءبىر جامبىلدىق اتبەگى ەلدوس سۇلتانبەكوۆتىڭ «دوس» اتتى سايگۇلىگى كەسىپ ءوتىپ, 2 ملن 500 مىڭ تەڭگە ولجا الدى.
سونىمەن قاتار, «التىن تۇلپار – جايىق جاعاسىندا» الامان بايگەسىندە تاعى دا التى تۇلپارعا قارجىلاي سىيلىق بەرىلدى.