جەزتاڭداي ءانشى امىرە قاشاۋباەۆتىڭ ءومىرى تۋرالى كوركەمفيلم ءتۇسىرۋ قولعا الىندى. «قازاقفيلم» كينوستۋدياسى شەتەلدىك ارىپتەستەرمەن بىرىگىپ, ءانشىنىڭ شىعارماشىلىق شىڭىنا شىققان كەزەڭىن كورسەتپەك.
فيلمگە كينوپروديۋسەر, ينۆەستور ءاليدار وتەمۇراتوۆ, گولليۆۋدكە تانىمال كەري گرانات جانە وسكار جۇلدەسىنىڭ يەگەرى ەد دجونس پروديۋسەرلىك ەتەدى. «امىرە» تۋىندىسى قازاقستان مەن امەريكانىڭ بىرلەسىپ شىعاراتىن العاشقى كينوجوبا بولماق.
امىرە قاشاۋباەۆ 1925 جىلى پاريجدە وتكەن ەكسپو كورمەسىنە قاتىسقان تۇڭعىش قازاق ەكەنى بەلگىلى. ول كورمەنىڭ مۋزىكالىق بايقاۋىندا قازاقتىڭ «بالقاديشا», «سۇرجەكەي», «ءۇش دوس», «دۋدار-اي», «جالعىز ارشا», «بەسقاراگەر», «اعاش اياق» جانە «Əي-əي, بوپەم» سەكىلدى ۇلتتىق اندەرىن ورىنداپ, كۇمىس مەدال يەلەندى. فيلمگە امىرەنىڭ ءان قورجىنىنداعى سەگىز تۋىندى الىندى.
كارتينا, سونداي-اق, ءانشىنىڭ مۇستافا شوقايمەن كەزدەسۋى, دجاز ورىنداۋشىسى دجوردج گەرشۆينمەن تانىسۋى جانە ەلگە ورالعاننان كەيىنگى قيىنشىلىقتارىن باياندايدى.
ءفيلمنىڭ ستسەناريىن بەنجامين ا. ۆان دەر ۆين جازسا, تاريحي كەڭەسشى ءرولىن امىرە قاشاۋباەۆ تۋرالى بىرنەشە ەڭبەكتىڭ اۆتورى, قر ەڭبەك سىڭىرگەن قايراتكەرى جارقىن شاكارىم اتقارادى. باستى ءرول وتاندىق ءارتىس سانجار ماديەۆكە بۇيىرسا, مۇستافا شوقايدىڭ ءرولىن ەركەبۇلان دايىروۆ سومدايدى. شەتەلدىك ارتىستەردەن بريتانيالىق بەن الدريدج جانە ەببي كورنيش ونەر كورسەتەدى.
قازىر ءتۇسىرۋ جۇمىستارى لاتۆيانىڭ ريگا قالاسىندا وتۋدە, ال قىركۇيەك ايىندا الماتىدا جالعاسادى. تۋىندىنىڭ الەمدىك تۇساۋكەسەرى كەلەسى جىلعا بەلگىلەنىپ وتىر.
گۇلدانا تالعاتقىزى
