استاناداعى م.وتەمىسۇلى اتىنداعى وقۋشىلار سارايىندا حالىقارالىق ايەلدەر كۇنىنە ارنالعان «كوكتەم سيمفونياسى» اتتى مەرەكەلىك بال ءوتتى.
سالتاناتتى كەشتى م.وتەمىسۇلى اتىنداعى وقۋشىلار سارايىنىڭ ديرەكتورى ۆاديم موتورين قۇتتىقتاۋ سوزبەن اشتى.
– بۇل مەرەكەنىڭ نازىك جاندار ءۇشىن ماعىناسى تەرەڭ, ورنى ەرەكشە. مىنە, سوندىقتان دا مەكتەپ وقۋشىلارى بىزگە ەڭ قىمبات جانە جاقىن ادامدار ءۇشىن تاڭعاجايىپ سيقىرلى مەرەكەلىك كەش ۇيىمداستىردى. مەن سىزدەرگە, قىمباتتى حانىمدار, شىن جۇرەكتەن باقىت پەن قۋانىش تىلەيمىن! كوكتەممەن بىرگە كەلگەن تاماشا مەرەكە – قايتالانباس سۇلۋلىعى مەن دانالىعىنا ايرىقشا باس يۋگە تۇرارلىق جاندار قۋاناتىن ايرىقشا كۇن, ولارعا دەگەن ريزاشىلىق پەن قۇرمەتكە تولى كۇن, – دەدى ول ءوز سوزىندە.
ءىس-شارادا مەكتەپ وقۋشىلارى مەن ەلوردالىق ستۋدەنتتەر پارلامەنتىنىڭ جەتەكشىلەرى وزدەرىنىڭ تەرەڭ ريزاشىلىعى مەن قۇرمەتىن ءبىلدىردى. ءبىلىم باسقارماسى ءبىلىم بەرۋ جانە تاربيە جۇمىسى ءبولىمىنىڭ باسشىسى گۇلفارا سارامبەتوۆا دا قالالىق ءبىلىم باسقارماسىنىڭ باسشىسى قاسىمحان سەنعازىەۆتىڭ اتىنان مەرەكەلىك ءىس-شاراعا شاقىرىلعان ارداگەر ۇستازداردى, مۇعالىمدەردى, وقۋشىلاردى كوكتەم مەرەكەسىمەن قۇتتىقتادى.
باعدارلامادا قازاقستان رەسپۋبليكاسى ۇلتتىق ۇلانى ءان جانە بي ءانسامبلىنىڭ ەرلەر حورى ورىنداعان اۋەندەر ايرىقشا قابىلدانسا, №1 بالالار مۋزىكا مەكتەبى بالالارىنىڭ ونەرى ەرەكشە تەبىرەنتتى. ەڭ قىزىعى, ەڭ اسەرلى ءسات بالعا قاتىسۋشىلاردىڭ ومىردەگى ەڭ قىمباتتى ادامى – انالارىمەن ۆالس بيلەپ, اۋەنمەن ۇيلەسىمدى تەربەلۋى بولدى.
شىنار حاميتوۆا
