وتاندىق ءبىر توپ ءفوتوتىلشى «كيەلى التاي» رەسپۋبليكالىق بلوگ-تۋرىنا قاتىسىپ, شىعىس قازاقستان وبلىسى قاتونقاراعاي اۋدانىنىڭ تۇمسا تابيعاتى مەن تاريحي ورىندارىن تاسپاعا ءتۇسىردى.
– بيىل قازاقستاندا جاستار جىلى دەپ جاريالانعان بولاتىن. اتالعان ەكسپەديتسيا دا سونىڭ اياسىندا ۇيىمداستىرىلدى. قاتىسۋشىلاردىڭ كوپشىلىگى – جاس فوتوگرافتار. ولار تۇسىرگەن شىعىس قازاقستاننىڭ ءتىل جەتكىسىز تاماشا سۇلۋلىعىن پاش ەتەتىن سۋرەتتەر كەيىن رەسپۋبليكا بويىنشا ءتۇرلى كورمەلەرگە قويىلادى, بۇل وتاندىق ءتۋريزمدى دامىتۋعا ۇلكەن سەپ بولادى دەپ ويلايمىن, – دەدى ءىس-شارانى ۇيىمداستىرۋشىلاردىڭ ءبىرى, «فوتوونەر» قوعامدىق بىرلەستىگىنىڭ توراعاسى اسىلحان ءابدىرايىم.
بلوگ-تۋر بارىسىندا National Geographic Qazaqstan جۋرنالىنىڭ شەف-فوتوگرافى ەربولات شادراحوۆ جانە ارداگەر ءفوتوتىلشى نۇرمانبەت قيزاتۇلى سەكىلدى كاسىبي فوتوگرافتار جاس ارىپتەستەرىنە ارناپ شەبەرلىك سىنىپتارىن دا وتكىزدى.
قاتونقاراعاي اۋدانى اۋماعىنداعى ساق داۋىرىنەن ساقتالعان بەرەل قورىمى اتا-بابالارىمىزدىڭ تۇرمىس-تىرشىلىگىنەن سىر شەرتىپ, كونە زاماندارعا جەتەلەيدى. ءۇش قورعاننان تۇراتىن بۇل قورىم – قازاقستاننىڭ جالپىۇلتتىق كيەلى ورىندارى كارتاسىنا ەنگەن قاسيەتتى مەكەن. مىڭجىلدىقتار تاريحىن ارقالاعان قورعانداردى زەرتتەۋ ءحىح عاسىردىڭ ورتا شەنىندە باستالىپ, كۇنى بۇگىنگە دەيىن جالعاسىپ جاتىر. كەيىنگى جىلدارى قورىمدى بەلگىلى ارحەولوگ زەينوللا ساماشەۆ ىندەتە زەرتتەدى. ولجاسىز دا ەمەس. سونىڭ ىشىندە №10 وبادان ەرتتەۋلى اتتاردىڭ سۇيەكتەرى, ات ابزەلدەرى تابىلدى.
