ەلىمىزدە 8 مىڭداي دارى-دارمەك تىركەلگەن ەكەن. اۋرۋعا اسەرى دە, ساپاسى دا ءارتۇرلى فارماتسەۆتيكالىق ونىمدەردى جۇرتشىلىق دارىگەردىڭ تاعايىنداۋىنسىز-اق قولدانا بەرەدى. سوڭعى كەزدەرى دارىلىك زاتتاردى بەي-بەرەكەت پايدالانۋدان ونىڭ جاناما اسەرلەرى جيىلەپ كەتكەن. سوندىقتان ەلوردا اكىمدىگى مەن دەنساۋلىق ساقتاۋ جانە الەۋمەتتىك دامۋ مينيسترلىگى بىرلەسىپ, «استانا دەنساۋلىقتى تاڭدايدى» اتتى اكتسيانى قولعا الىپ وتىر.
ەلوردادان باستاۋ العان اكتسيا تۋرالى بايانداعان مينيسترلىكتىڭ مەديتسينالىق جانە فارماتسەۆتيكالىق قىزمەتتى باقىلاۋ كوميتەتىنىڭ استانا قالاسى بويىنشا دەپارتامەنتىنىڭ باسشىسى روزا قۋانىشبەكوۆا تەك دارىگەردىڭ رەتسەپتىمەن بەرىلۋگە ءتيىس دارىلەردىڭ ءدارىحانالاردا ەركىن ساتىلۋى حالىقتىڭ دەنساۋلىعىنا زيان ەكەندىگىن ايتا كەلە, قولعا الىنعان جوبا ۇلت ساۋلىعىن قامتاماسىز ەتۋگە سەپتىگىن تيگىزەتىنىن جەتكىزدى.
ماماندار استانا قالاسى تۇرعىندارىنىڭ اراسىندا ارنايى ساۋالناما جۇرگىزگەن. سونىڭ ناتيجەسى كورسەتكەندەي, ەلوردالىقتاردىڭ 51 پايىزى ءدارى الاردا فارماتسەۆتەرمەن, پروۆيزورلاردىڭ كەڭەسىنە جۇگىنەدى ەكەن. ال 18 پايىزى تانىستارى مەن تۋىستارىنىڭ اقىلىنا قۇلاق اسسا, 12 پايىزى دارىلىك زاتتاردى ءوز بەتىنشە ساتىپ الادى. تۇرعىنداردىڭ تەك 19 پايىزى عانا دارىگەردىڭ تاعايىنداۋىمەن ەم قابىلدايدى. روزا توحتانالىقىزىنىڭ ايتۋىنشا, كەز كەلگەن ءدارىنىڭ جاناما اسەرى بولاتىنىن, ءتىپتى, كەيبىر انتيبيوتيكتەردى دۇرىس قولدانباسا, باكتەريالاردىڭ دارىگە توزىمدىلىگى پايدا بولىپ, انتيباكتەريالدىق تەراپيانىڭ كومەگى بولماي قالۋى مۇمكىن. «مىسالى, ەلىمىزدە تۋبەركۋلەزدىڭ جازىلمايتىن تۇرىنە شالدىققاندار بار. ناقتىراق ايتقاندا, ولارعا تۋبەركۋلەزگە قارسى بىردە-ءبىر ءدارى اسەر ەتپەيدى. سەبەبى, سىرقات جاندار كەزىندە انتيبيوتيكتى بەيبەرەكەت ىشە بەرگەن. سونىڭ سالدارىنان كوح تاياقشاسىنىڭ قوزدىرعىشى دارىلەرگە ءتوزىمدى بولىپ الدى دا قانداي كۇشتى دارىگە دە بوي بەرمەيدى. ال دۇنيەجۇزىندە سوڭعى 15 جىلدا ەشقانداي جاڭا انتيبيوتيك وندىرىلگەن جوق. قۇرت اۋرۋىنىڭ ءتوزىمدى تۇرىنە شالدىققانداردى تەك ساۋ ادامداردان وقشاۋلاۋمەن عانا شەكتەلىپ وتىرمىز» دەدى ول.
ەندى مينيسترلىكتىڭ قولداۋىمەن انتيبيوتيكتەر, گورمونالدىق جانە تىنىشتاندىراتىن اسەرى بار دارىلەر تەك دارىگەردىڭ رەتسەپتىمەن ساتىلماق. ارينە, بۇرىن دارىلىك زاتتاردى ەركىن الىپ كەلگەن حالىق بۇعان نارازىلىق ءبىلدىرۋى مۇمكىن. سوندىقتان جوبا كەزەڭ-كەزەڭمەن جۇزەگە اسىرىلماق. استانا قالاسىنىڭ فارماتسەۆتيكالىق قاۋىمداستىعىنىڭ پرەزيدەنتى ستەپان بەرەزيننىڭ ايتۋىنشا, العاشقى كەزەڭدە قالانىڭ بارلىق ءدارىحانالارى مەن ەمحانالارىندا ءوز بەتىنشە ەمدەلۋدەن باس تارتۋعا شاقىراتىن ارنايى پلاكاتتار ىلىنەدى. سونىمەن قاتار, مەديتسينا قىزمەتكەرلەرى ءۇشىن سەمينارلار ۇيىمداستىرىلىپ, حالىق اراسىندا كەڭ اۋقىمدى ءتۇسىندىرۋ جۇمىستارى جۇرگىزىلەدى. جاڭا جوبا بيىل قىركۇيەك-قازان ايلارىندا تولىعىمەن ىسكە قوسىلىپ, بۇكىل قازاقستاندى قامتيتىن بولادى.
ق. توقتامۇرات, astana-akshamy.kz
