شوتلانديانىڭ گلازگو قالاسىندا پاراليمپياداشىلار اراسىندا وتكەن الەم چەمپيوناتىندا استانالىق ءجۇزۋشى ءانۋار احمەتوۆ قولا جۇلدەگەر اتاندى.
جالپى, ۇلىبريتانياعا اتتانعان جەتى سپورتشىمىزدىڭ ەكەۋى جۇلدەگەرلەر قاتارىنان كورىندى. ءبىر قولا مەدالدى استانالىق ءانۋار احمەتوۆ جەڭىپ السا, ەكى قولا مەدالعا تارازدىق ءجۇزۋشى ءزۇلفيا عابيدۋللينا قول جەتكىزدى. پاراليمپيادا دوداسىنا كەشىرەك ارالاسا باستاعان قازاقستاندىقتار ءۇشىن الەم چەمپيوناتىنان ءۇش بىردەي قولا مەدال الۋ از جەتىستىك ەمەس.
استانا اۋەجايىندا الەم چەمپيوناتىنىڭ جۇلدەگەرىن كۇتىپ الۋشىلار اراسىندا ءبىز دە بولدىق. ءانۋاردىڭ ءجۇزى جارقىن, ءوزى كوڭىلدى. وتكەن جىلعى پارا-ازيا ويىندارىنان ءبىر ءوزى قازاقستانعا 5 التىن مەدال تارتۋ ەتكەن, بيىلعى جىلعى وڭتۇستىك كورەيادا, يسپانيادا, برازيليادا بولعان حالىقارالىق جارىستاردىڭ بارىنەن التىن مەدالسىز كەلمەگەن ءانۋاردىڭ كەۋدەسىندەگى وسى جولعى قولا مەدال بىزگە التىنداي جارقىراپ كورىنەدى. ويتكەنى, بۇل الەم چەمپيوناتىنىڭ قولا مەدالى عوي!
بۇل قولا مەدالدىڭ قازاق ءۇشىن قانداي ماڭىزى بار ەكەنىن ءانۋاردى قارسى الۋعا اۋەجايعا ارنايى بارعان «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ» ديرەكتورى قىدىربەك رىسبەك: «بىلە-بىلسەك, ءانۋاردىڭ بۇل جەڭىسى – ءبىزدىڭ ەل ءۇشىن ۇلكەن قۋانىش. پاراليمپيادا تاريحىندا الەم چەمپيوناتىنان قولا جۇلدە ۇتقان قازاق ۇلانى بۇعان دەيىن بولعان جوق. ءانۋار – الەم چەمپيوناتىنىڭ جۇلدەگەرى اتانعان تۇڭعىش قازاق! بۇل قۋانىش بارشاڭىزعا ورتاق. قۇتتى بولسىن!» دەپ انىقتاي ءتۇسىندىرىپ بەردى.
سونىمەن, پاراليمپيادا تاريحىنىڭ بەتىنە تاعى ءبىر جاڭا ەسىم جازىلدى. ول – قازاقتان شىققان تۇڭعىش الەم چەمپيوناتىنىڭ جۇلدەگەرى ءانۋار احمەتوۆ! ءبىزدىڭ تىلەگىمىز: «ءالى پاراليمپيادا ويىندارىنىڭ جۇلدەسىنە ىلىككەن قازاق ۇلانى جوق. باس قامشىنى ءانۋار!».
تولەگەن جاكىتاي
