جەر قۇرعاقتا وتكەن جارىستاردىڭ قاي-قايسىسىن بولسىن قۇر جىبەرمەگەن جەلاياقتارعا جاۋعان قار دا كەدەرگى بولمادى. استاناداعى قىسقى مارافونعا قاتىسقان جۇرتتىڭ قاراسى قالىڭ بولدى. دالىرەك ايتساق, ەلىمىزدە العاش رەت ۇيىمداستىرىلعان «Astana Winter Marathon-2017» دوداسىندا 400-گە تارتا ادام جۇگىردى.
ۇنەمى الىسقا جۇگىرىپ, بوي قىزدىرىپ ۇيرەنىپ قالعان حالىق قىستا ءبىرىنشى رەت وتكەن بۇل جارىستى قۋانا-قۋانا قۇپ كوردى. مارافونشىلاردىڭ اراسىنان پرەزيدەنت اكىمشىلىگىنىڭ جەتەكشىسى ادىلبەك جاقسىبەكوۆ پەن «قازاقستاننىڭ دامۋ بانكى» اق توراعاسى بولات جامىشەۆ تە تابىلدى.
مارافوندى ۇيىمداستىرۋعا استانا قالاسىنىڭ اكىمدىگى مەن قر جەڭىل اتلەتيكا فەدەراتسياسى مۇرىندىق بولدى. باستاما كوتەرگەن – «Marathon» جۇگىرۋ كلۋبىنىڭ قۇرمەتتى مۇشەسى, گيننەس رەكوردتار كىتابىنىڭ جەتى دۇركىن رەكوردشىسى, حالىقارالىق دارەجەدەگى سپورت شەبەرى مارات جىلانباەۆ.
جارىستىڭ بەلگىلەنگەن مەجەلەرى – 10, 21 جانە 42 كم 195 مەتر قاشىقتىق. ءار قاشىقتىقتىڭ جەڭىمپازدارى ءۇش جاس ساناتى بويىنشا ماراپاتتالدى.
سونىمەن, ەڭ قىسقا قاشىقتىق – 10 شاقىرىمدا ارمان عالىموۆ پەن اسەم مەركەجانوۆا بارىنەن وق بويى وزىق بولدى. بۇعان قوسا, ەرلەر مەن ايەلدەر جاستارىنا قاراي تاعى دا جەكەلەي ماراپاتتالدى. جالپى بۇل قاشىقتىقتا 207 ادام ءوز شامالارىن بايقاپ كوردى.
ودان سوڭ 21 شاقىرىمدى جۇرتتان بۇرىن ەڭسەرگەن پاۆەل برودا مەن اسەل قۇسپانوۆا جەڭىمپاز اتاندى. وسى ارادا 144 ادام جۇگىردى.
ال تولىق مارافوندى تەك ەر ازاماتتار عانا باعىندىردى. دالىرەگى – 49 ادام. سولاردىڭ ىشىنەن اسقار جاڭابەرگەنوۆ جۇيرىك شىقتى.
جالپى «استانا ترياتلون پاركىندە» وتكەن مارافونعا 298 ەر ادام جانە 90 ايەل قاتىستى. جەلاياقتاردىڭ ەڭ جاسى 9 جاسار بولسا, ەڭ ۇلكەنى – 70 جاستا. مارافونعا قاتىسۋشىلاردىڭ بارلىعىنا ارنايى مەدال تابىستالدى.
ورىنبەك وتەمۇرات
