جانىبەك بەرداۋلەتۇلى – 1714-1792 ارالىعىندا جاساعان قازاقتىڭ ايگىلى قولباسىلاردىڭ ءبىرى. 78 جاسىندا قالبا تاۋىنىڭ ەتەگىندەگى اۋليە بۇلاق جاعاسىندا دۇنيەدەن وتكەن.
جاۋجۇرەك باتىر جوڭعارمەن ۇرىستا ەرەكشە ەرلىك كورسەتكەنى ءۇشىن, ابىلاي حان وڭ تىزەسىنەن ورىن بەرىپ, ونى كەرەي-ۋاق قولىنىڭ باس قولباسى دەپ جاريالاپ, باسىنا شاشاق ورناتىلعان, قارا تاماق نايزاعا ساپتالعان شىمقاي اق تۋدى ءوز قولىمەن جانىبەككە بەرەدى. قازاق حانى ابىلاي بەرگەن وسى تۋ, «جانىبەكتىڭ اق تۋى» اتالىپ, جانىبەكتىڭ قارا شاڭىراعىندا ۇرپاقتان ۇرپاققا جالعاسىپ, تەمىرمەن قاپتالعان اعاش ساندىققا سالىنىپ ساقتالعان. 1940 جىلداردان باستالعان التايداعى ۇلت-ازاتتىق قوزعالىسىندا وسپان, سۇلۋباي, سۇلەيمەن, نۇرقوجاي باستاعان باتىرلار اق تۋدى كوتەرىپ جاۋعا شاپقان.
جانىبەك ۇرپاقتارى قولىندا 1958 جىلعا دەيىن ساقتالىپ كەلگەن اق تۋ قىتايداعى ساياسي وزگەرىس كەزىندە بەلسەندىلەر جاعىنان تارتىپ الىنىپ, سول بەتى جوعالعان. سول تۋدىڭ تۇعىرى بولعان قارا ساندىق, كونەنىڭ كوزى, تاريحتىڭ تابارگى بوپ قىتايداعى التاي ايماعى شىڭگىل اۋدانىنداعى (جانىبەك بابانىڭ 7 ۇرپاعى) ساعدات مىرزاحمەتۇلىنىڭ شاڭىراعىندا ساقتاۋلى تۇر.
قۋانىش ىلياسۇلى
