نۇر-سۇلتان قالاسىندا «Egemen Qazaqstan» گازەتىنىڭ 100 جىلدىعى اياسىندا بەلگىلى پۋبليتسيست-عالىم اقسەلەۋ سەيدىمبەك اتىنداعى بيلياردتان IV جازۋشى-جۋرناليستەر اراسىنداعى ءداستۇرلى تۋرنير مارەگە جەتتى.
اقسەلەۋ سەيدىمبەك اتىنداعى تاستاياق ءتۋرنيرى جۋرناليستەر قاۋىمى اسىعا كۇتەتىن سايىستىڭ بىرىنە اينالعان. بيىل وسى ءداستۇرلى جارىستى ۇيىمداستىرۋدى جانە جۇلدە قورىن ەل گازەتى «Egemen Qazaqstan» ۇجىمى كوتەرگەن ەكەن.
ال جارىسقا كەلەر بولساق, مەرگەندەر باسەكەسىندە 50 جازۋشى-جۋرناليست باعىن سىنادى. ولار اعا بۋىن جانە جاس بۋىن بولىپ ەكىگە ءبولىندى.
اتاپ ايتقاندا, قويشىعارا سالعاراۇلى, تولەن ابدىك, ءجۇرسىن ەرمان, الدان سمايىل, تۇرسىن جۇرتباي, قاجىعالي مۇحانبەتقاليۇلى, ساۋىتبەك ابدراحمانوۆ, نامازالى وماشۇلى جانە باسقا دا جاقسىلار مەن جايساڭدار جارىستىڭ كورىگىن قىزدىردى. ءسويتىپ كۇنىمەن شار سوققان مىقتىلاردىڭ اراسىنان شىن شەبەرلەر سۋىرىلىپ شىقتى. اعا بۋىن اراسىندا وتاندىق جۋرناليستيكانىڭ مايتالمانى, عالىم-ۇستاز نامازالى وماشۇلى جەڭىسكە جەتتى. ەكىنشى جانە ءۇشىنشى ورىنعا بەلگىلى جۋرناليستەر سادىبەك تۇگەل مەن كەنجە جۇماعۇلوۆ يە بولدى.
ال جاس بۋىن اراسىنداعى جارىس وتە تارتىستى وتكەنىن اتاپ وتكىمىز كەلەدى. دەگەنمەن, «كازاحستانسكايا پراۆدا» گازەتىنىڭ ءفوتوتىلشىسى ماقسۇت ەرجانوۆ جەڭىمپاز اتاندى. كۇمىس جۇلدە بەلگىلى اقىن-جۋرناليست تالعات ەشەنۇلىنىڭ قانجىعاسىنا بايلاندى. ۇزدىك ۇشتىكتى جۋرناليست, ىشكى ىستەر ءمينيسترىنىڭ كەڭەسشىسى ءارى ۆەدومستۆونىڭ رەسمي وكىلى ءنۇردىلدا وراز تۇيىندەدى. سونداي-اق بىرقاتار بەلسەندى ويىنشىلارعا ءتۇرلى اتالىم بويىنشا ارنايى ديپلوم تابىستالدى.
تۇپتەپ ايتقاندا, ەل گازەتىنىڭ جۇلدەسى ءۇشىن وتكىزىلگەن اقسەلەۋ سەيدىمبەك اتىنداعى ءداستۇرلى تۋرنير قالامگەر قاۋىمنىڭ كوڭىل-كۇيىن كاسىبي مەرەكەلەرى الدىندا ءبىر كوتەرىپ تە, سەرپىلتىپ تە تاستادى.
