«استانا» كونتسەرت زالىندا قالالىق «سارىارقا» حالىق مۋزىكا ءانسامبلىنىڭ XXI كونتسەرتتىك ماۋسىمىنىڭ سوڭعى كەشى قازاقتىڭ دارىندى كۇيشىلەرىنىڭ ءبىرى قىزداربەك تورەبايۇلىنىڭ شىعارمالارىنا ارنالدى.
قىزداربەك – ارقاداعى شەرتپە كۇي مەكتەبىنىڭ وكىلى. جاسىنان اۋىلداعى ۇلكەندەردەن دومبىرا ۇيرەنىپ, ونەر سوڭىنا تۇسەدى. ول ونەردەگى ءپىرى يتاياق كۇيشىنى ەرەكشە قادىر تۇتقان. ءتىپتى, ەل ىشىندە قىزداربەك ءوز ۇستازى يتاياقپەن, توقا شوڭمانۇلىمەن كۇي جارىستىرعان دەگەن دە ءسوز بار. ونەرتانۋشىلاردىڭ ايتۋىنشا, كۇيشىنىڭ جەكە قورىندا 100-گە تارتا كۇي بولعان. بىراق ونىڭ ءبارى كەيىنگى ۇرپاققا تولىق جەتكەن جوق. وعان سەبەپ تە كوپ. كەڭەس وكىمەتى ورناعاننان كەيىن وتارشىلدىق قامىتتى كيگىسى كەلمەگەن ارقانىڭ داۋلەسكەر كۇيشىلەرى ازات رۋحتى اڭساپ, «58 ستاتيا», «وتكىنشى» دەگەن كۇيلەر شىعاردى. كەيىن بۇل شىعارمالاردىڭ اۆتورلارىنىڭ ءبارى قۋدالاندى. وسىنداي اۋىر ازاپتى قىزداربەك تە كوردى.
كەشتە بەلگىلى كۇيشى, ونەرتانۋشى جانعالي جۇزباەۆ قىزداربەكتىڭ ۇستازى يتاياقتىڭ «قوسباسارىن» شەرتىپ, ايتۋلى كۇيشىنىڭ ومىرىنەن از-كەم سىر ايتتى.
«اقسەلەۋ سەيدىمبەك اعامىز ءوز ەڭبەگىندە ارقانىڭ اتاقتى كۇيشىلەرى قىزداربەك, سەمبەك, ءابدي, ماقاش, كارىبەك تۋرالى جازدى. قىزداربەكتىڭ كۇيلەرىن بىزگە جەتكىزگەن – داۋلەتبەك سادۋاقاسۇلى مەن ورال يساتايۇلى. بۇل كىسىلەر بولماعاندا كۇيشىنىڭ مۇراسى ەسكەرۋسىز قالار ەدى. ابىكەن حاسەنوۆ كوزى تىرىسىندە وسى جازىقسىز اتىلىپ كەتكەن كۇيشىلەردىڭ ەسىمدەرىن اتاپ, شىعارمالارىن ورىنداي المادى. بۇل تۇسىنىكتى دە. قىزداربەك – ءوزى قاتارلاس كۇيشىلەر اراسىندا ماحاببات ليريكاسىنا بارعان ادام. ونىڭ «سىلقىم قىز» اتتى كۇيى ەلگە كەڭىرەك تاراعان» دەدى ول.
