اقمولالىق جازۋشى, قازاقستان جازۋشىلار وداعىنىڭ وبلىسارالىق بولىمشەسىنىڭ ادەبي كونسۋلتانتى اسكەن نابيەۆ 60 جاسقا تولعاندا (1983 جىلى) ارىپتەس ءىنىسى, كسرو جازۋشىلار وداعىنىڭ مۇشەسى ءمادي حاسەنوۆ: «قالامى جۇيرىك, ءتىلى كوركەم, ويى تەرەڭ جازۋشى رەتىندە اسەر ەتكەن اعا قالامگەر اسكەن نابيەۆ بىزگە ەرەكشە ىستىق كورىنەدى.
كوڭىلىمىز جاقىن, ويىمىز ورتاق, ماقساتىمىز ءبىر اسەكەڭنىڭ شىعارماشىلىق ءاربىر قادامى, ادەبيەت الەمىندەگى تىنىمسىز ەڭبەگى مەن تابىستارى, شىققان ءار بيىگى ءبىزدىڭ كوز الدىمىزدا…» دەگەن ەدى.
ال جازۋشى ءمادي حاسەنوۆ 50 جاسقا تولعاندا (1 جەلتوقسان 1986 جىلى) اسكەن نابيەۆ: «جازۋشىنىڭ ءوزى قالاپ العان, ءوز جۇرەگى ۇناتقان تاقىرىبى – ونىڭ كوڭىل-كۇيى مەن سىر-سيپاتىن, وي پاراساتى مەن شەبەرلىگىن قالتقىسىز تانىتاتىن قاسيەتتەر. ونىڭ تۋىندىلارى سونىسىمەن بۇكىل رەسپۋبليكامىزدىڭ وقىرماندار قاۋىمىنا جاقسى تانىس. ال قالامىنان تۋعان كوركەم شىعارمالار شىنشىلدىعىمەن, كەيىپكەرلەرىنىڭ اسقاق ارمانمەن استاسىپ, زامانا تالابىن تاپ باسىپ جاتادى» دەپ باعا بەرىپتى.
بۇدان وسى وڭىردە تۋىپ-ءوسىپ, قاتارلاس قالام تەربەگەن ەكى جازۋشىنىڭ ءبىر-بىرىنە دەگەن ىزەتتىگى, سىيلاستىقتارى مەن ءوزارا قۇرمەتتەرى انىق اڭعارىلادى.
عازيزا يساحان
