پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەتتىڭ كەزەكتى وتىرىسىندا بيىلعى جىلۋ بەرۋ ماۋسىمىنىڭ بارىسى, «ەكسپو-2017» كورسەتىلگەن تەحنولوگيالاردى ەنگىزۋ, «اقىلدى قالالار» جوبالارىن ىسكە اسىرۋ, ۆاليۋتانى رەتتەۋ مەن ۆاليۋتانى باقىلاۋ تۋرالى زاڭنامانى جەتىلدىرۋ, ۇكىمەتتىڭ 2017 جىلعى زاڭ جوبالارىنىڭ ورىندالۋى مەن 2018 جىلعى جوسپارى ماسەلەلەرى قارالدى.
وتىرىستا قازاقستاندا «اقىلدى قالالار» جوباسى بويىنشا جۇزەگە اسىرىلىپ جاتقان شارالار تۋرالى اقپارات جانە كوممۋنيكاتسيالار ءمينيسترى داۋرەن اباەۆ حابارلاما جاسادى. ول ءوز سوزىندە Smart City تۇجىرىمداماسى قالالىق قىزمەتتىڭ بارلىق تۇرلەرىنىڭ تيىمدىلىگىن ارتتىرۋعا باعىتتالاتىنىن اتاپ كورسەتتى.
– Smart City ميسسياسىنىڭ نەگىزى – ادام جانە ونىڭ قاجەتتىلىكتەرى. «اقىلدى قالانىڭ» نەگىزگى سيپاتتاماسى – جايلىلىق, قاۋىپسىزدىك, تيىمدىلىك جانە قورشاعان ورتاعا زياندى تومەندەتۋ, – دەدى مينيستر. – «تسيفرلى قازاقستان» مەملەكەتتىك باعدارلاماسىنىڭ نەگىزگى كورسەتكىشتەرىنىڭ ءبىرى ەلىمىزدىڭ بەس ءىرى قالاسىندا – Smart Astana, Smart Karagandy, Smart Ontystuk, Smart Almaty, Smart Aktobe سەكىلدى Smart City-ءدى دامىتۋ بولاتىن.
داۋرەن اباەۆتىڭ اتاپ كورسەتكەنىندەي, اتالعان جوبالاردى ورىنداۋدىڭ نەگىزگى تۇلعالارى وڭىرلەر اكىمدىكتەرى بولماق. وسى ورايدا «اقىلدى قالانى» دامىتۋ تۇرعىسىنان ولاردىڭ جۇمىسىنىڭ نەگىزگى باسىمدىقتارى ءوڭىر تۇرعىندارىنىڭ ءومىر ساپاسىن جاقسارتۋ, ەلەكتروندى تۇردەگى مەملەكەتتىك قىزمەتتەردىڭ ۇلەسىن ۇلعايتۋ, قازاقستان ايماقتارىنىڭ Smart سity حالىقارالىق رەيتينگتەرىنە كىرۋى, Smart city تۇجىرىمداماسىنا سايكەس باستامالىق جوبالاردى ىسكە اسىرۋ, G2G, B2B جانە G2B سەگمەنتتەرىندە قاعازسىز ءوزارا ارەكەتتەستىكتى ىنتالاندىرۋ ەكەنى ايقىندالدى.
مينيستر مەملەكەتتىك باعدارلاما اياسىندا «اقىلدى قالالاردىڭ» تيپتىك تۇجىرىمداماسى ازىرلەنگەنىن اتاپ ءوتتى. وندا ينتەرنەت زاتتار, جاساندى زەردە سەكىلدى الدىڭعى قاتارلى تەحنولوگيالاردى قولداناتىن جوبالاردىڭ ءتىزىمى كەلتىرىلگەن. سونداي-اق, قۇجات Smart City تەحنولوگيالارىن ەنگىزۋدىڭ نەگىزگى قاعيدالارىن, تاسىلدەرىن, ماقساتتارىن, باسىمدىقتارى مەن مىندەتتەرىن انىقتايدى.
– جوبالار مەملەكەتتىك-جەكەشەلىك ارىپتەستىك, اقپاراتتاندىرۋدىڭ سەرۆيستىك مودەلى, بيۋدجەتتىك قارجىلاندىرۋ جانە جەكە ينۆەستيتسيالار شەڭبەرىندە جۇزەگە اسىرىلاتىن بولادى. سونىمەن قاتار, جوبالاردى بەنچماركينگتى پايدالانۋ, ياعني ۇزدىك الەمدىك جانە وتاندىق تاجىريبەگە باعدارلاۋ جاساۋ ارقىلى جۇزەگە اسىرۋ جوسپارلانعان, – دەدى داۋرەن اباەۆ.
قازاقستاندا Smart City سالاسىنداعى ۇلتتىق ستاندارتتار حالىقارالىق ستاندارتتارعا سۇيەنە وتىرىپ ازىرلەنگەن. ولار ەنەرگيا ۇنەمدەۋ, كولىك, ءبىلىم بەرۋ, دەنساۋلىق ساقتاۋ, قورشاعان ورتانى قورعاۋ, اقپاراتتىق تەحنولوگيالار سالاسىنداعى يننوۆاتسيالىق شەشىمدەر ارقىلى قالانى ءبىر ورتالىقتان باسقارۋ پروتسەستەرىنىڭ تۇبەگەيلى جاڭا مۇمكىندىكتەرىن قالىپتاستىرادى. ول قاۋىپسىزدىك پەن قىزمەت كورسەتۋدىڭ جوعارى دەڭگەيىن دە قامتاماسىز ەتەدى.
حابارلاماشى Smart City-ءدى ەنگىزۋ دەڭگەيىنە بايلانىستى قالالاردى باعالاۋ جۇمىستارىن جۇرگىزۋدى ۇسىناتىنىن اتاپ ءوتتى. سونىڭ نəتيجەسىندە باعالاۋدىڭ ءتيىستى شكالاسى بار كەستە تۇرىندەگى دارەجەسىنىڭ كارتاسى جاسالدى. ءار سالاعا ستاندارتتاردىڭ ينديكاتورلارى مەن كورسەتكىشتەرىنە سايكەس نەگىزدەلگەن باعا بەلگىلەنەدى.
وتىرىستا استانا قالاسىنىڭ اكىمى اسەت يسەكەشەۆ, الماتى قالاسىنىڭ اكىمى باۋىرجان بايبەك جانە قاراعاندى وبلىسىنىڭ اكىمى ەرلان قوشانوۆ Smart City جوباسىن ەنگىزۋدىڭ ايماقتىق تاجىريبەسى جانە ونى ىسكە اسىرۋ جاعدايى تۋرالى قىسقاشا حابارلاما جاسادى.
سەرىك ءپىرنازار
