بۇل سۋرەتتىڭ تاريحى قىزىق. ەلىمىز ەگەمەندىك العان العاشقى جىلدارى يسپانيادا قازاقستان ەلشىلىگى اشىلعان جوق. سوندىقتان ەكى مەملەكەت اراسىنداعى ساۋدا جانە ەكونوميكالىق بايلانىستى نىعايتۋ, اراداعى قارىم-قاتىناستى جاقسارتۋ ماقساتىندا پرەزيدەنت 1996 جىلى ۇكىمەت باسشىسىنىڭ ورىنباسارى قىزمەتىندە جۇرگەن جانىبەك كارىبجانوۆتى يسپانياعا جىبەرەدى. ەندى جانىبەك اعانى تىڭدايىق.
«ءبىزدىڭ دەلەگاتسيانى وسى ەلدىڭ پرەمەر-ءمينيسترى حوسە ماريا اسنار قابىلدادى. كەزدەسۋ بارىسىندا ەكى ەل اراسىنداعى قاتىناستى كۇشەيتۋ, ەلشىلىك اشۋ, «تالگو» جۇردەك پويىزى مەن ەنەرگەتيكا ماسەلەلەرى ءسوز بولدى. ول كىسى ءبىزدىڭ ۇسىنىستارىمىزعا جىلى شىراي تانىتتى. قوشتاساردا مەن وعان سول جىلى ەلىمىزدە ءجۇز ەلۋ جىلدىق تورقالى تويى اتاپ وتىلگەن جامبىل بابامىزدىڭ بەينەسى بەدەرلەنگەن شاعىن كىلەمدى سىيلادىم. « بۇل – قازاقتىڭ جاسى جۇزگە كەلگەن الىپ اقىنى. سىزگە وسى اتامىزدىڭ جاسىن بەرسىن!» دەپ تىلەگىمدى ايتتىم. بۇل لەبىزدى ەستىگەندە, العاشىندا بىزبەن سالقىن سويلەسىپ وتىرعان پرەمەر-ءمينيستردىڭ مىنەزى كىلت وزگەرىپ, كوڭىلدەنىپ شىعا كەلدى. ويتكەنى يسپاندىقتاردا ادامعا الدىمەن «جاسىڭىز ۇزاق بولسىن!» دەپ تىلەك ايتادى ەكەن. حوسە ماريا اسناردىڭ ءوزى التى تىلدە ەركىن سويلەپ, پوەزيانى ءسۇيىپ وقيدى. ماعان ايتۋلى تۇلعانىڭ ءبىر كىتابىن سالىپ جىبەرشى دەپ ءوتىنىش ايتتى. كەيىن ەلگە كەلگەننەن كەيىن ول كىسىگە اتامىزدىڭ ءبىر جىر جيناعىن سالىپ جىبەردىم. ودان ماعان «راقمەت» ايتقان جاۋاپ حات كەلدى. ءسويتىپ, ءبىزدى الىس يسپانيادا اقىننىڭ رۋحى قولدادى» دەيدى بەلگىلى مەملەكەت جانە قوعام قايراتكەرى.
