بيىلعى جىلى ەلوردادا تۇراتىن ۇلى وتان سوعىسىنا قاتىسۋشىلار مەن مۇگەدەكتەرگە جەڭىس كۇنىنە وراي جەرگىلىكتى بيۋدجەتتەن 150 000 تەڭگە تولەنەدى.
استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ وسى باستاماسى كەشە دەپۋتاتتار تاراپىنان قالالىق ءماسليحاتتىڭ كەزەكتى سەسسياسىندا قولداۋ تاپتى.
سونىمەن قاتار, 9 مامىر مەرەكەسىنە وراي سوعىس ارداگەرلەرىنە تەڭەستىرىلگەندەر دە اقشالاي كومەك الادى.
«قازىر قالادا تۇراتىن 292 ۇلى وتان سوعىسىنىڭ قاتىسۋشىسى مەن مۇگەدەگىنە 150 000 تەڭگەدەن تولەنەدى. ال, ۇوس قاتىسۋشىلار مەن مۇگەدەكتەرىنە جەڭىلدىكتەر مەن كەپىلدىكتەر بويىنشا تەڭەستىرىلگەن 1 871 ادام 20 000 تەڭگەدەن الادى. باسقا دا ساناتتاعى ازاماتتارعا – تىل ەڭبەككەرلەرى, قازا تاپقان جاۋىنگەرلەردىڭ جەسىرلەرى مەن وتباسىلارىنا 10 000 تەڭگە كولەمىندە كومەك كورسەتىلەتىن بولادى» دەدى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باستىعى الما التىباەۆا.
ونىڭ ايتۋىنشا, 9 مامىرعا جەرگىلىكتى بيۋدجەتتەن بارلىعى ءبىر رەتتىك 137 090 000 تەڭگە الەۋمەتتىك كومەك كورسەتۋ جوسپارلانعان.
ەسكە سالايىق, بۇگىنگى كۇنى ەلوردادا تۇراتىن بارلىق ۇلى وتان سوعىسىنا قاتىسۋشى ارداگەرلەر مەن مۇگەدەكتەر پاتەرمەن تولىق قامتىلعان. سونىمەن قاتار, مەرەكەلەردەگى ءبىر رەتتىك تولەمدەردەن بولەك, ارداگەرلەرگە باسقا دا الەۋمەتتىك كومەك تۇرلەرى, اتاپ ايتقاندا, امبۋلاتوريالىق ەمدەلۋ كەزىندە دارىلىك پرەپاراتتارمەن قامتاماسىز ەتۋ, قالالىق قوعامدىق كولىكتەردە تەگىن ءجۇرۋ, ساناتوريالىق-كۋرورتتىق ەم الۋلار, مەرزىمدىك باسىلىمدارعا تەگىن جازىلۋ, تەگىن ءتىس پروتەزىن سالۋ مەن باسقا دا قىزمەتتەر كورسەتىلەدى.
ەركەجان ساتىمبەك
