استانا قالاسى دەنە شىنىقتىرۋ جانە سپورت باسقارماسىنىڭ قولداۋىمەن جاۋىنگەر-ينتەرناتسيوناليست قازبەك ابدراحمانوۆ ەسىمىن ەسكە تۇسىرۋگە ارنالعان ءداستۇرلى شاعىن فۋتبول ءتۋرنيرى ءوتتى.
بيىلعى جارىس بالالار ۇيلەرى جانە اۋلالىق كلۋبتار كوماندالارى اراسىندا ۇيىمداستىرىلدى. جاسوسپىرىمدەر اراسىندا سالاۋاتتى ءومىر سالتىن ناسيحاتتاۋدى جانە وتاندىق ءپاتريوتيزمدى دامىتۋدى كوزدەگەن جارىستىڭ قورىتىندىسىندا اقمولا وبلىسىنىڭ اقكول قالاسىنداعى «بالالار ءۇيى» كومانداسى جەڭىمپاز اتاندى. ەكىنشى ورىندى «ەۆەرەست» اۋلالىق كومانداسى يەلەنسە, ۇزدىك ۇشتىكتى استانا قالاسى اكىمدىگىنىڭ №6 كاسىپتىك-تەحنيكالىق كوللەدجى وقۋشىلارى تۇيىندەدى. ال جارىستى قابىلداعان استانا قالاسى اكىمدىگىنىڭ «بالالار ءۇيى» مم كومانداسى ءتورتىنشى ورىندى قاناعات تۇتتى. اۋعانستان سوعىسى مايدانگەرىنىڭ ەرلىگىن اسپەتتەگەن جارىستىڭ جەڭىمپازدارى مەن جۇلدەگەرلەرىنە ديپلومدار, مەدالدار جانە باعالى سىيلىقتار تابىس ەتىلدى.
جارىستان سوڭ استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگىنىڭ ۇيىمداستىرۋىمەن «ەرلىك ساباعى» ءوتتى.
ورىنبەك وتەمۇرات
