ءتول مەرەكەمىز قارساڭىندا مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى مەملەكەتتىك ءتىلدىڭ سويىلىن سوعىپ جۇرگەن جۋرناليستەر اراسىنداعى كونكۋرستىڭ ناتيجەسىن جاريالادى.
جەڭىمپازدارىن سالتاناتتى ماراپاتتاۋ راسىمىندە مەملەكەتتىك ءتىلدىڭ احۋالى تۋرالى ماقالالارىمەن, ەفيرگە شىققان حابار مەن باعدارلامالارىمەن كوزگە ءتۇسىپ جۇرگەن جۋرناليستەر «ۇزدىك ماقالا», «ۇزدىك تەلەباعدارلاما», «ۇزدىك راديوباعدارلاما», «ۇزدىك سايت ماقالاسى» نوميناتسيالارى بويىنشا جۇلدەلى ورىندارمەن ماراپاتتالدى. وسى «مەملەكەتتىك ءتىل جانە باق» رەسپۋبليكالىق كونكۋرسىندا «ۇزدىك ماقالا» نوميناتسياسىن ارىپتەسىمىز گۇلجان راحمان يەلەندى. جۇلدە قورى – 500 000 تەڭگە. كونكۋرسقا كەلىپ تۇسكەن ماتەريالداردى ەلىمىزگە بەلگىلى قالامگەر, جۋرناليستەردەن قۇرالعان ارنايى قازىلار القاسى ساراپتاپ, جەڭىمپازداردى انىقتاعان. «گۇلجان ءۇشىن بۇل ناعىز جەڭىس بولدى دەپ ەسەپتەيمىن. تەك ءتىل عانا ەمەس, ۇلتىمىزدىڭ مۇددەسىن قورعايتىن ءاربىر ماقالاسىن جانىن جەپ, قالامىن قايراپ جازاتىن جۋرناليست. اسىرەسە, ءتىل ماسەلەسىنە كەلگەندە تابانداپ تۇرىپ الاتىن قاسيەتى بار. بىردە ۇجىم بولىپ وسى ءتىل ءۇشىن جىلاعانىنىڭ كۋاسى دە بولدىق» دەيدى قازىلار القاسىنىڭ مۇشەسى, «ەگەمەن قازاقستان» گازەتىنىڭ ءبولىم مەڭگەرۋشىسى تالعات باتىرحان.
ءيا, ايتسا ايتقانداي, ءبىز تانىعان گۇلجان قاشان كورسەڭ ءتىلدىڭ جوعىن جوقتاپ, مۇڭىن مۇڭداپ جۇرەدى. گازەتىمىزدىڭ بەتىنەن «تىلتۇزەر» ايدارىن اشىپ, ۇزاق ۋاقىت قالامىزداعى قاتەلەردى جوندەۋمەن اينالىستى. رەداكتسياعا قوڭىراۋ شالعانداردان, ءوزى اقپارات الۋشىلاردان, بارىنەن, بارىنەن تەك قازاق تىلىندە سويلەۋىن تالاپ ەتىپ جۇرەدى. «مەملەكەتتىك ءتىلدىڭ مارتەبەسىن جۇلدە الۋ ءۇشىن كوتەرمەيمىز. ول – ءبىزدىڭ مىندەتىمىز. دەگەنمەن وسىلاي ەلەنگەنىمىزگە قۋانىشتىمىز» دەيدى ءوزى.
ءبىز ارىپتەسىمىزگە انا ءتىلىمىزدىڭ ابىرويىن اسىرار ماقالالارىڭ كوپ بولسىن, جازارىڭ تاۋسىلماسىن دەيمىز!
گۇلميرا شارحانقىزى
