ەلوردا سيمۆولى «بايتەرەك» مونۋمەنتى كۇردەلى جوندەۋدەن ءوتتى. الداعى اپتادان باستاپ استانا تۇرعىندارى مەن قوناقتارىنا ەسىگىن ايقارا اشادى.
جوندەۋدەن كەيىنگى «بايتەرەكتىڭ» كەلبەتى ادام تانىماستاي وزگەرگەن. اپپاق ءمارماردان جاسالعان ەدەن, التىن تۇستەس باسپالداقتار, ىشكى بەزەندىرۋلەر كەرەمەت ۇيلەسىم تاپقان. كوفەحانا, كادەسىيلار سالونى مەن كيىم شەشەتىن ورىندار دا جاڭاشا كەلبەتكە يە.
تاعى ءبىر جاڭاشىلدىق – Led ەكرانى بار ونەر گالەرەياسى. مونۋمەنتتىڭ فويەسىنە گاباريتتى يىلگەن الىپ ەكراننان ەلىمىز تۋرالى مالىمەتتەرمەن تانىسۋعا بولادى. ال مونۋمەنتتىڭ ەڭ جوعارى قاباتىندا اسپاندا سامعاپ جۇرگەن اسپالى شام تۇرىندەگى سامۇرىق قۇستار كەلۋشىلەردىڭ نازارىن اۋدارارى ءسوزسىز.
ارينە, مۇمكىندىگى شەكتەۋلى جانداردىڭ دا كىرىپ-شىعۋ ماسەلەسى شەشىلگەن. قوناقتارعا قولايلى بولۋ ءۇشىن ارنايى كىرۋ بيلەتتەرىن ساتاتىن تەرمينالدار ورنالاستىرىلعان.
– ەلىمىزدىڭ باستى سيمۆولىنا كۇردەلى جوندەۋ جىلدىڭ باسىندا باستالدى. قانشاما جىلدان بەرى جوندەۋ كورمەگەن عيمارات ابدەن ەسكىرگەن بولاتىن. جۇمىس بارىسىندا ديزاينى مەن مازمۇنى وزگەردى. تۇستىك ۇيلەسىمى اق جانە التىن رەڭكتى بولىپ ساقتالدى. يتاليالىق تەحنولوگيامەن ازىرلەنگەن شىنى ۆيتراجدار قاقاعان اياز بەن اپتاپ ىستىققا ءتوزىمدى, – دەيدى «استانا-بايتەرەك» جشس ديرەكتورى مۇرات ساپارعاليەۆ. ونىڭ ايتۋىنشا, سىرتقى كەلبەتى ساقتالعانىمەن, ىشكى قۇرىلىم جاڭاردى.
بيلەت باعاسىنا كەلسەك, ۇلكەندەرگە – 700, بالالارعا – 300 تەڭگە.
گۇلميرا ايماعانبەت
