جاقىندا ەلوردالىق «ارلاندار» فۋتبول كلۋبى كارى قۇرلىققا تابان تىرەپ, پورتۋگاليانىڭ براگا قالاسىندا وتكەن ءداستۇرلى حالىقارالىق تۋرنيرگە قاتىسىپ قايتتى. وعان جاس ەرەكشەلىكتەرىنە قاراي 7 سانات بويىنشا 96 كوماندا قاتىستى. استانانىڭ عانا ەمەس, قازاقستاننىڭ اتىن شىعارىپ قايتقان كلۋبتىڭ جەتەكشىسى فازىلبەك ءابساتتارۇلى بىزگە بۇل تۋرالى كەڭىنەن ايتىپ بەردى.
– سۇراعىمىزدى توتەسىنەن قويساق, ءبىراز ەلدىڭ فۋتبول كلۋبتارىنىڭ باسىن قوسقان بەلگىلى براگا كۋبوگىنا قالاي قاتىسىپ جۇرسىزدەر؟
– قۇرىلعانىنا كوپ بولا قويماعان «ارلاندار» فۋتبول كلۋبى جەرگىلىكتى ءبىراز دوپ دودالارىنا قاتىسىپ, دارالانا باستادى. سودان تاۋەكەلگە بارىپ, فيفا, ۋەفا-نىڭ ءتيىستى ماماندارىنا, الەمنىڭ الپاۋىت فۋتبول كلۋبتارىنا تىكەلەي بايلانىسقا شىقتىم. ناتيجەسىندە پورتۋگاليانىڭ براگا كۋبوگى تۋرنيرىنە شاقىرتۋ الىپ, قاتىسىپ كەلدىك. براگا كۋبوگىنا 96 كوماندا قاتىستى. نەگىزىنەن كوماندالار ەۋروپا مەن لاتىن امەريكا ەلدەرىنەن كەلدى. جەتىستىگىمىز «ۇزدىك كوماندا» نوميناتسياسىمەن ماراپاتتالدىق.
بىلۋىمىزشە, وندا «استانا» فك-نان باسقا وسى كۇنگە دەيىن قازاقستاننان بىردە-ءبىر فۋتبول كلۋبى ات باسىن بۇرماپتى. ال جاسوسپىرىمدەر اراسىنداعى كلۋبتان مۇلدە ەشكىم كەلمەگەن.
العاشقى كۇندەرى قازاقستاندى بىلمەي قينالعان ەدى, سوڭىندا ءبارى بىزگە جانكۇيەر بولدى. ەستىمەگەن ەلى بولعاندىقتان با, اشىلۋ سالتاناتىندا بىزگە بۇكىل ستاديون اياقتارىنان تىك تۇرىپ قوشەمەت كورسەتتى. ايتپەسە بىزدەن بولەك, ەۋروپا, لاتىن امەريكا ەلدەرىنەن دە كلۋبتار كەلگەن ەدى. گازەتتەرى ءار نومىرىندە باسقا ەل ەمەس, تەك «ارلاندار» دەپ جازىپ جاتتى. حالقى دا بىزگە ەرەكشە قۇرمەت كورسەتىپ, بارلىعى كەزەككە تۇرىپ سۋرەتكە ءتۇستى.
جابىلۋ سالتاناتىندا ستاديوندا «قاراجورعانى» بيلەپ بەردىك.
– جالپى «ارلاندار» قاشان قۇرىلدى؟
– فۋتبول كلۋبىن قۇرۋدىڭ بارلىق ساتىلارىنان ءوتتىم. الدىمەن ءوز اۋلامدا دوپ تەۋىپ ءجۇرىپ, 5-6 بالا جينادىم. كەيىننەن كورشى اۋلانىڭ بالالارىن جيناپ, اۋلا كلۋبىن قۇردىم. ارتىنشا اۋلا كلۋبتارىنىڭ ليگاسىندا وينادىق. سوسىن «ارلاندار» فۋتبول كلۋبى» دەپ مەملەكەتتىك تىركەۋدەن وتكىزدىم. استانا قالالىق بىرىنشىلىگىنە قاتىستىق. وسىنىڭ بارلىعىنان سوڭعى 2 جىل ىشىندە ءوتتىم. رەسمي تىركەلگەن كۇنى – 2016 جىلدىڭ 4 جەلتوقسانى. كلۋبتا قازىر 30 بالا جاتتىعادى. سەبەبى بالالاردىڭ تۇراقتى قاتىسۋى قيىن. جازعى دەمالىسقا كەتىپ قالادى, ءجيى اۋىرادى دەگەندەي.
– پورتۋگاليا ساپارىنان قانداي ولجامەن ورالدىڭىزدار؟ تاجىريبە الماسۋ ءۇشىن كەلىسىمدەر جاسالدى ما؟
– ءبىرىنشى ولجامىز – «ۇزدىك كوماندا» نوميناتسياسى. ەكىنشىسى, «براگا سپورت», «براگالونا» فۋتبول كلۋبتارىمەن ءبىراز كەلىسىمدەر جاساستىق. پورتۋگاليا كاسىبي فۋتبول كلۋبىنىڭ پرەزيدەنتى ماريو كوستامەن كەزدەستىك. پورتۋگالياداعى جارىستارعا تۇراقتى تۇردە شاقىرتۋ, تاجىريبە الماسۋ, تاعى سول سياقتى بىرقاتار كەلىسىمگە كەلدىك. جوزە موۋرينە, لۋيش فيگۋ باعدارلامالارىمەن قازاقستاننىڭ بالالارىن دايىنداپ جاتساق, تاڭ قالماڭىزدار. ءبىزدىڭ ماقساتىمىز – الەمنىڭ فۋتبول نارىعىنا پورتۋگاليا ارقىلى الەم جۇلدىزدارىن شىعارۋ. بۇل – ءبىزدىڭ بالالارعا ۇلكەن ستيمۋل.
پورتۋگالياعا ساپارىمىزدان كەيىن فۋتبول تۋرالى كوزقاراسىمىز وزگەرىپ, فۋتبول مادەنيەتىنەن ءبىراز كوزىمىز اشىلدى. كلۋب باسشىلارىنان كوپ ەستىگەنىم, «كلۋبتىڭ يەسى – حالىق» دەيدى. كلۋبتىڭ تاعدىرىن جەرگىلىكتى حالىق شەشەدى ەكەن. كلۋب باسشىلارى جاي وزدەرىن ۇيىمداستىرۋشىلار رەتىندە سەزىنەدى.
ەندى 1 تامىز كۇنى پورتۋگاليادان دەلەگاتسيا ارنايى ات ارىتىپ كەلەدى. «ارلانداردىڭ» العا قويعان ماقساتى – ايقىن. تاعى ءبىراز جاقسى جاڭالىقتار بولادى. قالعانىن ازىرگە قۇپيا ۇستاي تۇرايىن.
ورىنبەك وتەمۇرات
