دوپ تەبۋگە اۋەس استانالىق بالالاردى كاسىبي فۋتبولعا باستاپ جۇرگەن كلۋبتاردىڭ ءبىرى – «ارلاندار». جاقىندا وسى كوماندا پورتۋگالياعا بارىپ, بەلگىلى «Braga Cup» تۋرنيرىنە قاتىسىپ قايتتى.
اتالمىش تۋرنير اتى ايتىپ تۇرعانداي 2018 جىلى ەۋروپانىڭ سپورت قالاسى اتانعان براگا قالاسىندا ءوتتى. دوپ دوداسىنا 13 جاسقا دەيىنگى بالالاردان جاساقتالعان 32 كوماندا قاتىستى.
استانانىڭ «ارلاندار» فۋتبول كلۋبى توپتىق كەزەڭنەن 2-ورىنمەن ىرىكتەلىپ شىقتى. تەك 1-ورىنمەن شىققان «براگالونا» كومانداسىنان 1:0 ەسەبىمەن جەڭىلدى. 1/8 فينالدان سۇرىنبەي ءوتىپ, شيرەك فينالدا ءتۋرنيردىڭ جەڭىمپازى بولعان ليسسابوننىڭ «بەلەنەنسەش» كلۋبىنا جول بەردى.
ءسويتىپ, «براگالونامەن» جولى تاعى ءتۇيىسىپ, نەگىزگى ۋاقىتتا 2:2 ەسەبىمەن اياقتالعان ويىن تاعدىرى پەنالتي سەرياسىندا شەشىلدى. ناتيجەسىندە «ارلاندار» 3:2 ەسەبىمەن جەڭىپ, 5-ورىندى يەلەندى.
«ارلاندار» كومانداسىن باستاپ بارعان فازىلبەك ءابساتتارۇلى بۇل جەتىستىكتى استانانىڭ 20 جىلدىعىنا ارنايتىندارىن جەتكىزدى. سونداي-اق, كلۋب پرەزيدەنتى بۇل ساپاردىڭ ەڭ باستى جاڭالىعى دەپ «ارلاندار» مەن «براگالونا» فۋتبول كلۋبتارى پورتۋگاليا-قازاقستان فۋتبول اسسوتسياتسياسىن قۇرۋ تۋرالى كەلىسىمگە كەلگەندەرىن اتادى. وعان قوسا, استانالىق ويىنشى اليجان احمەتوۆ «براگالونا» فۋتبول اكادەمياسىنا وقۋعا قابىلداندى.
