بۇگىن – بۇكىلالەمدىك بوكس سەرياسىنىڭ اقتىق باسەكەسى. جەتىنشى ماۋسىمنىڭ فينالىنا دەيىن سۇرىنبەي جەتكەن قوس كوماندا – «Astana Arlans» پەن «Cuba Domadores» قازاقستان سپورت كەشەنىندە WSB باس جۇلدەسىن ساراپقا سالادى.
«Astana Arlans» وسىمەن ءتورتىنشى رەت فينالدا ايقاسادى. ال بۇل – كۋبالىقتاردىڭ بەسىنشى فينالى. ەكەۋى وسىعان دەيىن مىقتى كوماندالارمەن كەزدەسىپ, مويىنداتتى.
شەشۋشى شايقاستان ءبىر كۇن بۇرىن وتكەن ءباسپاسوز ءماسليحاتىندا «استانا» پرەزيدەنت كلۋبىنىڭ اتقارۋشى ديرەكتورى استانادا وتەتىن بۇل فينالدى بوكس الەمىندەگى تاريحي ءسات بولاتىنىن جەتكىزدى.
ونىڭ ايتۋىنشا, WSB جەتىنشى ماۋسىمىنىڭ فينالى جاڭا فورماتتا وتەدى. ياعني, 10 سالماق سەرياسى بويىنشا كەزدەسۋلەردىڭ جەڭىمپازى ءبىر كۇننىڭ ىشىندە انىقتالماق.
– جىل سايىن WSB-ءنىڭ بۇل جوباسى ءوز جەمىسىن بەرىپ, دامىپ جاتقانىنا كۋا بولۋدامىز. وسى جىلى بۇكىلالەمدىك بوكس سەرياسىنداعى ەڭ ۇلى ەكى كوماندانىڭ جولدارى ەكىنشى رەت ءتۇيىسىپ وتىر. مەن بارلىق بوكسشىلارعا ساتتىلىك تىلەي وتىرىپ, جيىرما تالانتتى جىگىت جۇدىرىقتاساتىن وتە تارتىستى فينالدى تاماشالاۋدى تاعاتسىزدانا كۇتەمىن, – دەدى حالىقارالىق اۋەسقوي بوكس قاۋىمداستىعىنىڭ (AIBA) پرەزيدەنتى چينگ كۋو ۆۋ.
ون سالماق بويىنشا ءوزارا مىقتىلارىن انىقتايتىن شايقاسقا ارلانداردان ولجاس ساتتىباەۆ كوش باستاپ شىقسا, كۋبالىقتاردىڭ كاپيتانى – اتاقتى حۋليو لا كرۋس.
ورىنبەك وتەمۇرات
