قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ كەزەكتى وتىرىسىندا استاناداعى جاڭا كوشەلەردىڭ بىرىنە يۆان پانفيلوۆتىڭ ەسىمىن بەرۋ تۋرالى ماسەلە تالقىلاندى.
اتاقتى گەنەرال, كەڭەس وداعىنىڭ باتىرى اتىنا ەلوردادا كوشە بەرۋدى ەلباسى نۇرسۇلتان نازارباەۆ 2014 جىلعى 18 ساۋىردە وتكەن قازاقستان حالقى اسسامبلەياسىنىڭ جيىرما ءبىرىنشى سەسسياسىندا تاپسىرعان ەدى. وسى جونىندە ايتا كەلە, قالالىق ءتىلدەردى دامىتۋ باسقارماسىنىڭ باسشىسى ەربول تىلەشوۆ بۇل ماسەلەنىڭ ونوماستيكالىق كوميسسيا وتىرىسىندا قاراستىرىلىپ, قولداۋ تاپقانىن جەتكىزدى. حالىق قالاۋلىلارى دا بۇل ۇسىنىستى ءبىر اۋىزدان ماقۇلداعانىمەن, ەكىنشى ماسەلە بويىنشا كەلىسپەۋشىلىكتەر كوپ بولدى.
«2007-2012 جىلدارى زيالى قاۋىم جانە جالپى جۇرتشىلىق وكىلدەرىنەن, مەكتەپ ۇجىمدارىنان قالالىق ونوماستيكا كوميتەتىنە ەلورداداعى بىرنەشە ءبىلىم بەرۋ مەكەمەسىنە اتاۋ بەرۋ تۋرالى ون التى ۇسىنىس حات كەلىپ تۇسكەن. ولار ونوماستيكالىق كوميسسيانىڭ وتىرىستارىندا تالقىلانىپ, وڭ شەشىمىن تاپقان بولاتىن. بىراق جاڭا زاڭ تالاپتارىنا سايكەس, موراتوري جاريالانۋىنا, پرەزيدەنتتىڭ جارلىعىنا جانە ۇكىمەتتىڭ جۇمىس ءتارتىبىن رەتتەيتىن قاۋلىسىنا بايلانىستى رەسپۋبليكالىق ءتىل كوميتەتىنەن وسى ۇسىنىستاردى 2014 جىلمەن وزگەرتۋ تۋرالى حات كەلىپ ءتۇستى. سونىڭ نەگىزىندە اتالمىش كوميسسيا قالاداعى مەكتەپ ۇجىمدارىمەن بىرلەسە جۇمىس ىستەپ, ناتيجەسىندە بۇرىنعى قۇجاتتار جاڭارتىلىپ, جاڭا ۇسىنىستار قابىلداندى» دەگەن باسقارما باسشىسى استانانىڭ بىرقاتار مەكتەپتەرىنە جۇمابەك تاشەنوۆ, ىبىراي التىنسارين, ءنازىر تورەقۇلوۆ, احمەت بايتۇرسىنوۆ, قوشكە كەمەڭگەرۇلى, شاكارىم قۇدايبەردىۇلى سەكىلدى قازاقتىڭ تانىمال تۇلعالارىنىڭ ەسىمىن بەرۋ ماسەلەسىن دە العا تارتتى. بۇل رەتتە قالالىق ءماسليحاتتىڭ تۇراقتى كوميسسياسىنىڭ توراعاسى اباي بايگەنجين ۇلى جەڭىستىڭ 70 جىلدىعى قارساڭىندا وقۋ وردالارىنا وسى مەكتەپتەردە ءبىلىم العان ۇلى وتان سوعىسى باتىرلارىنىڭ ەسىمى لايىق ەكەنىن ەسكەرتسە, ءماسليحات حاتشىسى سانسىزباي ەسىلوۆ ءبىر ادامنىڭ ەسىمىمەن قازاقستاننىڭ بارلىق وڭىرلەرىندەگى كوشەلەرگە ات بەرۋدىڭ دۇرىس ەمەستىگىن, ءتىپتى, زاڭعا قاراما-قايشىلىعىن جەتكىزدى. دەپۋتاتتار وسى ماسەلەگە بايلانىستى الداعى ۋاقىتتا قوعامدىق تىڭداۋ وتكىزىپ, سوندا تالقىلاۋدى ۇسىندى.
ارينە, وتانىمىز بەن قالامىزدىڭ وركەندەۋىنە ءوز ۇلەستەرىن قوسقان, لايىقتى ەڭبەك ەتىپ, ادال ءومىر سۇرگەن, اتى اڭىزعا اينالعان ەرجۇرەك باتىرلار مەن قوعام قايراتكەرلەرىنىڭ, اقىن-جازۋشىلارىمىزدىڭ ەسىمى ەلەۋسىز, ەسكەرۋسىز قالماۋى ءۇشىن ولاردىڭ اتىنا كوشە بەرگەن ءجون. ويتكەنى, ەلگە تانىمال تۇلعالاردىڭ ەسىمدەرىن ارداقتاۋ – پارىز. دەگەنمەن, كوشە اتىن كىم بولسا, سول يەلەنبەۋى ءتيىس. وسىعان وراي, حالىق قالاۋلىلارى كوشەگە ات بەرۋ كەزىندە جەكەلەگەن ازاماتتاردىڭ پىكىرىمەن كەلىسە سالماي, قوعامدىق بىرلەستىكتەردەن, دەپۋتاتتاردان, قانداي دا ءبىر الەۋمەتتىك توپتىڭ مۇددەسىن قورعايتىن قۇرىلىمداردان تۇسكەن ۇسىنىستار عانا تالقىلانۋى كەرەك دەگەن ورتاق پىكىرگە توقتادى.
گۇلبارشىن وكەشقىزى
