«دۋمان» ويىن-ساۋىق ورتالىعىندا «كەدەرگىسىز كەلەشەك» جوباسى اياسىندا بالالار ءۇيىنىڭ تاربيەلەنۋشىلەرىنە ارنالعان ەكسكۋرسيا جانە جاڭا فورماتتاعى 3D سۋرەتتەرىنىڭ تۇساۋكەسەرى ءوتتى. شارانىڭ ۇيىمداستىرىلۋىنا ەسىل اۋدانى اكىمدىگى, «جاس وتان» جاستار قاناتىنىڭ استانا قالالىق فيليالى, ەلوردالىق جاستار ءماسليحاتى جانە «دۋمان» ويىن-ساۋىق ورتالىعى ۇيىتقى بولدى.
كوڭىلى جارىم جەتكىنشەكتەرگە بارىنشا كوتەرىڭكى كوڭىل-كۇي سىيلاپ, ولاردىڭ ومىرگە دەگەن قىزىعۋشىلىعىن ارتتىرۋعا, ينتەللەكتۋالدىق دامۋىن جەتىلدىرۋ, سانا-سەزىمدەرىن جوعارىلاتۋعا باعىتتالعان شارا ۇدەسىنەن شىقتى. بالالار الدىمەن سويلەيتىن اعاش پەن جىلاننىڭ ورتالىقتى تانىستىرۋىن تاماشالاپ, مۇحيتارال مەن جۋنگلي جايىندا مالىمەت الدى. ەستەلىك ءۇشىن سۋرەتكە ءتۇسىپ, جاڭا فورماتتاعى 3D سۋرەتىنە كۋا بولدى. شارانىڭ باستى جاڭالىعى دا سول – استاناعا گولليۆۋدتەن اكەلىنگەن «Dance heads» دەپ اتالاتىن ەكى قۇرىلعىنىڭ ءبىرى وسى ورتالىقتا ورنالاسقان.
ۇيىمداستىرۋشىلار كىشكەنتاي بۇلدىرشىندەرگە ولاردىڭ تۇسكەن سۋرەتتەرىن جيەكتەمەگە سالىپ, سىيلادى. ءتاتتى بالمۇزداقتان ءدام تاتىپ, قىزىقتى ترەنينگتەرگە قاتىسقاننان كەيىن بالالار بالىقتاردىڭ ءتۇر-ءتۇرىن كەزىكتىرۋگە بولاتىن مۇحيتارالدى قىزىقتادى.
«ءبىز ەرتەدەن «جەتىم كورسەڭ, جەبەي ءجۇر» دەگەن اتالى ءسوزدى بويعا تەرەڭ ءسىڭىرىپ وسكەن حالىقپىز. جەتىم بالالار اتا-انانىڭ مەيىرىمىنەن ايىرىلىپ قانا قويماي, ءومىردىڭ اۋىر سىنىن باستان وتكەرەدى. ونداي جاندارعا قول ۇشىن بەرۋ – ءبىزدىڭ بورىشىمىز. سوندىقتان ولارعا قوعام نازارىنان تىس قالماعانىن اڭعارتىپ, قوعامدىق ورتاعا باۋلۋ ءۇشىن شارا ۇيىمداستىرىپ وتىرمىز» دەيدى «جاس وتان» جاستار قاناتى استانا قالالىق فيليالىنىڭ مامانى سەۆارا ساتىبالدينا.
ايگۇل وزەكوۆا
