ەلورداداعى ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اۋماعىندا «اسكەر ەسىرتكىگە قارسى, ءبىز ەسىرتكىگە قارسىمىز!» اتتى اكتسيا ءوتتى. ايتۋلى شارا اياسىندا الماتى اۋدانىنان شاقىرىلعان قىرىققا جۋىق ءبىر توپ جاستى وتان الدىنداعى بورىشىن ادال اتقارۋعا سالتاناتتى تۇردە شىعارىپ سالدى.
– بۇگىن ءبىز ءۇشىن ەرەكشە كۇن. ويتكەنى, ءدال «وتان قورعاۋشىلار كۇنى» مەرەكەسىندە اسكەرگە شاقىرىلعان ازاماتتاردى شىعارىپ سالىپ تۇرمىز. وسىنداي يگىلىكتى شارا اياسىندا «اسكەر ەسىرتكىگە قارسى, ءبىز ەسىرتكىگە قارسىمىز!» اتتى اكتسيا ءوتۋىنىڭ دە تاعىلىمدىق ءمانى بار. ەلدىڭ بولاشاعى – جاستار. سوندىقتان ولار جامان ادەتتەن اۋلاق بولعان ءجون. بۇگىنگى جاس قۇراقتاي جەلكىلدەپ ءوسىپ كەلە جاتقان جەتكىنشەكتەر اسكەرگە اتتانىپ بارا جاتقان اعالارىنان ۇلگى الىپ, سولار سەكىلدى وتانسۇيگىشتىك رۋحتى بويعا ءسىڭىرىپ ءوسسىن دەمەكپىن. بارلىقتارىڭىزدى مەرەكەلەرىڭىزبەن شىن جۇرەكتەن قۇتتىقتايمىن, – دەدى الماتى اۋدانى اكىمىنىڭ ورىنباسارى قاسىمحان سەنعازيەۆ. ودان كەيىن «پراۆو» قوعامدىق قورىنىڭ توراعاسى ولگا رىل ءسوز الدى.
جالپى, عاسىر دەرتى دەپ اتالاتىن كەسەلگە, اسىرەسە 14 پەن 27 جاس اراسىنداعى جاستار ۇيىرسەك ەكەن. دەرەكتەرگە شولۋ جاساپ وتسەك, وتكەن جىلى ەلىمىز بويىنشا ەسىرتكىنى مەديتسينالىق ەمەس تۇتىنۋعا جول بەرگەن ادامداردىڭ سانى 31 049-دى قۇراعان. ولاردىڭ ىشىندە ايەلدەر مەن كامەلەتكە تولماعاندار – 2 499 بولسا, ەر ازاماتتار 28 850-گە جەتكەن. وسى اتالعانداردىڭ بارلىعى ىشكى ىستەر ورگاندارى مەن دەنساۋلىق ساقتاۋ بولىمدەرىنە رەسمي تۇردە تىركەلگەن. وسىدان-اق, ايتارى بار اكتسيانىڭ جاستار ءۇشىن دە, جاسامىس ءۇشىن دە ءمانى زور ەكەنىن اڭعارۋعا بولادى.
ازامات ەسەنجول
