الەم چەمپيوناتىنىڭ اشىلۋ سالتاناتى وتكەننەن كەيىن بىردەن رەسەي – ساۋد ارابياسى قۇرامالارى اراسىنداعى ماتچ باستالدى. ول الاڭ يەلەرىنىڭ 5:0 ەسەبىمەن ءىرى جەڭىسكە جەتۋىمەن اياقتالدى. بۇل ەكى جاق ءۇشىن دە مۇلدەم كۇتپەگەن ناتيجە بولعاندىقتان, ولاردىڭ اربىرىنە تۋرا اسپان اينالىپ جەرگە تۇسكەندەي ەكى ءتۇرلى كوڭىل-كۇي اۋانىندا اسەر ەتتى.
رەسەي قۇراماسىنىڭ باس جاتتىقتىرۋشىسى ستانيسلاۆ چەرچەسوۆ بۇل ءماۋرىتتىڭ ناعىز مەرەكەلىك ۇمىتىلماس سيپاتتا بولۋى ءۇشىن قولدان كەلگەنىنىڭ ءبارىن جاساپ باقتى. ول بۇل ءۇشىن مۇنىڭ الدىندا تۇركيا تەرمە جاماعاتىمەن وتكەن باقىلاۋ جولداستىق كەزدەسۋىندەگى ستارتتىق قۇرامدى سول قالپىندا دەرلىك ساقتاپ قالىپ, تەك قورعانىستىڭ وڭ قاپتالىندا يگور سمولنيكوۆتىڭ ورنىنا ماريو فەرناندەستى جىبەرۋ ارقىلى ءبىر عانا وزگەرىس جاسادى. ورتالىق قورعانىس شەبىندە سەرگەي يگناشەۆيچ پەن يليا كۋتەپوۆ جۇپ قۇردى. شابۋىلدىڭ وتكىر شەگىندە فورۆارد فيودور سمولوۆ ورىن الدى دا, جارتىلاي قورعاۋشى الان دزاگوەۆ وعان دوپ جەتكىزىپ بەرۋشىنىڭ مىندەتىنە جەگىلدى. ال حۋان انتونيو پيتستسي مۋنديالدىڭ ىرىكتەۋ تۋرنيرىندەگى ەڭ ۇزدىك مەرگەندەرىنىڭ ءبىرى موحامماد ءال-ءساحلاۆيدىڭ ءوزىن عانا العا شىعارىپ, سوڭعى كەزدەرى ونىمەن جاقسى تاندەم قۇرىپ قالعان ەكىنشى شابۋىلشى فاحاد ءال-مۋۆاللادتى زاپاستا ۇستاپ قالۋىمەن تاڭعالدىردى.
ءبىر عاجابى, الاڭ يەلەرىنىڭ ويىنىندا ونىڭ قورىتىندىسىنا قاۋىپ قانا ەمەس, ءتىپتى داق تۇسىرەتىندەي دە كەمشىلىك بولعان جوق. كوماندا ويىنشىلارى ماتچتىڭ باسىنان اياعىنا دەيىن ءبىر دەممەن, ءبىر ىرعاقپەن ويناپ, ابدەن سۇرگىلەنىپ قالىپتاسقان ۇيلەسىمدى ويىننىڭ ۇلگىسىن كورسەتتى. سونىڭ ناتيجەسىندە ساۋديالىقتار ۇشىراسۋ بارىسىندا بىردە-ءبىر رەت رەسەيلىكتەر قاقپاسىنا قاراي تۋرالاپ دوپ سوعا المادى. تەك ەكىنشى تايمدا جالقى مارتە عانا داربازانىڭ سول جاق باعانى جانىنان ءبىر دوپ اقىرىن زىرىلداپ وتە شىقتى… بار بولعانى سول!
قالعان ۋاقىتتىڭ بارىندە تۋرنير تورەلەرى قارسىلاستارىنا دەس بەرمەدى. ولار العاشقى بۇرىشتاما دوبىن 3-مينۋتتا بەرىپ ۇلگەردى. بۇدان ارى الاڭ يەلەرى جاپپاي جانە جان-جاقتى پرەسسينگ جاساۋعا كوشتى. «سۇڭقارلار» سونىڭ وزىندە بۇلاردىڭ شەبىنە قاراي ءۇزىلىپ كىرۋدىڭ جولىن تاۋىپ جاتتى. بىراق ولاردىڭ ءبارىن قورعانىس شەبىنىڭ جىگىتتەرى تەز قايتارىپ, قاتەردىڭ بۇلتىن دەمدە سەيىلتىپ تۇردى. وسى ارالىقتا رەسەيلىكتەر ەكى قاناتتان كەزەكتەسە ۇيىمداستىرعان جويقىن جورىقتار ساۋديالىقتاردىڭ قورعانىس شەبىن قايتا-قايتا سەتىنەتىپ كەتە بەردى. سونىڭ بىرىندە, 9-مينۋتتا الەكساندر گولوۆين سول قاپتالمەن كەلىپ, ايىپ الاڭىنا كىرىپ, دوپتى يۋري جيركوۆقا جەتكىزدى. بىراق ونىڭ قاقپاعا باعىتتاعان سوققىسى قوناقتار ويىنشىسىنا ءتيىپ, كەرى قايتتى. بۇدان كەيىن كوپ ۇزاماي, رومان زوبنين قارسىلاستاردىڭ بىرىنەن دوپتى تارتىپ الىپ, ونى الدا تۇرعان الان دزاگوەۆقا ۇزاتتى. بۇدان كەيىن كەزەكتى بۇرىشتاما بەرۋگە قول جەتتى. ال جيركوۆتىڭ بۇرىشتان بەرگەن دوبىن گولوۆين الاڭ ورتاسىنا اۋەلەتە جەتكىزدى دە, ونى يۋري گازينسكي باسپەن قاقپاعا تۋرا باعىتتادى. گول!
كەزدەسۋدىڭ ورتاسىنا قاراي چەرچەسوۆ كۇتپەگەن جەردەن جاراقات الىپ قالعان دزاگوەۆتىڭ ورنىنا دەنيس چەرىشەۆتى الاڭعا شىعارۋعا ءماجبۇر بولدى. بۇل الماسۋدىڭ وتە ءساتتى جاسالعانىن كەيىنگى ۋاقىت كورسەتتى. ويىنعا كىرگەن بويدا بەلسەندى قيمىلعا كوشكەن دەنيس ونىڭ اقىرىنا دەيىن دۋبل جاساپ, كومانداسىنىڭ ءىرى جەڭىسىنە ۇلكەن ۇلەس قوستى. ول ويىنداعى ەكىنشى گولدى 43-مينۋتتا ءوزى ءتۇسىردى. بۇعان ءزوبنيننىڭ بەرگەن پاسى جول سالىپ بەردى. رەسەيلىكتەر بۇل جولى ارابتاردى قارسى شابۋىل كەزىندە ادەمى ۇستادى.
ماتچتىڭ 50-مينۋتىندا رەسەيلىكتەر تاعى قاۋىرت قارسى شابۋىل ۇيىمداستىردى. ونىڭ سوڭى سمولوۆتىڭ سوققىسىنان سوڭ بۇرىشتاما بەرۋگە ۇلاستى. بىراق الەكساندر سامەدوۆ وتە قولايلى نۇكتەدەن دوپتى ماڭدايشانىڭ ۇستىنەن جونەلتتى. وسىدان كەيىن الاڭ يەلەرىنىڭ ۇزاق ۋاقىتقا سوزىلعان پوزيتسيالىق شابۋىلدارىنا ازەر توتەپ بەرىپ تۇردى. ال 70-مينۋتتا سمولوۆتىڭ ورنىنا شىققان ارتيوم دزيۋبا سول بويدا ءۇشىنشى گولدى قاقپاعا سۇڭگىتىپ جىبەردى. قاپتالدان دوپ لاقتىرعان زوبنين ونى گولوۆينگە جەتكىزدى, ال الەكساندر وڭ قاناتتان قاقپا الاڭىنا قاراي زاۋلاتتى. مىنە, سول جەردە ارتيوم ونى باسىمەن قاقپاعا ءدال ءتۇسىردى.
ءۇشىنشى گولدان كەيىن ساۋديالىقتار قارسىلاسۋلارىن توقتاتتى دەسە بولعانداي. ولار 73-مينۋتتا ءبىر رەت الىستان سوققى جاساعاندارى بولماسا, ەندى قاقپا ماڭىنا جاقىن كەلە المادى. مۇنىڭ ەسەسىنە, 86-مينۋتتا الاڭ يەلەرى تاعى ءبىر گول سوعىپ كەتە جازدادى. سول شابۋىلدىڭ شاپقىنى الاڭداعى ارگەنتينالىق تورەشى حۋان پابلو بەلاتتيدىڭ اقىرعى ىسقىرىعى ەستىلگەنشە باسىلعان جوق. بۇل ەكى ارالىقتا ولار ەكى گول سوعىپ, ەسەپتى ناعىز كۇيرەۋ دارەجەسىنە جەتكىزدى. الدىمەن, قوسىمشا 1-مينۋتتا دزيۋبادان پاس العان چەرىشەۆ گول سوقسا, 4-مينۋتتا بۇعان دەيىن 2 گولعا اسسيستەنت بولعان گولوۆين سوڭعى نۇكتەنى قويدى.
كەشە, 15 ماۋسىم كۇنى كەشكە ەگيپەت – ۋرۋگۆاي, يران – ماروككو, پورتۋگاليا – يسپانيا قۇرامالارى كەزدەستى.
سەرىك ءپىرنازار
