وتكەن دەمالىس كۇندەرى تورتكۇل دۇنيەدەگى ترياتلون جانكۇيەرلەرى استاناعا كوز تىكتى. قازاق ەلورداسىنا جينالعان سايىپقىران سپورتشىلاردىڭ ەرلىككە ءتان باسەكەسىن تاماشالاۋدىڭ ءساتى ءتۇستى.
بايراقتى جارىس ايەلدەر اراسىنداعى سايىسپەن باستالدى. بىراق بۇل جولى اۋا رايىنا بايلانىستى ترياتلوننىڭ باعدارلاماسى قىسقارىپ, ارۋلار دۋاتلونعا قاتىستى. ولاي بولاتىنى, حالىقارالىق ترياتلون فەدەراتسياسى ەسىل وزەنى سۋىنىڭ تەمپەراتۋراسى بەلگىلى مولشەرلەمەدەن جوعارى بولعاندىقتان, باعدارلامانىڭ ءجۇزۋ ەتاپى الىنىپ تاستالدى. سوندىقتان قىزدار جاعى 10 شاقىرىمعا جۇگىرۋمەن جانە 40 شاقىرىمعا ۆەلوسيپەدپەن جارىسۋمەن شەكتەلدى.
وتە تارتىستى ءارى قىزىقتى وتكەن جارىستا فرانتسيا سپورتشىسى ساندرا دودي مارە سىزىعىن ءبىرىنشى بولىپ كەستى. كۇمىس جۇلدەنى دە چەمپيوننىڭ وتانداسى ەميل مۋرە يەلەندى. ۇزدىك ۇشتىكتى يتاليا ارۋى انجەليكو ولمو تۇيىندەدى. بارلىق جۇلدەگەرلەردىڭ ەسەبىنە الەم كۋبوگى كورسەتكىشتەرى تىركەلدى.
كۇشتى, شىدامدىقتى, مىقتى جۇيكەنى تالاپ ەتەتىن ترياتلون سايىسىنا قازاقستان اتىنان سىنعا تۇسكەن اناستاسيا اۆتۋشكو جاياۋ جۇگىرۋدە دە, ۆەلوجارىستا دا كوش سوڭىنان عانا كورىنىپ ءجۇردى. ءبىز جالعىز ءۇمىتىمىز, ەڭ باستىسى, مارەگە دەيىن جەتسە ەكەن دەپ تىلەگەن-اق ەدىك. الايدا بۇل ويىمىز دا جۇزەگە اسپاي قالدى. اۆتۋشكو جارىس جولىنان شىعىپ كەتتى.
ال ەرلەر اراسىنداعى جارىستا ناعىز تارتىستى باسەكەنى كوردىك. الدىمەن 10 كيلومەترگە جۇگىرىپ, ودان ءارى ۆەلوسيپەدتى ەرتتەپ مىنگەن جىگىتتەر 40 شاقىرىمعا زۋلادى. ەڭ قىزىقتى باسەكە ەسىلدەگى 1500 مەترگە ءجۇزۋ بولدى.
بۇل جارىستا رەسەي سپورتشىسى دميتري پوليانسكي ناعىز جانكەشتىلىك تانىتتى. ول ەكى باعدارلاما بويىنشا نەگىزگى قارسىلاستارىنان ەداۋىر قالىپ كەلگەن ەدى. الايدا ءۇشىنشى اينالىمدا سەرپىلىپ شىعا كەلدى. ءسويتىپ, الەم كۋبوگى كەزەڭىنىڭ جەڭىمپازى اتاندى. اۆستراليا وكىلى مارسەل ۋولكينگتون مارەگە ەكىنشى بولىپ جەتسە, ءۇشىنشى ورىنعا فرانتسۋزدىق رافاەل ورەليانال يە بولدى. ال ءبىزدىڭ وتانداسىمىز سەمەن پيۆوۆاروۆ مارەگە تەك 55-ءىنشى بولىپ جەتتى.
جالپى, استانا ەتاپىندا 38 مەملەكەتتەن 130 اتلەت باعىن سىنادى.
الەم كۋبوگى اياسىندا قازاقستان كۋبوگىنىڭ ەكىنشى ەتاپى دا ءوتتى. ەرلەر اراسىندا دميتري ليبەر جەڭىمپاز اتانسا, ايەلدەر باسەكەسىندە سالتانات قازىباەۆا توپ جاردى.
سونداي-اق, اۋەسقوي ترياتلونشىلار اراسىندا دا Aqe Group جارىسى ۇيىمداستىرىلدى. بۇل سىنعا ۇلكەندەرمەن قاتار كوپتەگەن بالالار قاتىسقانىن ايرىقشا اتاپ وتكىمىز كەلەدى. بارلىق قاتىسۋشىلارعا ۇيىمداستىرۋشىلار اتىنان ەستەلىك سىيلىقتار تابىس ەتىلدى.
