ەلوردالىق «استانا» باسكەتبول كلۋبى ءوز تاريحىندا العاش رەت ازيا چەمپيوندار كۋبوگىندا قولا جۇلدەگە قول جەتكىزدى.
حالىقارالىق باسكەتبول فەدەراتسياسى (FIBA) اياسىندا قىتايدىڭ چەنچجوۋ قالاسىندا وتكەن تۋرنيرگە ازيا قۇرلىعىنىڭ 10 كلۋبى قاتىستى. بارلىعى ەكى توپقا ءبولىنىپ باق سىنادى.
«استانا» كومانداسى «ا» توبىنان 3 جەڭىس, 1 جەڭىلىسپەن كوش باستاپ شىقتى. ولار شيرەك فينالدا ءباا ەلدەرىنىڭ «ال-احلي» كومانداسىمەن ويناپ, 83:53 ەسەبىمەن باسىم ءتۇستى.
ال جارتىلاي فينالدا جەرگىلىكتى «شىڭجاڭ» كومانداسىنا ەسە جىبەرىپ قويدى. ويىننىڭ باسىن ءساتتى باستاعان «استانا» شەشۋشى ساتتە جەڭىستى ۋىسىنان شىعارىپ الدى. ەسەپ – 70:79.
ءسويتىپ, ەلوردالىقتار ءۇشىنشى ورىن ءۇشىن بولعان كەزدەسۋدە يراندىق «پەتروحيم» كومانداسىن 81:78 ەسەبىمەن جەڭىپ, ابىرويى استى. «استانا» ءۇشىنشى اينالىمدا عانا قارسىلاسىمەن تەڭ ءتۇسىپ, قالعانىنىڭ بارىندە ءبىر ءباس جوعارى بولدى.
اقتىق سايىستا ليۆاندىق «ءال ريادي» قىتايلىق «شىڭجاڭ» كومانداسىن 88:59 ايقىن باسىمدىقپەن جەڭىپ, چەمپيون اتاندى.
امانبەك
كۋلچيكوۆ,
«استانا» پرەزيدەنت
كلۋبىنىڭ
اتقارۋشى
ديرەكتورى:
– بۇل – ءبىزدىڭ ەڭ العاشقى جۇلدەمىز. تۋرنيرگە ازيا ەلدەرىنىڭ چەمپيوندارى قاتىستى. سولاردىڭ ىشىنەن «استانا» وسىنداي ناتيجەسىمەن ەلوردامىزدىڭ عانا ەمەس, ەلىمىزدىڭ دە اتىن شىعاردى. ەندى كوماندا ەلىمىزگە ورالعان سوڭ 5 قازان كۇنى سالتاناتتى تانىستىرۋ ءراسىمىن وتكىزۋ جوسپارلاپ وتىرمىز. ال 8 قازان كۇنى «تسسكا» كومانداسىن قابىلدايمىز. ماۋسىمنىڭ باسىندا وسىنداي مىقتى قارسىلاس تاپ كەلىپ تۇر. ءوز الاڭىمىزدا جاقسى ويىن كورسەتۋگە تىرىسامىز.
