22-23 قىركۇيەكتە استاناداعى «بارىس-ارەنا» ستاديونىندا «استانا-باستاۋ. بيزنەس اۋماعى» دەگەن اتاۋمەن تۇڭعىش ينۆەستيتسيالىق جانە كاسىپكەرلىك فورۋمى ءوتتى.
ونى ۇيىمداستىرعان – استانا اكىمدىگى, «استانا» الەۋمەتتىك-كاسىپكەرلىك كورپوراتسياسى جانە «سينەرگيا» بيزنەس مەكتەبى. بۇل شارانىڭ نەگىزگى ماقساتى – زاماناۋي ترەندتەردى ەسكەرە وتىرىپ, ەلوردامىزداعى بيزنەستىڭ مۇمكىندىكتەرىن كورسەتۋ جانە كاسىپكەرلەردىڭ ءوز ءىسىن العا جىلجىتۋىنا مۇمكىندىك تۋعىزۋ.
فورۋمنىڭ جۇمىسىنا ەلىمىزدىڭ بارلىق وڭىرلەرىنەن كەلگەن 16 مىڭنان اسا كاسىپكەر قاتىستى. ولار بيزنەستى دامىتۋدىڭ ءارتۇرلى باعىتى بويىنشا وتاندىق جانە شەتەلدىك ساراپشىلاردىڭ, كومپانيا جەتەكشىلەرىنىڭ ءدارىسىن تىڭدادى. بيزنەس-باپكەرلەر قازىرگى كەزدەگى بيزنەس-ترەندتەر, كومپانيانى دامىتۋدىڭ ءتيىمدى جولدارى جونىندە اڭگىمەلەدى. ءبىر سوزبەن ايتساق, ىنتالاندىرۋدى ماقسات تۇتقان باسقوسۋدا قازاقستاندىق جانە شەتەلدىك كوشباسشى-كاسىپكەرلەر ءوز تابىسىنىڭ قۇپياسىمەن ءبولىستى.
فورۋمنىڭ العاشقى كۇنى نەتۆوركينگ بويىنشا مويىندالعان ساراپشى گيل پەتەرسيل, تانىمال ەكونوميست, «بيزنەس ۆ ستيلە فانك» اتتى بەستسەللەردىڭ اۆتورى كەلل نوردسترەم, قىتايمەن ساۋدا-ساتتىق جاساۋدا ەڭ جوعارى جەتىستىكتەرگە جەتكەن دميتري كوۆپاك, «سينەرگيا» حولدينگىنىڭ نەگىزىن قالاۋشى جانە اتقارۋشى ديرەكتورى ۆاديم لوبوۆ, «Rimi Group» مەيرامحانالار جەلىسىنىڭ قوجايىنى قۋانىش شونباي, بەلگىلى بوكسشى, 2005-2007 جىلدارداعى الەم چەمپيونى سەرىك ساپيەۆ, گيننەسستىڭ رەكوردتار كىتابىنا 7 رەت كىرگەن جەلاياق مارات جىلانباەۆتار ءدارىس وتكىزدى.
