استانا قالاسى بويىنشا قاي مەكەمەنى چەمپيوندار ۇستاحاناسى دەپ سۇراساڭىز – «استانا باتىرى» جەكپە-جەك كلۋبى دەپ ايتۋعا ابدەن بولادى.
استانا قالاسىنىڭ تۋريزم, دەنە تاربيەسى جانە سپورت باسقارماسى جانىنان قۇرىلعان «استانا باتىرى» جەكپە-جەك كلۋبى» مەملەكەتتىك كوممۋنالدىق قازىنالىق كاسىپورنى تەك قانا ەلوردا سپورتىنىڭ ابىرويىن كوتەرەتىن سپورتشىلاردى دايارلاپ قويماي, حالىقارالىق جارىستاردا قازاقستان نامىسىن قورعاپ جۇرگەن سايىپقىرانداردى دا ازىرلەيتىن بىردەن-ءبىر سپورت مەكەمەسى بولىپ وتىر.
تاجىريبەلى سپورت مامانى ابدىعاقار ابدراحمانوۆ باسقاراتىن اتالمىش كلۋبتا 11 سپورت ءتۇرى بويىنشا جۇيەلى جۇمىستار جۇرگىزىلۋدە. ولاردىڭ ىشىندەگى التاۋى وليمپيادالىق سپورت تۇرلەرىن قامتىسا, قالعاندارى ۇلتتىق جانە باسقا دا جەكپە-جەك تۇرلەرى بويىنشا جاتتىعۋلار جۇرگىزەدى.
قازىر كلۋبتا 1000-نان استام سپورتشى تاربيەلەنەدى. مۇنداعى جۇمىستىڭ نەگىزى جاسوسپىرىمدەردى شىنىقتىرۋعا باعىتتالعان, سونىمەن قاتار جوعارى دارەجەدەگى سپورتشىلاردى دايىنداۋعا اسا ماڭىز بەرىلەدى. وسىنداعى باپكەرلەردىڭ قول استىندا 6 قازاقستاننىڭ ەڭبەك سىڭىرگەن سپورت شەبەرى, 23 حالىقارالىق دارەجەدەگى سپورت شەبەرى جانە 75 سپورت شەبەرى جاتتىعۋ جۇرگىزەدى. بۇلاردىڭ كوپشىلىگى قازاقستان ۇلتتىق قۇراما ساپىندا ونەر كورسەتەدى. ماسەلەن, بوكستان الەم چەمپيونى دانيار ەلەۋسىنوۆ, ازيا ويىندارىنىڭ جەڭىمپازى ءىلياس سۇلەيمەنوۆ, بۇگىندە ريو-دە-جانەيرو وليمپياداسىنا جولداما الىپ وتىرعان ۆاسيلي لەۆيت, مەيىرىم نۇرسۇلتانوۆ, دزيۋدوشىلار تيمۋر بولات, ۇلتتىق قۇرامانىڭ بالۋاندارى دوسجان كارتيكوۆ, ساياتبەك وقاسوۆ, المات كەبىسباەۆ, نۇرلان بەكجانوۆ, گيۋزەل مانيۋروۆا, تاتيانا امانجول جانە باسقا دا بەلگىلى سپورتشىلار بار. مىنە, وسىنداي سايىپقىراندارعا قاراپ, ەلىكتەپ وسكەن بالالار دا كەلەشەكتە ەل نامىسىن قورعايتىن سپورتشى بولۋعا قۇلشىنىپ جاتتىعادى.
ارينە, جاقسى سپورتشى بولۋ ءۇشىن بىلىكتى باپكەرلەر كەرەك. بۇل رەتتە «استانا باتىرى» جەكپە-جەك كلۋبى» مكقك ديرەكتورى ادىعاقار ابدراحمانوۆ اسەرلەپ اڭگىمەلەپ بەردى.
– قاي سپورتتا بولسىن جەڭىستەرىمىز ءۇشىن الدىمەن باپكەرلەرگە العىس ايتۋىمىز كەرەك. تالانتتىڭ كوزىن اشاتىن دا, جارىسقا باپتايتىن دا باپكەر عوي. سوندىقتان باپكەردىڭ شەبەرلىگىنە دە اسا ءمان بەرۋ كەرەك دەپ ويلايمىن. بۇل رەتتە ءبىزدىڭ مەكەمەدە جاس سپورتشىلاردى تاربيەلەپ جۇرگەن باپكەرلەردىڭ ءبارىن ءوز ءىسىنىڭ بىلىكتى باپكەرى دەپ باعالايمىن. اتاپ ايتسام, قازاقستاننىڭ ەڭبەك سىڭىرگەن جاتتىقتىرۋشىلارى: بوكستان مارات ەلەۋسىنوۆ, جانات جانە مارات ماناشەۆتار, اقىلبەك نۇرماعانبەتوۆ, گرەك-ريم كۇرەسىنەن رىسبەك نۇرعازين, مەيىرحان راحمەتوۆ, ۇلتتىق سپورت ءتۇرى قازاق كۇرەسىنەن عالىم كۇلەكەشەۆ, ەرلان ەستەك, سامبودان اعزام نازاروۆ, ءابۋتالىپ سىزدىقوۆ, كيكبوكستان تاليپ فاحرۋتدينوۆ, ءنۇربولات رىسماعانبەتوۆ. سونىمەن قاتار گرەك-ريم كۇرەسىنەن وليمپيادا ويىندارى مەن الەم بىرىنشىلىگىندە توپ جارعان گەورگي تسۋرتسۋميا, «قازاقستان بارىسى» ءتۋرنيرىنىڭ قولا جۇلدەگەرى, الەم چەمپيونى عاني سەيدىلداەۆ جانە حالىقارالىق سايىستاردا تورەشىلىك ەتىپ جۇرگەن احات اشيروۆ, باۋىرجان شادرايموۆ, ايدىن سارسەكەەۆ, داۋرەنبەك شامىراتوۆ سەكىلدى جاتتىقتىرۋشى ماماندار بار.
جالپى اتالمىش كلۋبتا 58 وقىتۋشى-باپكەر جۇمىس ىستەيدى. ولاردىڭ ىشىندەگى 31-ءى – جوعارى دارەجەلى ماماندار.
ءيا, مەكەمە باسشىسىنىڭ سوزىندە جان بار. شىنىمەن دە, كوبىنەسە جەڭىسكە جەتكەن سپورتشىعا ايرىقشا ماراپات پەن قۇرمەت كورسەتىپ جاتامىز. ال سول سپورتشىنى جۇلدىزعا اينالدىرعان باپكەردى نەگە ۇمىتامىز؟ سوندىقتان باپكەردىڭ دە ەڭبەگىن باعالاي بىلگەنىمىز ءجون.
«استانا باتىرى» كلۋبى سوڭعى جىلدارى ەلوردا سپورتىنىڭ جاندانۋىنا ايتارلىقتاي ۇلەس قوسىپ جۇرگەن مەكەمە دەسەك تە جاراسادى. جەكپە-جەك تۇرلەرى بويىنشا وتكىزىلەتىن رەسپۋبليكا چەمپيوناتتارىنان ەڭ كوپ جۇلدە الاتىن دا وسى كلۋب سپورتشىلارى بولىپ وتىر. ماسەلەن, ءبىر عانا قازاق كۇرەسى سپورتىن الساق, بيىل بىرنەشە ءىرى تۋرنيرلەردەن جۇلدە الىندى. اتاپ ايتقاندا, وسى كلۋبتىڭ قوس بالۋانى عاني سەيدىلداەۆ پەن ايبات سەيتەن ەلوردا بىرىنشىلىگىندە اقتىق بەلدەسۋگە شىقتى. عاني بالۋان «قازاقستان بارىسى» تۋرنيرىندە قولا مەدال يەلەنىپ, ەلباسى قولىنان جۇلدە الدى. ال جاقىندا وتكەن ازيا چەمپيوناتىندا كلۋبتاس ارىپتەسى باقداۋلەت ءسابيتوۆ ەكەۋى چەمپيون اتانىپ كەلدى. سونداي-اق, كۇنى كەشە كيكبوكسشىلار ازامات تۋياناشەۆ پەن شىڭعىس تىلەمىسوۆ قۇرلىق بىرىنشىلىگىنەن التىن مەدال اكەلدى.
تۇپتەپ ايتقاندا, ەلوردا سپورتىنىڭ ابىرويىن اسقاقتاتىپ تۇرعان «استانا باتىرى» جەكپە-جەك كلۋبىنىڭ جەڭىستى ءداستۇرى ۇزىلمەي, جاڭا بەلەستەرگە ورلەي بەرسىن دەمەكپىز.
