«قازاقستان» ورتالىق كونتسەرت زالىندا داستۇرگە اينالعان «استانا كەشتەرى» VIII حالىقارالىق ونەر فەستيۆالى شىمىلدىعىن ءتۇردى.
بۇل ايتۋلى شاراعا پارلامەنت سەناتىنىڭ توراعاسى جانە اتالعان فەستيۆالدىڭ ۇيىمداستىرۋ كوميتەتىنىڭ ءتورايىمى داريعا نازارباەۆا قاتىسىپ, جينالعان قاۋىمدى ونەر كەشىمەن قۇتتىقتادى.
بيىلعى فەستيۆال دارىندى وپەرا انشىلەرىنىڭ ءبىرى, قازاقستاننىڭ ەڭبەك سىڭىرگەن قايراتكەرى مەدەت شوتاباەۆتىڭ بەنەفيسىمەن اشىلدى. وسى شارادا ەلوردالىقتار رەسەي ۇلكەن تەاترىنىڭ ءانشىسى اننا اگلاتوۆا, ماريا تەاترىنىڭ ءسوليسى ناتاليا پاۆلوۆا مەن ا.ناۆوي اتىنداعى مەملەكەتتىك ۇلكەن تەاتردىڭ ءسوليسى, وزبەكستاننىڭ حالىق ءارتيسى راميز ۋسمانوۆتىڭ ونەرىنە ءتانتى بولدى.
فەستيۆال اياسىندا «استانا وپەرا» تەاترىندا كامەرالىق مۋزىكانى ۇناتاتىن جۇرتشىلىق بەلگىلى يتاليالىق فورتەپيانو دۋەتى ماركو سكياۆو – سەردجو ماركەدجانيدىڭ ونەرىن تاماشالادى. بۇل كەشكە ەلىمىزدىڭ اتىنان تالانتتى پيانيست, Forte Trio مەملەكەتتىك تريوسىنىڭ جەتەكشىسى تيمۋر ۋرمانچەەۆ, كوپتەگەن حالىقارالىق بايقاۋلاردىڭ لاۋرەاتتارى دينارا بازارباەۆا-ساحامان (سكريپكا) جانە مۇرات ناربەكوۆ (ۆيولونچەل) قاتىستى. ال كەشە تالعامى بيىك كورەرمەندەر قازاقستاننىڭ حالىق ءارتىسى, الەمگە ايگىلى سكريپكاشى ايمان مۇساقوجاەۆا مەن تالانتتى پيانيست بەحزود ابدۋرايموۆتىڭ كونتسەرتىن كوردى.
