ەكولوگيالىق زالالسىز اۆتوجۋ جوباسى پايدالانۋعا بەرىلۋى ءتيىس

4 ماۋسىم كۇنى نۇر-سۇلتان قالاسى اكىمدىگىندە «Protecting business and Investments» بويىنشا بيزنەستى جانە ينۆەستيتسيانى سىبايلاس جەمقورلىقتان قورعاۋ شاراسى وتكىزىلىپ, وندا اۆتوموبيل جۋ قىز­مەتىن كورسەتەتىن يننوۆاتسيالىق جوبا تانىستىرىلدى. جوبانىڭ ەرەكشەلىگى – ول ءوز جۇمىسىندا سۋدى مەيلىنشە از جۇمسايدى جانە قورشاعان ورتاعا ەش زيان تيگىزبەيدى.

رەسپۋبليكامىزدا العاش رەت قولعا الىنىپ وتىرعان جوبانىڭ جەتەكشىسى – «بيوۆ» كومپانيا­سىنىڭ باسشىسى ءامىر قۋات شاعىن كاسىپورىننىڭ قىزمەتىنەن اعىن سۋلار جينالمايتىنىن, ول ۇيرەنشىكتى كولىك جۋعا قاراعاندا سۋدى 200 ەسەگە از شىعىندايتىنىن جانە مۇنداي كاسىپورىنداردى قالانىڭ كەز كەلگەن جەرىندە سالا بەرۋگە بولاتىنىن ايتتى.
«قازاقستان – تمد اۋماعىندا سۋ قورى ەڭ از مەملەكەتتەردىڭ ءبىرى. كوپتەگەن ەلدى مەكەندەر, وڭىرلەر سۋ جەتىسپەۋشىلىگىن ايقىن سەزىنىپ وتىر. سويتە تۇرا, وسى پروبلەمانىڭ شەشۋدىڭ بار امالدارىن تاۋىپ, ونى ءىس جۇزىندە جۇزەگە اسىرۋدىڭ ورنىنا, ءبىز سۋ سياقتى باعا جەتپەس رەسۋرستى ورىنسىز پايدالانىپ, تەككە ءراسۋا قىلىپ جاتىرمىز. وعان ەشكىمنىڭ مورالدىق قاقىسى جوق. ءموبيلدى اۆتوجۋ قالا تۇرعىندارىنا ەش قولايسىزدىق تۋعىزبايدى. بۇل ەلىمىزدە بولاشاقتا ەكولوگيالىق جاعىنان زالالسىز باسقا دا بيزنەس تۇرلەرىن دامىتۋعا ىقپال ەتەدى جانە قورشاعان ورتاعا قامقورلىقپەن قاراۋعا, سۋ سياقتى اسا قىمبات رەسۋرس­تاردى ۇنەمدەۋدى ۇيرەتەدى» دەدى «بيوۆ» كومپانياسىنىڭ باسشىسى.
ءموبيلدى اۆتوجۋ ىسىندە حيميالىق قۇرالدار قولدانىلمايدى, اينالاعا سانيتارلىق تۇرعىدان قاۋىپسىز. دەگەنمەن, بۇل جوبانى جۇزەگە اسىرۋ ءۇشىن قالانى اباتتاندىرۋ جاعدايىن رەتتەيتىن قازىرگى نورماتيۆتىك قۇجاتتارعا ءىشىنارا تۇزەتۋلەر ەنگىزۋ قاجەت كورىنەدى. بار ماسەلە وسىعان تىرەلىپ تۇر. بۇل – ەندى قۇزىرلى ورگانداردىڭ قولىنان كەلەتىن ءىس.
كەزدەسۋگە قاتىسقان قالالىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ باسشىسى جازيرا جىلقىشيەۆا ول ماسەلەنى ءتۇرلى سالا ماماندارىمەن جان-جاقتى تالقىعا سالىپ, جەدەل شەشىم شىعارۋعا تۇرتكى بولاتىنىن جەتكىزدى.
جوبا تانىستىرىلىمىنا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتىنىڭ باسشىسى جازيرا جىلقىشيەۆا, «Protecting business and Investments» جوبالىق كەڭسەنىڭ ماماندارى, «اتامەكەن» ۇكپ وكىلدەرى, اۋدان اكىمدەرى ورىنباسارلارى, كاسىپكەرلىك جانە اباتتاندىرۋ قىزمەتتەرىنىڭ باسشىلارى قاتىستى.

داۋلەت اساۋوۆ