استانا كۇنى ەلوردالىق كوماندا پرەمەر-ليگانىڭ 19 تۋرى شەڭبەرىندە ءوز الاڭىندا قىزىلوردالىق «قايسار» كومانداسىن قابىلدادى.
مەرەكە كۇنى «استانا» الاڭعا جاڭا فورمامەن شىعىپ, جانكۇيەرلەرىنە توسىنسىي جاسادى. ەلوردالىق فۋتبولشىلاردىڭ ەندىگى جەيدەلەرىندە شاڭىراق بەينەلەنگەن. سونداي-اق, بۇل كۇنى كومانداعا جاڭادان قوسىلعان ۆەنگەرلىك ويىنشى لاسلو كلياينحايسلەر العاشقى ويىنىن وتكىزدى. ول الاڭنىڭ ورتاسىندا يۆان ماەۆسكيمەن جۇپ قۇراپ, ونەر كورسەتتى.
كەزدەسۋدىڭ ءفاۆوريتى سانالعان «استانا» كومانداسى سالعان جەردەن قارسىلاسىنان ءبىر ءباس جوعارى تۇرعانىن اڭعارتتى. ءدال سول لاسلو «قايسار» قاقپاسىنا العاشقى قاۋىپتى سوققىنى جاسادى. بىراق يۆان گراف دەر كەزىندە دوپتى بۇرىشتاماعا شىعارىپ ۇلگەردى.
ودان كەيىن پاتريك تۆۋماسي بىرنەشە رەت قوناقتاردىڭ ايىپ الاڭىندا ايتارلىقتاي قاۋىپ تۋعىزدى. بىراق ونىڭ سوققىلارىن الەكساندر گريگورەنكو تويتارا ءبىلدى. اقىرى پاتريك قويماي ءجۇرىپ, 14-مينۋتتا دەگەنىنە جەتتى. ولار مۇنىمەن توقتاپ قالماي, شابۋىلدارىن ۇدەتە ءتۇستى.
ءۇستىن-ءۇستىن العا ۇمتىلعانمەن, ەسەپ ءبىرىنشى تايمدا وزگەرىسسىز قالىپ, 63-مينۋتتا ەسەلەنگەن ەدى. بىراق بۇل گول ويىننان تىس سوعىلدى دەپ سانالمادى. دەگەنمەن كوپ ۇزاماي 71-مينۋتتا ەكىنشى گول سوعىلدى. پاتريكتىڭ اۋەلەتكەن دوبىن يۋري لوگۆينەنكو قاقپاعا باسپەن توعىتا سالدى. ءسويتىپ, بۇل ماتچ 2:0 ەسەبىمەن استانالىقتاردىڭ پايداسىنا اياقتالدى.
ەندى ستانيمير ستويلوۆتىڭ شاكىرتتەرى 12 شىلدە كۇنى ەۋروپاعا جورىقتى لاتۆيادان باستايدى. «استانا» چەمپيوندار ليگاسىنىڭ ىرىكتەۋ كەزەڭىنىڭ اياسىندا سىرت الاڭدا يۋرمالا قالاسىنىڭ «سپارتاك» كلۋبىنا قارسى وينايدى. ال جاۋاپتى ويىن ەلوردادا 18 شىلدە كۇنى وتەدى.
ورىنبەك وتەمۇرات
