مەرەكەلىك شارالار اياسىندا «ايالاعان استانا» رەسپۋبليكالىق ءان بايقاۋىنىڭ جەڭىمپازى انىقتالدى. ەندى «ارتەك» لاگەرىندەگى بالالاردىڭ «جاڭا تولقىن-2016» حالىقارالىق كونكۋرسىندا ەل نامىسىن استانالىق جانەل سادۋاقاس قورعايدى.
استانا قالاسى اكىمدىگىنىڭ قولداۋىمەن وسىمەن ءتورتىنشى رەت شىمىلدىعىن تۇرگەن مۋزىكالىق جوبانىڭ سوڭعى كەزەڭىنە قازاقستاننىڭ تۇكپىر-تۇكپىرىنەن كەلگەن 11 بالا قاتىستى. ءبىر-ءبىر اننەن ورىنداعان ۇمىتكەرلەردىڭ ونەرىن قازاقستاندىق ەسترادا انشىلەرى قۇرماش ماحانوۆ, گۇلنۇر ورازىمبەتوۆا, سەرىك يبراگيموۆ, سونداي-اق, «نوۆايا ۆولنا» جانە «دەتسكايا نوۆايا ۆولنا» كونكۋرستارىنىڭ ديرەكتورى الەكساندر رۋميانتسەۆ پەن «ايالاعان استانا» ءان بايقاۋىنىڭ باس پروديۋسەرى لينا اريفۋلينا 10 ۇپايلىق جۇيەمەن باعالادى.
جاس تالانتتاردى تانىتاتىن تەلەۆيزيالىق جوبا «قازاقستان» ۇلتتىق تەلەارناسىنىڭ تىكەلەي ەفيرىندە كورسەتىلدى. ونەر بايگەسى بيىل وزگەشە فورماتتا ءوتتى. بالالار كوگىلدىر ەكراننان قالا كۇنى مەرەكەسىنە وراي استانانىڭ كورىكتى جەرلەرىن تانىستىرادى.
ماسەلەن, تارازدان كەلگەن دۋمان مارات ەسىمدى ءبۇلدىرشىن ەلوردا نىشانى – «بايتەرەك» مونۋمەنتى جونىندە اڭگىمەلەيدى. «بايتەرەكتىڭ ىشىندە ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ قولى بەينەلەنگەن «ايالى الاقان» اتتى كومپوزيتسيا بار. بۇل مۇسىنگە قولىن قويىپ, ارمان تىلەۋ بارشا قازاقستان ءۇشىن داستۇرگە اينالعان ەكەن. وسى جەردە مەن بايقاۋدا جەڭىسكە جەتسەم ەكەن دەپ تىلەدىم» دەيدى دۋمان. قاتىسۋشىلار سونىمەن بىرگە, «استانا وپەرا», ۇلتتىق مۋزەي, ەكسپو قالاشىعى, «ماڭگىلىك ەل» سالتانات قاقپاسى, «استانا ارەنا» ستاديونى, قازاقستان ورتالىق كونتسەرت زالى, بەيبىتشىلىك جانە كەلىسىم سارايى سەكىلدى ساۋلەتتى عيماراتتاردى ارالاعانداعى اسەرلەرىمەن بولىسكەن.
تارتىستى بايگەدە ماريا زاتۆارنيتسكايا (پاۆلودار), نۇرداۋلەت تىلەكقابىل (اتىراۋ) جانە ارۋجان ساعىنعاليەۆا (ماڭعىستاۋ وبلىسى) ەڭ جوعارى كورسەتكىش 50 بالل جينادى. الايدا, كورەرمەندەر بەرگەن sms-داۋىستاردىڭ ارقاسىندا استانالىق جانەل سادۋاقاس جالپى ۇپاي سانى بويىنشا بارىنەن توپ جاردى. وعان جەڭىس اكەلگەن باكىر تاجىباەۆتىڭ سوزىنە جازىلعان سەيدوللا بايتەرەكوۆتىڭ ءانى – «ءاليا». قازىلار القاسىنىڭ ايتۋىنشا, جانەل ايگىلى «ءاليا» انىنە وزىندىك بوياۋىن بەرىپ, ادەمى ميليزمدەردى قوسىپ, زاماناۋي تۇردە شىرقادى.
بايقاۋ شارتى بويىنشا قاتىسۋشىلار «Red Jam» مۋزىكالىق توبىنىڭ سۇيەمەلدەۋىمەن جاندى داۋىستا ءان سالدى.
«ءارتىستى تاڭداۋ وڭايعا سوققان جوق. تالاپتارى تاۋداي, تالانتتارى ۇلكەن ءۇمىت كۇتتىرەتىن بالالار ەكەن. ماسەلەن, ارۋجان ءبارىمىزدى ورنىمىزدان تىك تۇرعىزىپ, زور قوشەمەتىمىزگە بولەندى» دەپ تامساندى جاس ونەرپازداردىڭ ورىنداۋشىلىعىنا الەكساندر رۋميانتسەۆ.
ءوزىنىڭ كەڭ دياپازونىمەن جۇرتتى ءتانتى ەتكەن ارۋجان ساعىنعاليەۆا دا جۇلدەدەن قۇر قالمادى. ول «قازاقستان» رەسپۋبليكالىق تەلەراديوكورپوراتسياسىنىڭ ارنايى جۇلدەسىمەن ماراپاتتالدى.
ءمادينا جاقىپ
