سوڭعى ەكى جىلدا تۇرعىنداردىڭ تولەم كارتالارىنا دەگەن كوزقاراسى جاقسى جاعىنا قاراي ايتارلىقتاي وزگەردى. كوپشىلىگى كارتامەن اقشانى الىپ قانا قويمايدى, ونىمەن ءتۇرلى تولەمدەر دە جۇرگىزەدى.
كارتالاردى قولدانۋ كولەمىنىڭ ارتۋى زاڭنامالىق وزگەرىستەر جاساۋعا دا الىپ كەلدى. ساۋدا نۇكتەلەرىنىڭ ءبارىندە تولەم كارتالارىن قابىلدايتىن بولدى. ادامداردىڭ ەڭبەكاقىنى كارتالار ارقىلى الۋ مۇمكىندىگى تۋدى. ءارى كارتالارعا بانكتەر جۇمىس بەرۋشىنى ەمەس, قىزمەتكەردىڭ ءوزىن تىركەيدى.
– بىراق قازىر قازاقستاندا بانكوماتتىق جەلىلەردى ازايتۋ باستالدى. قاڭتار-مامىر ايلارىندا بانكوماتتار سانى وتكەن جىلدىڭ وسى كەزەڭىمەن سالىستىرعاندا 5 پايىزعا تومەندەگەن ەكەن. ال, كەرىسىنشە 2016 جىلدىڭ مامىر ايىندا كارتالىق ترانزاكتسيالاردىڭ مولشەرى ودان بۇرىنعى جىلدىڭ وسىنداي كەزەڭىمەن سالىستىرعاندا 23 پايىزعا ارتىپ, 828 ملرد تەڭگەگە جەتتى, – دەگەن قورىتىندى جاسايدى Ranking. kz سايتىنىڭ قازاقستان ەكونوميكاسى مونيتورينگى جوباسى بويىنشا ساراپشىلارى.
ەلىمىزدىڭ بانكومات جەلىسىنىڭ 11 پايىزى استانادا ورنالاسقان. بۇگىندە 1009 بانكوماتتان 994-ءى عانا قالعان. ال ەلوردا تۇرعىندارىنداعى كارتا سانى ميلليوننان دا كوپ. ءبىرىنشى ماۋسىمدا ولار 998 مىڭ دەبەتتى, 66 مىڭ نەسيە ءليميتى بار دەبەتتى, الدىن الا تولەنگەن تولەم كارتالارىن جانە 17 مىڭ كرەديتتى كارتالاردى ۇستاعان.
ۇلتتىق بانكتىڭ مالىمەتىنە قاراعاندا, حالىقارالىق جۇيەدەگى تولەم كارتالارىن 26 قازاقستاندىق بانك جانە «قازپوشتا» اق شىعارادى. سونىمەن بىرگە, بىرقاتار بانكتەر وزدەرىنىڭ جەرگىلىكتى تولەم كارتالارىن ۇسىنادى ەكەن.
تۇرعىندار كارتالاردى ءتولەمدەر جاساۋ ءۇشىن دە ءجيى قولداناتىندىقتان, بانكتەرگە كەز كەلگەن جەرگە كوپ مولشەردە بانكومات ورناتۋدىڭ دا قاجەتى بولماي بارادى, سونىڭ ىشىندە ەلوردادا جەتكىلىكتى. بۇگىندە بانكتەر تەك قانا وزدەرىنىڭ جاڭا بانكوماتتارىن ورناتۋدى عانا كوزدەپ قويماي, باسقا بانكتەرمەن ارىپتەستىك بايلانىس ورناتۋ باعىتىندا كەلىسسوزدەر جۇرگىزەدى.
ناقتىراق ايتقاندا, بانكوماتتار بۇرىنعىسىنشا سۇرانىسقا يە. استانالىق كارتا ۇستانۋشىلار مامىر ايىندا تاۋارلار مەن قىزمەتتەرگە, نەگىزىنەن, POS-تەرمينالدار مەن ينتەرنەت ارقىلى 14,3 ملرد تەڭگە كولەمىندە تولەم جاساعان. كارتالار ارقىلى قولما-قول اقشا, نەگىزىنەن, بانكوماتتاردان شىعارىلعان, ونىڭ كولەمى 77,7 ملرد تەڭگەگە جەتكەن.
جالپى, كارتالار بويىنشا وپەراتسيالار سانى ۋاقىت وتكەن سايىن ارتىپ كەلەدى.
ۆالەنتينا ۆلاديميرسكايا
