نازارباەۆ ۋنيۆەرسيتەتىندە تابيعي اپاتتار, ونىڭ ىشىندە سۋ تاسقىنىنا قاتىستى ساراپشىلار ءوزارا پىكىر الماستى, دەپ حابارلايدى astana-akshamy.kz
تولىعىراق اتالعان شارانى ۇيىمداستىرۋشى, SDNH Youth Kazakhstan جوبالىق مەنەدجەرى, نازارباەۆ ۋنيۆەرسيتەتى ساياساتتانۋ جانە حالىقارالىق قاتىناستار باعىتىنىڭ ستۋدەنتى نۇرسايا الپىسبەس ايتىپ بەردى.
«بۇگىنگى ءىس-شارانى ءبىز وسىدان ءۇش اپتا بۇرىن ۇيىمداستىرماق بولعانبىز. بىراق ونىڭ تاقىرىبى جەر سىلكىنىسىنىڭ زاردابى تۋرالى ەدى. دەگەنمەن ەل اۋماعىندا سۋ تاسقىنى باستالدى, سوندىقتان تاقىرىپتى وزگەرتتىك. بۇگىنگى جيىندا سۋ تاسقىنى, ونىڭ سەبەبى مەن سالدارى تۋرالى تالقىلاندى. سونىمەن قاتار بولاشاقتا سۋ تاسقىنىنىڭ الدىن الۋدى نەدەن باستاۋ كەرەك, قانداي شارالار قابىلداۋ كەرەك دەگەن ماسەلەلەر كوتەرىلدى», – دەدى باق وكىلدەرىنە اتالعان ءىس-شارانىڭ ماڭىزدىلىعى تۋرالى ايتقان نۇرسايا الپىسبەس.
سپيكەردىڭ پايىمداۋىنشا, قازىر وڭىرلەردەگى سۋ تاسقىنىنىڭ سەبەپ-سالدارىن انىقتاۋ جانە الداعى ۋاقىتتا ونى بولدىرماۋ ءۇشىن عىلىمي زەرتتەۋ جۇمىستارىن قولعا الۋ كەرەك, ياعني, گرانتتار ءبولىپ, سالا ماماندارىن كوپتەپ تارتۋ قاجەت.
«سۋ تاسقىنىنىڭ الدىن الۋعا بولادى, بىراق ول ۋاقىت, قاراجات پەن جۇيەلى زەرتتەۋدى تالاپ ەتەدى. قازىرگى سۋ تاسقىنىنىڭ زاردابى ۇلكەن زالالعا الىپ كەلۋى مۇمكىن, سوندىقتان دا ماسەلەنىڭ ءمانىن زەرتتەۋگە مامانداردى تارتۋىمىز كەرەك. سونىمەن قاتار شەشىمدى ۋاقتىلى قابىلداعان ءجون», – دەيدى ول.
ايتا كەتەيىك, بۇگىن ەلورداداعى نازارباەۆ ۋنيۆەرسيتەتىندە توتەنشە جاعدايلارعا توتەپ بەرۋ ماسەلەلەرى بويىنشا ساراپشىلاردىڭ پىكىرتالاسى ءوتتى. اتالعان ءىس-شارا نازارباەۆ ۋنيۆەرسيتەتى, وعان قاراستى قىزىل اي قوعامى مەن بۇۇ تۇراقتى دامۋ شەشىمدەرى جەلىسىنىڭ جاھاندىق جاستار باستاماسىمەن ۇيىمداستىرىلدى.
ديسكۋسسيا بارىسىندا تابيعي اپاتتار, ونىڭ ىشىندە سۋ تاسقىنى, جەر سىلكىنىسى, ورمان ورتتەرى مەن ەپيدەميالىق جاعداي بويىنشا سالا ماماندارى پىكىر ءبىلدىردى.
