استانا قالاسىنىڭ ارنايى ەكونوميكالىق ايماعىندا كوپتەگەن كاسىپورىن جۇمىس ىستەيدى. بۇل ايماق ەلوردانىڭ نەگىزگى ينۆەستيتسيالىق ورتالىعىنا دا اينالىپ وتىر. ينۆەستيتسيا تارتۋ بويىنشا №1 يندۋستريالدىق پارك ايرىقشا ءرول اتقارادى. مۇندا جالپى ينۆەستيتسيا سوماسى 322 ميلليارد تەڭگە بولاتىن 100 جوبا جۇزەگە اسىرىلىپ جاتىر. پارك ءوندىرىس اۋقىمى جاعىنان رەسپۋبليكادا ءبىرىنشى ورىن الادى. حالىق شارۋاشىلىعىنا قاجەتتى سان الۋان تاۋار وندىرەتىن ءوندىرىس نىساندارىندا مىڭداعان ادام جۇمىسپەن قامتىلىپ وتىر.
«قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا ىسكە اسىپ جاتقان پەرسپەكتيۆالى جوبالاردىڭ جۇمىسىمەن تانىسۋ ءۇشىن استانا قالاسىنىڭ ءماسليحات دەپۋتاتتارى اسقار سماعۇلوۆ, ەرلان داكەنوۆ, قانات يبراەۆ, ۆلاديسلاۆ سەرگەەۆ, جانارگۇل قۇلماعامبەتوۆا №1 يندۋستريالدىق پارككە ارنايى باردى. ەكونوميكالىق ايماقتا ءتۇرلى سالادا قىزمەت ەتەتىن جۇزدەن اسا بيزنەس سۋبەكتىسى شوعىرلانعان. حالىق قالاۋلىلارى بەس كاسىپكەرلىك نىساندى ارالادى.
ساپالى قۇرىلىس ماتەريالدارىن وندىرەدى
ءبىرىنشى قۇرىلىس ماتەريالدارىن شىعاراتىن «Metal Former» جشس جۇمىسىن كوردىك. كومپانيانىڭ وندىرىستىك ديرەكتورى تيمۋر دانياروۆ قارسى الىپ, زاۋىتتىڭ جۇمىسىمەن تانىستىردى.
– جوبانىڭ قۇنى – 6 ميلليارد تەڭگە. 2022 جىلى زاۋىتتىڭ قۇرىلىسى باستالىپ, 2023 جىلى جەلتوقسان ايىندا ىسكە قوسىلدى. زاۋىتتىڭ اشىلۋىنا پرەزيدەنت قاسىم-جومارت توقاەۆ ارنايى قاتىستى. شاتىر جانە قاپتاۋعا قاجەتتى قۇرىلىس ماتەريالدارىن شىعارامىز, – دەدى ديرەكتور.
ىشكى جانە سىرتقى ساندىك پانەلدەر, لاميناتتالعان تالشىقتى تسەمەنت تاقتالار, اليۋمين پروفيلدەر, قار ۇستايتىن قالقاندار جانە تاعى باسقاسىن وندىرەتىن كومپانيانىڭ ونىمدەرىنە نارىقتا سۇرانىس بار.
– قۇرىلىسقا كەرەكتى ماتەريالدىڭ 47 ءتۇرىن شىعارامىز. لاميناتتالعان تالشىقتى تسەمەنت تاقتالار زاماناۋي, پراكتيكالىق جانە ەكولوگيالىق تازا قاپتاۋ ماتەريالى سانالادى. بۇل – قۇرىلىس ماتەريالى ىستىققا دا, سۋىققا دا ءتوزىمدى, جەڭىل ءارى بەرىك ماتەريال. ءورت قاۋىپسىزدىگىنە تولىق جاۋاپ بەرەدى, – دەپ ءونىمنىڭ ساپاسىن ءسوز ەتتى كومپانيا ينجەنەرى ابزال راقىمجانوۆ.
2019 جىلدان №1 يندۋستريالدىق پاركتەگى كومپانيالار مەملەكەتكە 230,29
ميلليارد تەڭگەنىڭ سالىعىن تولەدى
ءبىزدى قىزىقتىرعانى, شيكىزاتتى قايدان, قالاي الاتىنى. بۇل سۇراققا تيمۋر دانياروۆ بىلاي جاۋاپ بەردى: «اليۋميني ءونىمىن پاۆلودار مەن قاراعاندى قالاسىنان, تسەمەنت تاقتالاردى قىرعىزستان مەن قىتايدان الدىرامىز. ءبىز اليۋميني ءونىمىن ءتۇرلى فورماعا ءتۇسىرىپ, قۇرىلىسقا كەرەكتى ماتەريال رەتىندە دايىندايمىز. ال تالشىقتى تسەمەنت تاقتالاردى ءارتۇرلى تۇسكە بويايمىز».
كومپانيا ۇزاق جىلدىق جوسپارىن بەكىتىپ, سول بويىنشا جۇمىس ىستەۋدە. قازىر 46 ادامدى تۇراقتى جۇمىسپەن قامتىپ وتىرسا, 2029 جىلى جۇمىسشى سانىن 150 ادامعا جەتكىزۋگە نيەتتى. بيىل 18,5 ميلليارد تەڭگە تابىس تابۋدى جوسپارلاسا, 2029 جىلعا قاراي قارجى اينالىمىن ەكى ەسەگە ارتتىرىپ, 29,8 ميلليارد تەڭگەگە جەتكىزۋ مىندەتى تۇر.
تەمىرجول پاركىن جاڭارتۋعا ۇلەس قوسادى
ەلدىڭ دامۋىندا لوگيستيكالىق سەرۆيستىڭ ساپاسىن ارتتىرۋ ماڭىزدى ءرول اتقارادى. اسىرەسە سەنىمدى تاسىمال قۇرالى سانالاتىن پويىزداردىڭ ساپاسىن ارتتىرۋ كەرەك. قازىر تەمىرجول قاتىناسىندا جۇرگەن ۆاگوننىڭ كوبى ەسكىرگەن. تۋريزم مەن بيزنەستى ىلگەرىلەتۋدە جوعارى جىلدامدىقتى جاڭارعان ۆاگوندار وڭ اسەر ەتەدى. وسىنداي اۋقىمدى مىندەتتى ورىنداۋدا «Stadler قازاقستان» جشس اتسالىسۋدى كوزدەپ وتىر.
ۆاگون شىعاراتىن زاۋىتتىڭ اۋماعى 1,5 مىڭ تەكشە مەتردى قامتيدى. قازىر 100 ادامدى جۇمىسپەن قامتىپ وتىر. 2026 جىلعا قاراي 500 ادامدى ۆاگون قۇراستىرىپ, شىعارۋعا تارتپاق.
كومپانيانىڭ باس ديرەكتورى ۆلاديمير رۋساك پەرسپەكتيۆالى جوبانىڭ ماڭىزىن ءتۇسىندىردى.
– 2023 جىلى قازاقستان نارىعىنا شۆەيتساريالىق ساپا كەلدى. بۇل پويىزبەن ساپارلاۋ نەمەسە ساياحاتتاۋ ەۋروپاداعىداي ىڭعايلى جانە قاۋىپسىز بولۋعا العىشارت بولادى. Stadler كومپانياسى 80 جىلدان استام جولاۋشىلار قوزعالىسىنىڭ قاۋىپسىزدىگىن, جىلدامدىعىن جانە ىڭعايلىلىعىن ارتتىراتىن ساپالى ۆاگوندار شىعارىپ كەلەدى. گەرمانيا, يتاليا, نيدەرلاندى, اۆستريا, پولشا, يسپانيا, ۆەنگريا جانە اقش-تا فيليالدارى جۇمىس ىستەيدى. ەندى 2025 جىلى استانادا تولىق تسيكلدى زاۋىت جۇمىسىن باستاپ, تەمىرجول پاركىن جاڭارتۋعا ۇلەس قوسادى, – دەدى كومپانيا باسشىسى.
بۇل كومپانيانىڭ FLIRT H2 سۋتەگى پويىزى 46 ساعات ىشىندە 2803 شاقىرىم قاشىقتىقتا توقتاۋسىز ءجۇرىپ, گيننەستىڭ جاڭا الەمدىك رەكوردتى ورناتتى. ياعني Stadler – الەم بويىنشا تەمىرجولعا ارنالعان جولاۋشىلار ۆاگونىن وندىرەتىن جەتەكشى كومپانيا.
2021 جىلعى 29 قاراشادا پرەزيدەنت قاسىم-جومارت توقاەۆتىڭ شۆەيتسارياعا رەسمي ساپارى كەزىندە «قازاقستان تەمىرجولى» ۇك» اق مەن «Stadler Rail AG» كومپانياسى ىنتىماقتاستىق تۋرالى كەلىسىمگە كەلگەن-ءدى. قازىر زاۋىتتى جابدىقتاۋ جۇمىستارى جۇرگىزىلۋدە.
كومپانيانىڭ كوممەرتسيالىق ديرەكتورى سەرگەي لەونتەۆتىڭ سوزىنشە, كاسىپورىننىڭ وندىرىستىك قۋاتى جىلىنا 100-دەن استام جولاۋشىلار ۆاگونىن قۇراستىرىپ, شىعارادى. «Stadler قازاقستان» جشس ستراتەگيالىق سەرىكتەسى «جولاۋشىلار تاسىمالى» اق ۇلتتىق تاسىمالداۋشىسى كومپانياسى. دەمەك, زاۋىت ىسكە قوسىلعان كەزدە تەمىرجول پاركىن جاڭارتۋعا جول اشىلادى.
ەكولوگيالىق تازا داقىل وسىرۋگە كومەكتەسەدى
ءۇشىنشى نىسان «SWISSGROW» برەندىمەن تىڭايتقىشتار وندىرەتىن كەشەن بولدى. حالىقارالىق كومپانيا اۋىل شارۋاشىلىعىنا ارنالعان ارنايى كەشەندى مينەرالدى تىڭايتقىشتاردىڭ 400-دەن استام ءتۇرىن وندىرەدى. 35 جىلدىق تاجىريبەسى بار كومپانيانىڭ تىڭايتقىشى توپىراقتىڭ ءارتۇرلى تۇرىندە قۇنارلىقتىڭ جوعارىلاۋىن قامتاماسىز ەتەدى. قازاقستاندا «SWISSGROW» كومپانياسى 100-گە جۋىق تىڭايتقىش اتاۋىن تىركەدى. تمد نارىعىنا 20-عا جۋىعىن ەكسپورتتاۋدى جوسپارلاۋدا.
جەرگىلىكتى كومپانيانىڭ ديرەكتورى رۇستەم اليەۆ:
– شۆەيتساريانىڭ اۋىل شارۋاشىلىعى سالاسىنداعى تاجىريبەسىنە سۇيەنىپ دايىندالاتىن تىڭايتقىشتار داقىل تۇرلەرىنىڭ سانى مەن ساپاسىنا اسەر ەتەدى. بارىنەن بۇرىن, داقىلدىڭ قويمادا ساقتاۋ مەرزىمىن ۇزارتادى. بىزدە جىلىجاي شارۋاشىلىعىنا جانە تامشىلاتىپ سۋارۋعا ارنالعان رەتسەپت بويىنشا سۇيىق جانە سۋسىمالى تىڭايتقىشقا جاتاتىن 25 اتاۋ جانە 500-دەن استام ءتۇرى بار. ونىمەن توپىراقتىڭ قۇنارىن ارتتىرۋعا بولادى, – دەپ تانىستىردى.
ارنايى ەكونوميكالىق ايماقتاعى «استانا – جاڭا قالا» جانە «استانا-تەحنوپوليستىڭ» باسقارۋشى كومپانياسى بولىپ «Astana Invest» ينۆەستيتسيالاردى دامىتۋ ورتالىعى سانالادى. №1 يندۋستريالدىق پاركتە ونەركاسىپتىك وبەكتىلەرىنىڭ ينۆەستيتسيالىق پورتفەلى ناقتى سالىنعان 112 جوبانى قۇرايدى
2017 جىلى اقپان ايىندا اشىلعان ءوندىرىس ورنىندا 14 ادام تۇراقتى جۇمىس ىستەيدى. كومپانيا جۇمىسىنىڭ ءتيىمدىلىگى – اگرونومدار ارقىلى شارۋا قوجالىقتارمەن تىكەلەي جۇمىس ىستەپ, تىڭايتقىشتاردىڭ قاي ءتۇرىن, قانشا مولشەردە, قانداي ۋاقىتتا بەرۋ تاجىريبەسىمەن بولىسەدى. ياعني ءونىمدى نارىقتا ساتۋدان بولەك, شۆەيتساريالىق برەندتىڭ تيىمدىلىگىن كوزبەن كورىپ, قولمەن ۇستايتىن دەڭگەيگە جەتكىزەدى.
– جوبانىڭ جالپى قۇنى – 150 ميلليون تەڭگە. جىلىنا 50 مىڭ توننا سۇيىق جانە قۇرعاق تۇرىندە تىڭايتقىش شىعارامىز. 2023 جىلى 5,8 ميلليارد تەڭگەنىڭ ءونىمىن ءوندىرىپ, مەملەكەتكە 673 ميلليون تەڭگەنىڭ سالىعىن تولەدىك. شيكىزاتى – مينەرالدى زاتتار. ءبىزدىڭ ەل مينەرالدى ەلەمەنتتەرگە باي بولسا دا, شيكىزاتتى شەت ەلدەردەن اكەلەمىز, – دەدى ديرەكتور رۇستەم اليەۆ.
قالانى اباتتاندىرۋعا قارقىن بەرەدى
قالاعا دا, اۋىلعا دا اباتتاندىرۋ جۇمىسىن جۇرگىزگەندە تاستوسەنىشتى (برۋسچاتكا) جەرگە قالاپ جاتادى. اسىرەسە سەرۋەندەيتىن سكۆەرگە, دەمالاتىن اللەياعا ءتۇرلى-ءتۇستى برۋسچاتكانى توسەيدى. بىلتىر ەلوردادا ونداعان دەمالىس ورنى جاڭا سيپاتقا ەندى دەسەك, بارلىعىندا تاستوسەنىشتى جاڭالادى. دەمەك, برۋسچاتكا وندىرىسىنە سۇرانىس جوعارى. مىنە, نارىقتاعى سۇرانىستى وتەۋگە «Paving Stone Company» جشس تاۋەكەل ەتىپ, جاڭا ءوندىرىس ورنىن قۇرۋعا 5,9 ميلليارد تەڭگە ينۆەستيتسيا قۇيدى. 4 مىڭ شارشى مەتر اۋماققا قامتيتىن ءوندىرىس ورنى اۆتوماتتاندىرىلعان. ارتىقشىلىعى – وندىرىستەن شىققان سۋدى قايتا وڭدەپ, قولدانادى, ءارى ءونىمدى ءتۇرلى-تۇسپەن شىعارادى.
– قۇراما تەمىربەتون جانە بەتون كونسترۋكتسيالارى مەن بۇيىمدارىن وندىرەمىز. 70 ادامدى جۇمىسپەن قامتىپ وتىرمىز. تاۋلىگىنە 5 مىڭ شارشى مەترگە دەيىن ءونىم شىعارامىز. ارالاس فورماتتى: Artis, Teppa S, Agara, ميكس S, ميكس L, سوفي اتالاتىن ءونىم تۇرلەرىن وندىرەمىز. تاستوسەنىشتىڭ ستاندارتتى 50×50 ولشەمىنەن باستاپ, 30×30, 60×30, 30×15, 60×20 تابۋعا بولادى. جيەكتاستاردىڭ ولشەمى 100×30×15, 100×25×10, 100×20×8, 50×20×8 بويىنشا دايىندالادى, – دەپ تانىستىردى كومپانيانىڭ ساۋدا-ساتتىققا جاۋاپتى ديرەكتورى جاقسىلىق ەسەنتەمىروۆ.
ودان ءارى وندىرىستە قيىرشىق تاسقا تسەمەنتتى ارالاستىرىپ دايىنداۋدان, تاستوسەنىشتى شىعارۋعا دەيىنگى تولىق تسيكلدى جۇمىسىن كورسەتتى. الدىمەن ارنايى اپپاراتتا ءبىر قالىپقا كەلتىرىلىپ, سوسىن جىلجىمالى جۇيە ارقىلى بەرىكتىگىن ارتتىراتىن قويماعا جىبەرىلىپ, كەپتىرىلەدى. وندا 24 ساعاتقا دەيىن 40 گرادۋستا ۇستايدى. ودان ءارى قوراپتارعا جينالىپ, نارىققا شىعارۋعا ازىرلەنەدى. وسى ارالىقتا ارنايى ماماندار ءونىمنىڭ ساپاسىن قايتا-قايتا تەكسەرىپ وتىرادى.
تۇركيا برەندى – قازاقستاندا
«YDA Group» كومپانياسى بيزنەستىڭ نەگىزگى 11 سالاسىندا تابىستى سانالادى. اسىرەسە, قۇرىلىس جانە جىلجىمايتىن مۇلىك, مەديتسينا جانە ساۋىقتىرۋ, اۆياتسيا جانە ەنەرگەتيكا, تاۋ-كەن ونەركاسىبى, اۋىل شارۋاشىلىعى, اقپاراتتىق تەحنولوگيا باعىتىندا الەمدىك دەڭگەيدەگى قىزمەت ۇسىنادى. بۇل كومپانيا قازاقستان نارىعىنا كىرىپ, ءىرى جوبالاردى ىسكە اسىرا باستادى. سونىڭ ءبىرى – تۇركىستان قالاسىنداعى حالىقارالىق اەروپورتتىڭ قۇرىلىسىن جۇرگىزدى. ودان بولەك, پەتروپاۆل, قوستاناي, تۇركىستان, استانادا ەمحانا سالدى.
ءبىزدى قارسى العان الپاۋىت كومپانيانىڭ ديرەكتورى ءمۇرات چەتين يندۋستريالىق پاركتە ورنالاسقان ءوندىرىس ورنىمەن تانىستىردى.
– 2022 جىلى 22 ميلليارد تەڭگە ينۆەستيا سالىپ, اشىلدىق. ءوندىرىس ورنىندا 5 تسەح بار. پۆك جانە اليۋميني ەسىكتەر مەن تەرەزەلەر شىعاراتىن جانە مەديتسينالىق گاز جابدىقتارى, كەڭسە جيھازدارى, مەديتسينالىق تەحنيكالىق جيھازدار مەن جابدىقتار, قۇراما عيماراتتار شىعاراتىن تسەحتا 200-گە جۋىق ادام جۇمىس ىستەيدى. 2023 جىلى 3,3 ميلليارد تەڭگەنىڭ ءونىمىن دايىنداپ, 266,5 ميلليون تەڭگە سالىعىن تولەدىك, – دەدى تۇرىك ازاماتى ءمۇرات چەتين.
ءبىزدى مەديتسينالىق جيھاز بەن جابدىقتار شىعاراتىن تسەح قىزىقتىردى. وندا قوزعالمالى, جىلجىمالى ءتۇرلى كەرەۋەتتەر دايىندالادى ەكەن. ءتىپتى اربادا وتىراتىن ناۋقاستارعا دا جايلىلىق بەرەتىن جابدىقتاردى كوردىك. ازىرگە مەديتسينالىق جابدىقتارمەن پەتروپاۆل, قوستاناي, تۇركىستان جانە استانا قالاسىنداعى ەمحانالاردى قامتاماسىز ەتۋدە. ەگەر سۇرانىس بولسا, ونىمدىلىكتى ارتتىرۋعا تولىق مۇمكىندىك بار ەكەن.
4 گەكتار اۋماقتى قامتيتىن ءوندىرىس ورنىنداعى 5 تسەحتى تولىق ارالاپ شىعۋعا 1 كۇن كەتەتىنى انىق. زاماناۋي قۇرىلىستا ناعىز توڭكەرىس جاساعان قۇراما عيماراتتار شىعارۋدى ىلگەرىلەتۋ – ماڭىزدى ءىس. ويتكەنى قۇرىلىس يندۋسترياسى عيماراتتاردى قىسقا مەرزىمدە سالۋدى تالاپ ەتەدى. قازىر سۋىق جانە ىستىق اۋا رايىنا, جەر سىلكىنىسىنە جانە داۋىلعا ءتوزىمدى ماتەريالدارعا شەت ەلدەردە سۇرانىس جوعارى.
P.S: اقش, ۇلىبريتانيا, جاپونيا, گەرمانيا بيزنەستى دامىتۋ ارقىلى وزىق ەلدەر قاتارىندا كوش باستايدى. ءبىر عانا مىسال, اقش-تا 33,3 ميلليون كومپانيا بيزنەس ساناتىنا جاتادى, ءارى وندا 61,6 ميلليون ادام جۇمىس ىستەيدى. بۇل كورسەتكىش اقش-تاعى جۇمىس كۇشىنىڭ 45,9 پايىزىن قۇرايدى. ءبىزدىڭ ۇكىمەتتىڭ ەل ەكونوميكاسىنداعى شاعىن جانە ورتا بيزنەس ۇلەسi 2050 جىلى 50 پايىزعا جەتكىزۋدى تالپىنىپ وتىرعانى وسى سەبەپتى. ەكونوميكالىق ايماق وسى باعىتتاعى مەجەلى جۇمىستى اتقارۋ ءۇشىن قۇرىلىپ وتىرعانى انىق.
