بىرەگەي جوبا 2017 جىلدىڭ ناۋرىز ايىندا پايدالانۋعا بەرىلۋى ءتيىس.
سوڭعى ۇلگىدەگى تەحنولوگيامەن سالىنىپ جاتقان تەمىرجول ۆوكزالىنىڭ قۇرىلىسى جوباسىنىڭ اۆتورى – تانىمال ارحيتەكتور نيكيتا ياۆەين. ول استانا تورىندە بوي كوتەرگەن وقۋشىلار سارايىنىڭ جوباسىن جاساعان. حالىقارالىق اۋەجاي جوباسىندا دا قولتاڭباسى قالعان. ەندى, مىنە, ءسانى مەن سالتاناتى كەلىسكەن تۋىندىسى وزىمەن بىرگە باسەكەگە تۇسكەن گەرمانيا, اۆستراليا, اقش, قازاقستان جانە تۇركياداعى ارىپتەستەرىن باسىپ وزدى.
جوبا بويىنشا ۆوكزال اۋماعى قازىرگى قولدانىستاعى ەسكىسىنەن 11 ەسەگە دەيىن ۇلكەن بولادى. ۇزىندىعى 630 مەتر بولسا, بيىكتىگى – 49,5 مەتر.
ءدال قازىر مىڭجىلدىق اللەياسى ماڭىندا قۇرىلىسشىلار تاۋلىك بويى جۇمىس ىستەۋدە. قۇرىلىس الاڭىندا 1300-گە جۋىق مامان بار. ولار جاڭا ۆوكزالدىڭ ىرگەتاسىن قالاپ قويىپ, ەندى قابىرعاسىن كوتەرۋدى باستاپ كەتتى. اتاپ ايتقاندا, تەمىر بەتون قاۋسىرماسىن قۇراستىرۋ جۇمىستارى تولىق اياقتالىپ, 25935 توننا مەتالل قۇراستىرماسى يگەرىلگەن.
جوبا بويىنشا پويىزدار عيماراتتىڭ ىشىنە ەنەدى. ول ءۇشىن جابىق ۇلگىدەگى التى ەستاكادا سالىنۋدا. ەستاكادانىڭ ۇزىندىعى – 2550 مەتر. قازىرگى ۋاقىتتا وعان 82 تىرەۋىش ورناتىلىپ ۇلگەرگەن.
قالا تۇرعىندارى مەن قوناقتارىنا بارىنشا قولايلى بولۋى ءۇشىن سوڭعى ۇلگىدەگى عيمارات قۋات ۇنەمدەۋ ليفتىلەرىمەن جانە ەسكالاتورلارمەن جابدىقتالادى. ماماندار مۇنداعى استىڭعى قاباتتا ورنالاسقان جىلۋ الماستىرعىشتار ۆوكزالدى تەرمالدىق كوزدەر ارقىلى قىزدىرادى دەيدى. بۇل تەحنولوگيا عيماراتتى قىستا جىلىتىپ, جازدا سالقىنداتىپ تۇرادى. ارحيتەكتور نيكيتا ياۆەيننىڭ ءوزى «استاناداعى جاڭا ۆوكزالدىڭ ەڭ تارتىمدى بولىگى – اركا بولادى. وعان قاراعان جان بىردەن قازاق سياقتى كوشپەلى حالىقتىڭ تۇرمىسىنان حابار الادى. اركاعا كەرەگە ەلەمەنتتەرىن قوسىپ, ول ۆوكزال مەن وعان اكەلەتىن جولدار اراسىنداعى كەمپىرقوساق سەكىلدى ءيىلىپ تۇرادى. مۇنىمەن استانانىڭ كەڭدىگىن جانە الەمدەگى تەڭدەسسىز قالا اتانۋعا ۇمتىلىسىن كورسەتپەكپىز. ول ارقىلى قازاقستانداعى تاۋلار مەن قورعانداردىڭ ەلەسىن بايقاتپاقسىز. سونىمەن بىرگە, كوشپەندى مادەنيەتكە ەتەنە جاقىن ەر-توقىم مەن ساداق ەلەمەنتتەرىن دە ەنگىزبەكپىز» دەگەنى ەسىمىزدە.
جالپى, ۆوكزال عيماراتى التى قاباتتان تۇرادى. جوبا مازمۇنى بويىنشا ۆوكزال جاي عانا تەمىرجول بەكەتى ەمەس, ەلوردانىڭ جەرۇستى باس قاقپاسى رەتىندە سيپاتتالادى. كولىكتىڭ ءتۇر-ءتۇرى بىرنەشە باعىتتا جولاۋشىلارعا قىزمەت كورسەتپەك. پويىزداردان بولەك قوعامدىق كولىكتەر, ۆوكزالدى اۋەجايمەن قوساتىن ترامۆاي جۇيتكيدى. ال, ۆوكزال عيماراتىنىڭ جانىنان قوناقۇي, بيزنەس ورتالىعى, ويىن-ساۋىق نىساندارى بوي كوتەرمەك.
ءبىر سوزبەن ايتقاندا, حالىقارالىق «ەكسپو-2017» كورمەسى قارساڭىندا پايدالانۋعا بەرىلەتىن ستراتەگيالىق نىسان ەۋروپا مەن ازيا ەلدەرى اراسىندا ساۋدا-ەكونوميكالىق, مادەني جانە عىلىمي-تەحنيكالىق بايلانىس ورناتۋدا كوممۋنيكاتسيالىق دالىزگە اينالاتىن بولادى.
گۇلميرا شارحانقىزى
بۇل ۆوكزال اشىلسا, قاراعاندى تاس جولىنداعى استاناعا ءتيىپ تۇرعان اۋىلداردىڭ باعى اشىلار ما ەكەن؟ جول سالىنسا عوي شىركىن.