استانا
كەشە استانادان ەلوردا ماڭىنداعى شۇبار اۋىلىنا اۆتوبۋس جۇرە باستادى. №318 باعدار مالوتيموفەەۆكا اۋىلىنان قالاعا شىققاندا شۇبارعا سوعاتىن بولدى.
جامبىل وبلىسى
قازاقستان مۇسىلماندارى ءدىني باسقارماسىنىڭ توراعاسى سەرىكباي قاجى وراز جامبىل وبلىسىنا جاساعان ساپارى بارىسىندا تاراز قالاسىندا تۇراتىن سەگىز بالانىڭ اناسى ايگۇل امىرەەۆاعا پاتەر كىلتىن تاپسىردى. جاڭا پاتەر «زەكەت» قورىنىڭ ۇيىتقى بولۋىمەن, دەمەۋشى ازاماتتاردىڭ قولداۋىمەن ساتىپ الىنعان.
الماتى وبلىسى
پانفيلوۆ اۋدانىنىڭ ورتالىعى جاركەنت قالاسىن گازداندىرۋعا 5,5 ملرد تەڭگە باعىتتالادى. بۇل جوباعا مەملەكەتپەن قوسا جەكەلەگەن ينۆەستورلار دا اتسالىسۋدا. قازىر ونداعى 2,5 مىڭ ۇيگە گاز كىردى. اۋداندى تولىعىمەن گازداندىرۋ جۇمىستارى 2021 جىلى اياقتالادى دەپ جوسپارلانىپ وتىر.
تۇركىستان وبلىسى
سارىاعاش اۋدانىندا زاماناۋي سپورت كەشەنى اشىلدى. نىساندى ەلباسىنىڭ «رۋحاني جاڭعىرۋ» باعدارلاماسىنىڭ «تۋعان جەر» جوباسى اياسىندا جەرگىلىكتى كاسىپكەر ءوز قارجىسىنا سالدىرعان. جوبالىق قۇنى 500 ملن تەڭگە بولاتىن ورتالىقتا ءبىر مەزەتتە 500 ادام سپورتپەن شۇعىلدانا الادى.
اقمولا وبلىسى
اقمولا وبلىسىنىڭ ديقاندارى بيىل جالپى كولەمى 5,6 ميلليون توننا استىق جيناپ, ۇزدىك كورسەتكىشكە قول جەتكىزدى. ءار گەكتاردان 13 تسەنتنەردەن ءونىم الىندى.
قاراعاندى وبلىسى
شەت اۋدانىندا بيىل تۋعانىنا 200 جىل تولىپ وتىرعان شورتانباي جىراۋدىڭ ەسكەرتكىشى كۇردەلى جوندەۋدەن ءوتىپ, ماڭايى اباتتاندىرىلدى. وعان جەرگىلىكتى قازىنادان 4 ميلليون تەڭگە قارجى بولىنگەن.
اقتوبە وبلىسى
وڭىردە الداعى جىلى 40 جاڭا بالاباقشا قولدانىسقا بەرىلمەك. وسىدان كەيىن وبلىستاعى بالدىرعانداردى مەكتەپكە دەيىنگى مەكەمەمەن قامتۋ كورسەتكىشى 100 پايىزعا جەتەتىن بولادى.
اتىراۋ وبلىسى
اتىراۋدا مەملەكەت جانە قوعام قايراتكەرى, قر ەڭبەك سىڭىرگەن زاڭگەرى, «قۇرمەت» وردەنىنىڭ يەگەرى يراك ەلەكەەۆتىڭ «زاڭعار تۇلعا» اتتى شىعارماشىلىق كەشى ءوتىپ, «كوزقاراس» اتتى جاڭا كىتابىنىڭ تۇساۋى كەسىلدى.
پاۆلودار وبلىسى
وبلىستا «اباي اۋىلعا كەلدى» جوباسى جۇزەگە اسىرىلىپ جاتىر. ەرتىس ءوڭىرىنىڭ تانىمال جىرشىسى دانيال اسانوۆ اۋىل-اۋىلدى ارالاپ, ابايدىڭ شىعارماشىلىعىن ناسيحاتتاۋعا كىرىستى. الدىمەن جىرشى ءوڭىردىڭ ماي اۋدانىنا باردى.
شىمكەنت
شىمكەنتتەگى دەندروساياباققا اسانباي اسقاروۆتىڭ ەسىمى بەرىلدى. بۇل شەشىم قازاقستان رەسپۋبليكاسى ۇكىمەتىنىڭ قاۋلىسىمەن بەكىتىلدى.
