استانا قالاسى تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن ەلوردادا «Bilimmen bolis» اتتى جوبانىڭ باستالعانىن وتكەن نومىرلەرىمىزدىڭ بىرىندە جازعان ەدىك. سونىڭ اياسىندا جاقىندا ەلىمىزگە بەلگىلى قوعام قايراتكەرى, استاناداعى مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتى توراعاسى ءاليحان بايمەنوۆ ءدارىس وقىدى.
«مەملەكەتتى باسقارۋ مەن فۋتبولدىڭ ۇقساس جاعى بار. الەمدەگى ميللياردتاعان ادام ءوزى فۋتبول ويناماسا دا, ۇيىندە وتىرىپ الىپ فۋتبولشىلاردى سىنايدى. «انا جەردە پاس بەرۋى كەرەك ەدى, مىنانى قورعانىستان گورى شابۋىلعا قويماي ما؟!» دەپ. مەملەكەتتى باسقارۋ ءىسى تۋرالى دا كوپ كىسى وسىلاي پىكىر ايتا الادى. ياعني ەكەۋى دە – قوعامدا ۇلكەن تولقۋ تۋدىراتىن نارسەلەر» دەپ ءسوزىن باستاعان سپيكەر مەملەكەتتىك باسقارۋعا قاتىستى پايىم-پاراساتىن ورتاعا سالدى.
– ءبىز ءال-ءفارابيدى تانىعانمەن, ونىڭ ەڭبەكتەرىن ونشا وقىمايمىز. وسىدان ون جەتى جىلداي بۇرىن يسپانيانىڭ قازاقستانداعى سول كەزدەگى ەلشىسى مەنەن «سىزدەر ءال-ءفارابيدىڭ سۋرەتىن تەڭگەلەرىڭىزدىڭ بەتىنە شىعاردىڭىزدار. ءال-فارابي اتىنداعى ۋنيۆەرسيتەتتەرىڭىز بار. ال قانشا قازاق سونىڭ ەڭبەگىن وقىدى؟» دەپ سۇرادى. ونىڭ بۇلاي سۇراۋىنىڭ ءمانى, باتىستا ءال-ءفارابيدىڭ ەڭبەگىن كوپ ادام بىلەدى. جالپى, مەملەكەتتىك باسقارۋدى, ساياساتتانۋدى, الەۋمەتتانۋدى وقىعىسى كەلەتىن ادام ءال-ءفارابيدىڭ ەڭبەكتەرىمەن تانىسۋى ءتيىس. ول قايىرىمدى باسشىنىڭ بويىندا بولۋى كەرەك ون ەكى قاسيەت جايلى جان-جاقتى جازعان. بۇدان بولەك, ءجۇسىپ بالاساعۇننىڭ «قۇتتى بىلىگىندە» دە مەملەكەتتى باسقارۋ ىسىندەگى ماڭىزدى تۇلعالاردىڭ مىندەتتەرى تۋرالى وتە تەرەڭ تالدانادى, – دەگەن ءا.بايمەنوۆ بۇدان سوڭ نەلىكتەن كەيىنگى ۋاقىتتارى ەلىمىزدە مەملەكەتتىك باسقارۋ تۋرالى زەرتتەۋلەردىڭ تولاستاپ قالعانىن ءسوز قىلدى.
– بۇل ماسەلەدە ءبىزدىڭ ۇزاق جىلدار بويى كەڭەس ۇكىمەتىنىڭ قول استىندا بولۋىمىز قاتتى اسەر ەتتى. كەڭەس ۇكىمەتى قورعانىسقا قاتىسى جوق سالالاردىڭ تۇگەلگە جۋىعىندا الەمدىك ۇدەرىستەن وقشاۋلانىپ قالدى. سول شاقتا ەڭ بەدەلدى سانالاتىن وقۋ ورىندارىنىڭ ءبىرى ماسكەۋدەگى اۆتوموبيل-جول ينستيتۋتىنىڭ وزىندە دوكتورلىق جۇمىستارىن قورعاپ جاتقانداردىڭ عىلىمي جاڭالىقتارىن «مەرسەدەس», «تويوتا» سياقتى كومپانيالار 20-30 جىل بۇرىن اشىپ قويعان. بىراق سوندا دا ولارعا كوميسسيا مۇشەلەرى «ەي, سەن بۇرىن بىرەۋدىڭ جاساپ كەتكەن نارسەسىن نەسىنە ايتىپ تۇرسىڭ؟» دەپ سويلەمەيدى. ويتكەنى شەتەلمەن قارىم-قاتىناس ورناتپاعاندىقتان, وزدەرىنە دە ول تانىس ەمەس. مۇنداي پروبلەما مەملەكەتتىك باسقارۋ سالاسىندا دا بولدى. «مەملەكەتتى باسقارۋ ءىسىنىڭ ماماندارىن دايىنداۋ – عىلىمنىڭ ەمەس, پارتيانىڭ ءىسى» دەپ تۇسىنگەن ورتالىق كوميتەتتەگىلەر مەنەدجمەنت سياقتى ماماندىقتاردىڭ اشىلۋىنا, بۇل باعىتتاعى عىلىمي زەرتتەۋلەردىڭ جازىلۋىنا قاتتى قارسىلىق ءبىلدىردى, – دەپ بايانداپ بەردى.
جيىن بارىسىندا ءا.بايمەنوۆ قىتاي, اقش, ۇلىبريتانيا, شۆەيتساريا ەلدەرىنىڭ مەملەكەتتىك باسقارۋ تاجىريبەلەرىنە دە توقتالدى. «اقش-تىڭ ەكىنشى پرەزيدەنتى تۋرالى «دجون ادامس» اتتى تەلەسەريال كوردىم. وتاندىق تەلەۆيزيا پايداسىز سەريالداردىڭ ورنىنا وسىنداي دۇنيەلەردى كورسەتسە, حالىقتىڭ قازىرگى قاجەتتىلىگىن وتەر ەدى» دەگەن ۇسىنىسىن دا ايتتى. بۇدان كەيىن سپيكەر قازاقستانداعى مەملەكەتتىك باسقارۋدىڭ بۇگىنگى جاي-كۇيى مەن پروبلەمالارىن سيپاتتادى. ونىڭ ايتۋىنشا, ەلىمىزدە كادرلاردى ىرىكتەۋ بويىنشا ادىلدىككە ءالى دە باسا نازار اۋدارۋ قاجەت.
ەسكە سالا كەتسەك, مۇنداي ءدارىستەردى تىڭداعىسى كەلگەن كەز كەلگەن كىسى شاراعا تەگىن قاتىسا الادى. ال قانداي دا سەبەپپەن كەلە الماي قالعاندار ءۇشىن لەكتسيانىڭ بەينەنۇسقاسى YouTube جەلىسىنە جۇكتەلەدى.
بوتاگوز ماراتقىزى
