وسى اپتادا ەلىمىزدەگى كولىكتەردەگى بىلىق-شىلىقتاردىڭ جايى ءمالىم بولدى. كولىك كومپانيالارىنىڭ قىزمەتىن تەكسەرگەن قۇزىرلى مەكەمەدەگىلەر جاعاسىن ۇستاپتى. ۇستاماي قايتسىن, وتاندىق 2 اۋە كومپانياسى, 17 ۇشاق تەكسەرىستەن وتپەگەن.
وسى جاعدايعا بايلانىستى ەكى اۋە كومپانياسىنىڭ قىزمەتى ۋاقىتشا توقتاتىلدى. ال 139 اۆتوكومپانيا جولاۋشىلار تاسىمالداۋمەن زاڭسىز اينالىسقان. 94 اۆتوبۋستىڭ قوجايىنى كولىكتەردى تىيىم سالىنعان جابدىقتارمەن بەزەندىرگەن. مۇنداي باسسىزدىقتاردى 9 ايدىڭ جۇمىسىنا تالداۋ جاساعان باس كولىك پروكۋراتۋراسى جاريا ەتتى.
2018 جىلدىڭ باسىنان بەرى كولىك كومپانيالارى 2 مىڭ زاڭ بۇزۋشىلىقتارعا جول بەرىپتى. جاساعان زاڭسىز ءىس-قيمىلى ءۇشىن 757 ادام ءتيىستى جاۋاپكەرشىلىككە تارتىلعان. بۇعان قوسا, تاسىمالداۋشى-فيرمالاردىڭ جۇمىسىنا شاعىمدانعان 300 مىڭنان اسا قازاقستاندىقتار ءوز قۇقىعىن قورعاعانى ءمالىم بولدى. جىل بويى جۇرگىزىلگەن تەكسەرىستەردىڭ ناتيجەسىندە زاڭ بۇزۋشىلارعا جالپى كولەمى 1,1 ملرد تەڭگە ايىپپۇل سالىنعان. بۇل اقشانىڭ 825 ملن تەڭگەسى مەملەكەت قازىناسىنا اۋدارىلسا, 146,9 ملن تەڭگەسى دەر كەزىندە جالاقىسىن الا الماعان 3900 جۇمىسشىعا بەرىلگەن.
اۋە كولىگىمەن قاتىنايتىن جولاۋشىلار جۇكتەرىنىڭ جوعالا بەرەتىنىنە ءجيى-ءجيى شاعىمداناتىنىن ەستىپ ءجۇرمىز. كولىكتەگى پروكۋرورلار دا بۇل ماسەلەگە قانىق ەكەن. ماسەلەن, استانادا جۇك ۇرلاۋ بۇرىنعىمەن سالىستىرعاندا 50 پايىزعا دەيىن ازايىپتى. جالپى العاندا, باس كولىك پروكۋراتۋراسى 828 قىلمىستىق ءىستى سوتقا جونەلتكەن. وسى ىستەرگە 970 كۇدىكتىنىڭ قاتىسى بار. سونىڭ ىشىندە 63 سوتتالۋشىعا باس بوستاندىعىنان ايىرۋ جونىندە ۇكىم شىعارىلعان. 219 ادامعا 224,7 ملن تەڭگە كولەمىندە ايىپپۇل سالىنىپتى. مۇنداي مالىمەتتەرگە قاراپ, كولىك سالاسىنداعى بىلىق-شىلىقتاردىڭ كوپتىگىنە تاڭ قالماسقا شاراڭ جوق.
جۋىردا «ەير استانا» اۋە كومپانياسىنىڭ ۇشاعى پورتۋگاليانىڭ ءبىر قالاسىنا اپاتتى جاعدايدا قونعانى بەلگىلى. كەشە وسى وقىس وقيعانىڭ جاي-جاپسارى ايتىلدى. ۇشاقتىڭ باسقارۋعا كونبەگەنىنە باعىتتايتىن قۇرىلعىلاردىڭ ىستەن شىعۋى سەبەپ بولعان. قيىن جاعدايعا تاپ بولعان ۇشقىشتارعا مونتە-رەال اسكەري بازاسىنىڭ ۇشاعى كومەكتەسەدى. كوپ ۇزاماي, ءۇش ەكيپاج مۇشەسى, ءۇش ينجەنەر مىنگەن اۋە كەمەسى پەجا قالاسىنا قونادى. ەكى ادام زارداپ شەككەن. سوعان قاراماستان, «ەير استانا» كومپانياسى «Embraer- 190» ۇشاقتارىنان باس تارتپايتىنىن مالىمدەپ وتىر. كولىكتەگى وسىنداي بىلىق-شىلىقتاردىڭ الدىن الماساق, قايعىلى وقيعالاردى اينالىپ وتە الماسپىز…
