استانا
ەلوردادا اۋتيزممەن اۋىراتىن جانە باسقا دا ەرەكشە كۇتىمدى قاجەت ەتەتىن بالالاردى قولداۋعا ارنالعان «ءحى قىسقى قايىرىمدىلىق بالماسكاراد» وتەدى. 8 جەلتوقسان كۇنى استاناداعى Radisson Hotel Astana قوناقۇيىندە وتەتىن بال اياسىندا اۋكتسيون وتكىزىلىپ, وعان ءتۇرلى باعالى زاتتار قويىلادى.
اتىراۋ
اتىراۋدا اۆتوبۋس جۇرگىزۋشىلەر مەن جولسەرىكتەردىڭ جالاقىسى ەكى ەسەگە ءوستى. جۇرگىزۋشىلەرى 110 مىڭ تەڭگەنىڭ ورنىنا ەندى 300 مىڭ تەڭگە, ال جولسەرىكتەر 45 مىڭ تەڭگەنىڭ ورنىنا 85 مىڭ تەڭگە جالاقى الادى.
الماتى
الماتى اۋەجايىندا رەسەيدىڭ جالعان تولقۇجاتىن ۇسىنعان ايەل ۇستالدى. جالعان قۇجات «ىستانبۇل-الماتى» باعىتىمەن ۇشىپ كەلگەن تك-350 اۋە رەيسىن رەسىمدەۋ بارىسىندا انىقتالعان. ايەلدىڭ رەسەي ازاماتى ەمەس, وزبەكستاندىق ەكەنى انىقتالدى.
تۇركىستان وبلىسى
تۇركىستاندا ەلباسىنىڭ «رۋحاني جاڭعىرۋ» باعدارلاماسى اياسىندا جازىلعان «ماحاببات مۇناراسى» ميۋزيكلىنىڭ پرەمەراسى ءوتتى.
سولتۇستىك قازاقستان وبلىسى
بيىلعى جىلدىڭ ون ايىندا وبلىستا 5878 نارەستە دۇنيەگە كەلگەن. ونىڭ 3 034-ءى – ۇل, قالعان 2 844-ءى – قىز بالا.
باتىس قازاقستان وبلىسى
ح.بوكەەۆا اتىنداعى وبلىستىق قازاق دراما تەاترىندا «قازىرگى زامان قاھارمانى» اتتى رەسپۋبليكالىق شارا قورىتىندىلاندى. شارادا ەلىمىز ءوڭىرلەرىنەن كەلگەن, ادامداردى قۇتقارۋ كەزىندە ەرلىك كورسەتكەن ءتارتىپ ساقشىلارىنا قۇرمەت كورسەتىلدى.
شىمكەنت
شىمكەنتتە فوتوسۋرەتشىلەردىڭ «ۇلى جىبەك جولى بويىمەن» فوتوكورمەسى اشىلدى. «Kazakh Tourism» ۇك» اق ۇيىمداستىرعان فوتوبايقاۋعا قازاقستان مەن وزبەكستاننىڭ اۋەسقوي جانە كاسىبي سۋرەتشىلەرى قاتىسۋدا.
قىزىلوردا وبلىسى
وبلىستىق پروكۋراتۋرا «قىزىلوردا سۋ جۇيەسى» مەملەكەتتىك كوممۋنالدىق كاسىپورنىنىڭ جۇمىسشىلار الدىنداعى 62,8 ملن تەڭگە جالاقى قارىزىن تولەۋگە ىقپال ەتتى. تەكسەرۋ بارىسىندا 570 جۇمىسشىعا بيىلعى شىلدە-تامىز ايلارىنا جالاقى تولەنبەگەنى بەلگىلى بولدى.
الماتى وبلىسى
ءشيلىسۋ اۋىلى ماڭىندا ۇشەۋ بولىپ ۇشىپ كەلىپ, كەيىن توبىنان قالىپ قويعان جالعىز اققۋ قۇتقارىلدى. تۇرعىنداردىڭ كومەگىمەن تابيعاتتى قورعاۋشىلار اققۋدى ۇستاپ, ۋاقىتشا الماتىداعى حايۋاناتتار باعىنا تاپسىردى.
