استانا
«بيلاين» كومپانياسىنىڭ ەلورداداعى تۇتىنۋشىلارى جەلتوقساندا ءبىر اي بويى اۆتوبۋستا 1 تەڭگە تولەپ جۇرە الادى. ول ءۇشىن «موي بيلاين» قوسىمشاسىن ۇيالى تەلەفونعا جۇكتەپ الۋ قاجەت. بۇل شارا قالا ماڭىنا قاتىنايتىن اۆتوبۋستارعا قولدانىلمايدى.
الماتى
ساكەن سەيفۋللين كوشەسىندەگى تەرگەۋ اباقتىسى جابىلدى. وتكەن عاسىردىڭ 30-جىلدارىندا سالىنعان عيمارات قويىلعان تالاپتارعا ءسايكەس كەلمەگەنىمەن قاتار, قالانىڭ ورتالىعىنداعى تۇرعىنداردىڭ ومىرىنە قولايسىزدىق تۋدىرىپ كەلگەن.
شىمكەنت
قالانى جاڭا جىلدىق بەزەندىرۋ شارالارىنا بيىل جەرگىلىكتى بيۋدجەتتەن 70 ملن تەڭگە بولىنەدى. بۇل قاراجاتقا «ارباتتا» جاڭا جىلدىق شىرشا ورناتىلىپ, بەزەندىرىلەدى. سونداي-اق, قالا كوشەلەرىنە ءارتۇرلى شامدارمەن جاعىلعان ساۋلەتتىك فورمالار قويىلادى.
اقتوبە وبلىسى
اقتوبەلىك كاسىپكەر افريكالىق جايىن ءوسىرۋدى قولعا الدى. ول ءۇشىن ارنايى تسەح دايىندالعان. جىلىنا 1,5 مىڭ توننا ءونىم بەرۋگە قاۋقارى بار تسەحتا ازىرگە جايىننىڭ انالىق تۇرلەرى عانا بار.
جامبىل وبلىسى
«جاستار جىلىنىڭ» اياسىندا تۇرار رىسقۇلوۆ اۋدانىندا ەرەكشە جوبا جۇزەگە اسىرىلادى. مالساق 10 جاس تاڭداپ الىنىپ, ولارعا ءبىر وتار قوي, جايىلىمدىق جەر, جەم-ءشوپ بەرىلەدى. جاس شوپاندار مەملەكەتتەن العان مالدى 1-2 جىلدان كەيىن تۇلىكتىڭ ءتولى ەسەبىنەن قايتارادى.
سولتۇستىك قازاقستان وبلىسى
وڭىردە قىسقى جانە اڭشىلىق ءتۋريزمدى دامىتۋ قارقىن الۋدا. بۇعان سەبەپ, وبلىس اۋماعىندا 110 تۋريستىك نىسان بار. وتكەن جىلى سولتۇستىككە رەسەي, قىرعىزستان, قىتاي, گەرمانيا, تۇركيا ەلدەرىنەن 120 مىڭعا جۋىق تۋريست بارعان.
تۇركىستان وبلىسى
تۇركىستاندا تۇركى الەمىنىڭ ورتالىعى اشىلادى. ول جەردە كۇللى ءتۇركى دۇنيەسىنىڭ ويشىلدارى مەن اعارتۋشىلارىنىڭ, عالىمدارىنىڭ ەڭبەكتەرى قويىلىپ, عىلىمي جەتىستىكتەرى جۇرتقا كورسەتىلەدى.
قاراعاندى وبلىسى
قازىبەك بي اۋدانىنداعى 6 كوشەنىڭ اتاۋى وزگەردى. جاڭا اتاۋلاردى قولداپ, 200-دەن اسا قاراعاندىلىقتار داۋىس بەرگەن. بۇرىنعى ناسىپنوي, وتۆالنوي, پاروۆوزنىي, پورتوۆسكوي, پيكەتنىي, پاحوتنىي دەگەن كوشەلەر ەندى جاعالاۋ, تالدى, بەرەكە, ساياحات, سامال, تۇمار بولىپ جاڭاردى.
