استانا قالاسىندا «جول ۇستىندەگى قابىلداۋ» اكتسياسى بولىپ ءوتتى. ايتۋلى شارانى «نۇر وتان» پارتياسىنىڭ استانا قالالىق فيليالى مەن ەلوردالىق ءىىد اكىمشىلىك پوليتسيا باسقارماسى بىرلەسە ۇيىمداستىردى.
استانا قالالىق ءىىد جەرگىلىكتى پوليتسيا قىزمەتىنىڭ باستىعى باقىتجان مالىباەۆتىڭ ايتۋىنشا, اكتسيانىڭ باستى ماقساتى حالىققا قۇقىقتىق ءبىلىم بەرىپ, قوعامدىق جانە جول قاۋىپسىزدىگىن قامتاماسىز ەتۋ بويىنشا جاسالىپ جاتقان جۇمىستار تۋرالى كوپشىلىكتى اقپاراتتاندىرۋ, سونداي-اق تۇرعىنداردى ۇساق قۇقىقبۇزۋشىلىققا «نولدىك توزىمدىلىكپەن» قاراۋدى قالىپتاستىرۋ. «پوليتسەيلەردىڭ جۇمىسى ءاربىر قوعام مۇشەسىنە ۇلگى بولۋى ءتيىس. سونىمەن قاتار ءبىزدىڭ تاراپىمىزدان ۇيىمداستىرىلىپ جاتقان ءىس-شارالاردىڭ بارلىعى بارىنشا اشىق فورماتتا وتكەنى دۇرىس دەپ ويلايمىن. وسى جولى ازاماتتاردىڭ ۇسىنىستارى مەن تىلەكتەرى مەن جول قاۋىپسىزدىگىنە بايلانىستى ماسەلەلەردى كوزىممەن كورىپ, بىلۋگە بەل بۋدىم» دەيدى استانا قالالىق ءىىد جەرگىلىكتى پوليتسيا قىزمەتىنىڭ باستىعى باقىتجان مالىباەۆ.
كەڭ اۋقىمدى شارا «بايتەرەك» مونۋمەنتىنىڭ كولىك تۇراعى الاڭى, تەمىر جول ۆوكزالىنىڭ اۋماعى, «ارتەم» ساۋدا ءۇيى جانە حالىققا قىزمەت كورسەتۋ ورتالىعى سونداي-اق, «رۋبەج» پوستى سەكىلدى بىرنەشە اۋماقتى قامتىدى. قابىلداۋ بارىسىندا «نۇر وتان» پارتياسىنىڭ وكىلدەرى مەن جول-پاترۋلدىك پوليتسيا قىزمەتكەرلەرى كونستيتۋتسيالىق قۇقىقتىق زاڭدىلىقتى ساقتاۋ بويىنشا ازاماتتارمەن ساۋالناما جۇرگىزدى. سونىمەن قاتار ساۋالناماعا قاتىسقان ءاربىر ازامات پوليتسيا قىزمەتىنىڭ ساپاسىن ارتتىرۋعا قاتىستى وزدەرىنىڭ ۇسىنىستارى مەن تىلەكتەرىن ءبىلدىرىپ, كەشكى جانە تاڭەرتەڭگى ۋاقىتتاردا تۋىندايتىن كەپتەلىستەرمەن كۇرەس, قالاداعى كولىك اعىنىن ازايتۋ جانە جاڭادان پايدالانۋعا بەرىلگەن اۋدانداردا قوسىمشا باعدارشامدار مەن جاياۋ جۇرگىنشى وتكەلدەرىن ورناتۋ, سونداي-اق جول قاۋىپسىزدىگى سەكىلدى ماسەلەلەر كوتەردى.
جالپى, ەلوردادا وتكەن «جولدا قابىلداۋ» اكتسياسىنا 600-گە جۋىق ادام قاتىستى.
بۇركىت نۇراسىل
