استانادا قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ۇيىتقى بولۋىمەن «ءومىر ءسۇرۋ مۇمكىندىگىن سىيلا!» جانە «دونور اتانىپ, ادام ومىرلەرىن قۇتقار!» اتتى تاقىرىپتا ورگاندار دونورلىعى مەن ەرىكتى وتەۋسىز قان دونورلىعىن ناسيحاتتاۋعا ارنالعان اۆتوجارىس ءوتتى.
ايتۋلى اكتسيانىڭ ماقساتى – ەلىمىزدەگى دونورلىق ءۇردىستىڭ پايداسى مەن وزەكتىلىگىن ءتۇسىندىرىپ, كوپشىلىكتىڭ وسىعان بايلانىستى قالىپتاسقان كوزقاراسىن وزگەرتىپ, تۇرعىندار نازارىن اۋدارۋدى كوزدەگەن. شارا اياسىندا جۇرتشىلىققا دونورلىق تۋرالى جازىلعان جادىنامالار ۇلەستىرىلدى.
ايتا كەتەيىك, ءبىزدىڭ ەلىمىزدە كوپتەگەن ادامدار, سونىڭ ىشىندە بالالار ترانسپلانتاتسياعا مۇقتاج. اسىرەسە, بۇگىنگى تاڭدا بۇيرەك, باۋىر, جۇرەك جانە تاعى باسقا ورگاندارعا دونورلار تاپشى. بۇنداي جاعدايلاردىڭ بارلىعى شۇعىل سانالادى. «ءبىزدىڭ ترانسپلانتاتسيا ۇردىسىنە دەگەن وڭ كوزقاراسىمىز باسقا ادامداردىڭ ءومىرىن ساقتاپ قالۋعا مۇمكىندىك بەرەدى. سوندىقتان دونورلىق ماسەلەگە تەرەڭىرەك قاراعان ءجون» دەيدى ۇيىمداستىرۋشىلار.
ەلىمىزدە قان قىزمەتى دە ەرىكتى وتەۋسىز دونورلىقتى دامىتۋدى قاجەت ەتەدى. ورتاشا ەسەپپەن العاندا, بىزدەگى دونورلار سانى 1000 ادامعا شاققاندا 18 ادامدى قۇرايدى ەكەن. قون قورى بارلىق مۇقتاج ناۋقاستارعا جەتكىلىكتى بولۋى ءۇشىن دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىمى بويىنشا 1000 ادامعا شاققاندا 50 دونورعا دەيىن ۇلعايتۋ كەرەك. بۇل ءۇشىن ەرىكتى وتەۋسىز دونورلىق ءار ادام ءۇشىن قالىپتى جاعدايعا اينالۋى ءتيىس.
ازامات قۇسايىن
