وسىعان دەيىن نەبىر جاقسى-جايساڭدارمەن كەزدەسۋ ۇيىمداستىرعان ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىنىڭ «كəۋسار» مادەني-تانىمدىق بىرلەستىگىنە قوناققا وسى اپتادا اقىن كەلدى. حالىقارالىق «الاش» ادەبي سىيلىعىنىڭ لاۋرەاتى سەرىك اقسۇڭقارۇلىمەن جۇزدەسۋدى اتالمىش بىرلەستىكتىڭ جەتەكشىسى, قازاقستاننىڭ ەڭبەك سىڭىرگەن ءارتىسى كەنجەعالي مىرجىقباي ۇيلەستىردى.
قازىرگى بىرقاتار بەلگىلى اقىنداردىڭ پوەزيا كوگىنە سامعاۋىنا 1975 جىلى شىققان «كوكتەم تىنىسى» ۇجىمدىق جيناعى جول اشتى. وندا نەسىپبەك ايتۇلىنىڭ, يسرايل ساپاربايدىڭ, زايدا ەلعونديەۆانىڭ, يران عايىپتىڭ, مارقۇم جۇماتاي جاقىپباەۆتىڭ تىرناقالدى تۋىندىلارى جارىق كوردى. جالىنداعان جيىرما بەس جاستاعى سەرىك اقسۇڭقارۇلىنىڭ العاشقى ولەڭدەرى دە وسى كىتاپتان كورىندى.
سول كەزدە اقىن رەسەيدىڭ پەنزا قالاسىندا اسكەري بورىشىن وتەپ جۇرگەن ەدى. اناسىنىڭ سالىپ جىبەرگەن حاتىنىڭ اراسىنان شىققان جۇپ-جۇقا عانا كىتاپ اقىنعا التىنمەن اپتالعانداي بوپ كورىندى. سويتسە, جيناقتى قۇراستىرۋشىلارعا ايتىپ ءجۇرىپ, ولەڭدەرىن اقىن اعاسى ءداۋىتالى ستامبەكوۆ قوستىرعان ەكەن. سەرىك اقسۇڭقارۇلىنىڭ كەيىننەن «مەنىڭ ءپىرىم – ءسۇيىنباي» دەگەن جامبىل تاتەم. مەنىڭ ءپىرىم — قاسىم مەن ءداۋىتالى! الدىندا داۋىتالىدەيىن ادۋىندى ازامات اعاسى بولماسا, مىنا دۇنيەدە مەندەي سەرىك اقسۇڭقار دەگەن باسى ءجۇمىر پەندە بولار ەدى. اقىن بولماس ەدى!» دەيتىنى سودان.
سەرىك اقسۇڭقارۇلى شىعارماشىلىعىنىڭ شارىقتاۋىنا ۇلەس قوسقان ەكىنشى ءبىر ازامات حالقىمىزدىڭ كۇي ونەرىنىڭ بىلگىرى, عۇلاما عالىم اقسەلەۋ سەيدىمبەك بولدى. احاڭ «سوتسياليستىك قازاقستان» (قازىرگى «ەگەمەن قازاقستان») گازەتىنىڭ ادەبيەت جانە ونەر ءبولىمىنىڭ مەڭگەرۋشىسى قىزمەتىندە جۇرگەندە سەرىك ءىنىسى وعان «جيىرماسىنشى عاسىردىڭ جيىرما ءساتى» اتتى پوەما-پانوراماسىن كورسەتەدى. سول كەزدەگى ساياساتقا كەلمەيتىن تۋىندىنى اقسەلەۋ اعا الىپ قالادى. اراعا بىرنەشە جىلدار سالىپ, گازەتتىڭ تۇتاس بەتىنە «قۇرلىقتار» دەگەن تاقىرىپپەن جاريالاتادى.
ءيا, سەرىك اقسۇڭقارۇلىنا وسىنداي تۇلعالاردىڭ شاپاعاتى تيگەن. ءوز كەزەگىندە بىرنەشە جىلدان بەرى جازۋشىلار وداعىنىڭ قاراعاندى وبلىستىق فيليالىنا جەتەكشىلىك ەتەتىن اقسۇڭقارۇلىنىڭ وسى وڭىردەن تالانتتى اقىنداردىڭ شىعۋىنا قوسقان ۇلەسى دە بار دەپ ويلايمىز.
رۋسلان نۇرباي, سەرىك ساعىنتاي, قايرات اسقار, باعدات مۇباراك, راحات ءابدىراحمانوۆ سىندى اقىنداردى دا جۇرت وسى كۇندەرى اقسۇڭقارۇلىنىڭ اباداندارى دەپ اتايدى. ال ولاردىڭ سوڭىنان شىققان ميراس اسان, راۋان قابيدولدين, قۋانىش مەدەۋباەۆ, الماز مىرزاحمەت, جانات جاڭقاشۇلى, جانىبەك ءاليمان اتتى جاس اقىنداردىڭ شىعارماشىلىعى قاراعاندى جەرىندە كەشەگى قاسىم ولەڭدە جاعىپ كەتكەن وتتىڭ سونبەگەنىنەن حابار بەرەدى.
«بارىس جىلى تۋعان اساۋ بالىق ەم» دەپ جىرلايدى سەرىك اقسۇڭقارۇلى. قۇدايدىڭ قۇدىرەتى, بەلگىلى ساتيريك كوپەن امىربەك ونىمەن ءبىر جىلى, ءبىر كۇنى تۋعان. كەزدەسۋدە قۇرداستىق قالجىڭعا ورىن بەرىلدى. ۋنيۆەرسيتەتتىڭ فيلولوگيا فاكۋلتەتىنىڭ ستۋدەنتتەرى اقىننىڭ ولەڭدەرىن مانەرلەپ وقىدى. كۇمىس كومەي, جەز تاڭداي ءانشى گۇلميرا سارينا سەرىك اقسۇڭقارۇلىنىڭ ولەڭدەرىنە جازىلعان تالانتتى كومپوزيتور ەسجان ءامىروۆتىڭ «ەسىل مەن نۇرا» جانە «ابىرالى» اندەرىن سالدى.
داۋىلپاز اقىن قاسىم امانجولوۆتىڭ «ءوزىم تۋرالى» ءانىن عافۋ قايىربەكوۆتىڭ عاجاپ ورىنداعانىن ەستىگەنبىز. وسى جولى بۇل ءاندى تاعى ءبىر اقىن ىقىلاس وجايۇلىنىڭ ورىنداۋىندا ەستىدىك. اقىننىڭ اسقار تاۋداي اعاسى, ورتالىق قازاقستان ءوڭىرى مادەنيەتىنىڭ وركەندەۋىنە ەڭبەك ءسىڭىرىپ, اقساقالدىق جاسقا جەتىپ وتىرعان قايىربەك ءسادۋاقاسوۆ ادەمى ەستەلىكتەردى جاڭعىرتتى. سەرىك اقسۇڭقارۇلى سىي-سىياپاتسىز دا كەندە قالعان جوق. قازاق راديوسى ۇجىمى جانە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى اتتارىنان قوشەمەتتەلىپ, قۇرمەتتەلدى.
