استانامەن استاسقان اڭسار
كۇن سايىن قۇلاشىن كەڭگە جايىپ, ەركە ەسىلدىڭ قوس قاپتالىن الا سالىنعان اسقاق استانانىڭ تۋعان كۇنىن ەلوردالىق ەرسايىن حاسەنوۆ پەن التىناي نۇركەەۆا ەرەكشە ىقىلاسپەن قارسى الادى. سەبەبى, بيىلعى 6 شىلدە كۇنى ولار وتباسىلىق العاشقى مەرەيتويلارىن اتاپ وتپەكشى. وتاسقاندارىنا – 5 جىل.
ارماندارىن استانامەن استاستىرىپ, بولاشاقتارىن باس قالامەن بايلانىستىرعان جۇبايلار جاس ەلوردامەن بىرگە ءوسىپ, بىرگە ەسەيىپ كەلەدى. باس شاھاردىڭ ءار بۇرىشى, ءار كوشەسى ولار ءۇشىن تىم ىستىق. مۇنداعى تاماشا تۇرعىن ءۇي كەشەندەرى, ەڭسەلى اكىمشىلىك عيماراتتار, گۇلزارلار مەن فونتاندار, اسەم مونۋمەنتتەر مەن ساۋلەت ەسكەرتكىشتەرى كوز الدارىندا كوركەيىپ, كۇن سايىن اباتتانا تۇسۋدە.
سولتۇستىك قازاقستان وبلىسىندا دۇنيەگە كەلگەن التىناي بالا كەزىنەن استانادا وقۋدى ارمانداسا, ورتا مەكتەپتى ويداعىداي اياقتاپ, ەلىمىزدەگى ىرگەلى وقۋ ورىندارىنىڭ ءبىرى – ەۋرازيا ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىنە تۇسكەننەن كەيىن سول ارمانىنا ءبىر تابان جاقىنداۋعا مۇمكىندىك الدى. سول ساتتەگى قۋانىشىن سوزبەن ايتىپ جەتكىزۋ مۇمكىن ەمەس! ورىمدەي قىزدىڭ استانامەن العاشقى تانىستىعى وسى كەزدەن باستاۋ الدى. جوعارى وقۋ ورنىن «وتە جاقسى» دەگەن باعالارمەن بىتىرگەن ول الداعى ءومىرىن وزىنە ارمان بولعان, سۇيىكتى قالامەن بايلانىستىرۋعا بەلىن بەكەم بۋادى. ول استانادا بەيبىتشىلىك جانە كەلىسىم سارايى رەسمي تۇردە اشىلعان جىلى العاشقى ەڭبەك جولىن باستايدى. ەرسايىن ەكەۋى ۇيلەنگەن جىلى باس قالادا «باقىت» نەكە سارايى ەلوردالىقتارعا ەسىگىن ايقارا اشادى. تىزە بەرسەك, جادىلارىندا جاتتالعان مۇنداي قۋانىشتى ساتتەر جەتەرلىك. ونى وزدەرى جاقسىلىققا جوريدى.
ەلباسىشا ايتقاندا «…ەركە ەسىل جاعاسىندا بوي كوتەرگەن, ەرەكشە ساۋلەتتىك لاندشافى بار, بىرەگەي مۇسىندىك نىشاندارى ساپ تۇزەگەن, جوعارى تەحنولوگيالى بولاشاققا ۇمتىلعان, وزگەنى سىيلاپ, ءوزىنىڭ جاڭا استاناسى مەن ءوز ەلىن شەكسىز ماقتانىش تۇتاتىن كوپۇلتتى جانە كوپدىندى حالقى بار اسەم دە مەيىرلى استانامىز, مىنە وسىنداي قالا» دەپ ماقتانادى. ەگەمەن ەلىمىزدە بولىپ جاتقان كۇن سايىنعى وزگەرىستەر مەن جەتىستىكتەرگە كۋا بولۋمەن بىرگە ولار وسى قالانىڭ دامۋىنا وزدەرىنشە ۇلەس قوسىپ ءجۇر. بۇگىندە التىناي تولەگەنقىزى – قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ ماگيسترانتى, ال ەرسايىن زەينوللاۇلى – ۇلتتىق قاۋىپسىزدىك كوميتەتىنىڭ شەكارا قىزمەتىندە باقىلاۋشى.
باس قالامەن بىرگە بوي تۇزەپ كەلە جاتقان جۇبايلاردىڭ بار بايلىعى – استانادا دۇنيەگە كەلگەن ەگىز قىزدارى ادينا مەن مادينا. قازىرگى كەزدە №29 بالاباقشادا تاربيەلەنىپ جۇرگەن 4 جاسار بۇلدىرشىندەر استانانى مەيلىنشە جاقسى كورەدى. وعان سوناۋ ءبىر جىلى انكارا مەرىنىڭ ەلورداعا رەسمي ساپارى بارىسىندا, تۇرىك جۋرناليستەرىنىڭ ادينا مەن مادينادان ءبىر-ەكى شۋماق تاقپاق وقىپ بەرۋلەرىن وتىنگەندە, وڭ الاقاندارىن جۇرەكتەرىنىڭ تۇسىنا قويا سالا, قازاقستاننىڭ ءانۇرانىن اۋەلەتە جونەلگەنىن كوزىمىزبەن كورگەندە تاڭداي قاققانبىز. وسىناۋ بالعىن بوبەكتەر ءالى-اق اتا-انالارىنا ۇقساپ, الدارىنا ۇلكەن ماقسات قويىپ, جان-جاقتى ىزدەنۋدىڭ ارقاسىندا ءبىلىمدى دە بىلىكتى جاستار قاتارىن تولىقتىرار, ەڭ باستىسى, ەلىمىزدىڭ ناعىز پاتريوتتارى اتانار. ىلايىم سولاي بولعاي! تەك, بولاشاعىن باس قالامەن بايلانىستىرعان بالاقايلار ءتىل-كوزدەن امان بولسا ەكەن!
گۇلبارشىن وكەشقىزى