«استانا وپەرا» تەاترىندا «Astana Piano Passion – 2014» ەكىنشى حالىقارالىق كلاسسيكالىق مۋزىكا فەستيۆالى جانە جاس پيانيستەر بايقاۋى اياسىندا وسى كونكۋرستىڭ بىلتىرعى لاۋرەاتتارىنىڭ كونتسەرتى وتەدى. جاس شەبەرلەر كورەرمەندەردى تاڭ قالدىرعانى سونشا, بايقاۋدىڭ ۇيىمداستىرۋ كوميتەتى دارىندى بالالاردى استانادا تاعى ءبىر مارتە ونەر كورسەتۋگە شاكىردى. ولار بەلگىلى جاس پيانيستەر اۆستراليالىق شۋان حەرن لي, ماسكەۋلىكتەر ۆارۆارا كۋتۋزوۆا, الەكساندر كۋتۋزوۆ, يليا باحتين جانە قازاقستاندىق جاس سكريپكاشى رۋسلان تۋرۋنتاەۆ. بالالار – ونەرگە دەگەن قۇشتارلىقتارىمەن, ىنتا-تالاپتارىمەن, ارتىستىك قابىلەتتەرىمەن جەتىستىككە جەتكەندەر. بارلىعى بەلگىلى حالىقارالىق بايقاۋلاردىڭ جۇلدەگەرلەرى, بىرنەشە رەت وزدەرىنىڭ جەكە كونتسەرتتەرىن بەرگەن. Astana Piano Passion بايقاۋىنىڭ جەڭىمپازى اتانۋ ولاردىڭ ومىرىندە ۇلكەن ماڭىزعا يە.
«استاناعا سايىسقا قاتىسۋشى ەمەس, جەكە ءارتىس رەتىندە كەلۋ – ۇلكەن جاۋاپكەرشىلىك. ءارى ءبىزدى ونەر كورسەتۋگە شاقىرعاندارىنا وتە قۋانىشتىمىز» دەيدى 10 جاستاعى ۆارۆارا كۋتۋزوۆا. – وتكەن جىلعى سايىستان كەرەمەت اسەر الىپ قايتتىم. قازاقستاننان كوپ دوستار تاپتىم. قازىر ولارمەن ينتەرنەت ارقىلى حات جازىسىپ وتىرامىز. وعان قوسا كۋميرىم دەنيس ماتسۋەۆپەن جاقىنىراق تانىستىم. بۇرىن بۇل مەن ءۇشىن ارمان بولاتىن. قازىر ونىڭ كونتسەرتتەرىندە ونەر كورسەتىپ ءجۇرمىن. استانادا وتكەن بايقاۋ كەرەمەت ۇنادى. ادەمى قوناقۇي, ءزاۋلىم كونتسەرت زالدارى, مەيىرىمدى كورەرمەندەر, بارلىعى كوڭىلىمنەن شىقتى. بارىنەن بۇرىن, ديريجەر ەرجان ءداۋىتوۆتى ايتساڭىزشى؟! مەن ونەرىمدى كورسەتىپ, ساحنانىڭ سىرتىنا بارعانىمدا, سكريپكاشى قىزدار مەنى قۇشاقتاپ, قۇتتىقتاپ جاتتى. سول كەزدە ديريجەر كەلىپ: «مەن سەنى ءوزىمنىڭ قىزىم سياقتى جانىما جاقىن تارتىپ, جاقسىلاپ ونەر كورسەتۋگە تىرىستىم» دەدى. سول كىسىمەن جانە ادەمى استانامەن تەزىرەك قاۋىشقىم كەلىپ ءجۇر. استانا – ەرتەگىدەگى قالا سياقتى, وتە كەرەمەت!».
ال, اۆستراليالىق شۋان حەرن لي بولسا: «مۇنداي كەرەمەت فەستيۆالعا مۋزىكانت رەتىندە شاقىرىلىپ وتىرعانىم – مەن ءۇشىن ۇلكەن مارتەبە. فەستيۆال جەتەكشىسى دەنيس ماتسۋەۆپەن كەزدەسۋىمدى اسىعا كۇتىپ ءجۇرمىن. مەنى ول جاقتا قازاقتاردىڭ قوناقجايلىلىعى تاڭ قالدىرعان بولاتىن. ءارى بايقاۋ وتە جوعارى دەڭگەيدە ۇيىمداستىرىلدى. تەاتر ساحنالارىنىڭ اكۋستيكاسى, سىپايى كورەرمەندەر ءاردايىم ءبىزدى قولداپ وتىردى. ءبىز ويناعان اسپاپتاردىڭ دا ساپاسى جوعارى» دەيدى.
سونداي-اق, وسى بايقاۋ اياسىندا رەسەيدىڭ حالىق ءارتىسى دەنيس ماتسۋەۆ جانە ماسكەۋ فيلارمونياسىنىڭ ءسوليسى, ەكاتەرينا مەچەتينانىڭ كونتسەرتى وتەدى.
ەركەجان ساتىمبەك
